Y diweddaraf am ymosodiad ym Mharc Bute – dau ddyn wedi'u cyhuddo

Mae ditectifs sy'n ymchwilio i ymosodiad sydd wedi gadael y dioddefwr mewn cyflwr difrifol yn yr ysbyty wedi cyhuddo dau ddyn o ymgais i lofruddio heno.

Mae Jason Edwards, sy'n 25 oed, a Lee William Strickland, sy'n 36 oed, y ddau ohonynt yn dod o Gaerdydd, wedi'u cadw yn y ddalfa i ymddangos gerbron Llys Ynadon Caerdydd ddydd Llun (26 Gorffennaf), yn dilyn yr ymosodiad ym Mharc Bute yn oriau mân bore dydd Mawrth, 20 Gorffennaf.

Mae dyn 52 oed mewn cyflwr difrifol o hyd yn Ysbyty Athrofaol Cymru. Mae ei deulu yn cael ei gefnogi gan swyddogion cyswllt â theuluoedd sydd wedi cael hyfforddiant arbenigol.

Mae ditectifs bellach yn apelio am help i adnabod unigolyn arall dan amheuaeth, sef menyw anhysbys.

Dywedodd y Ditectif Arolygydd Stuart Wales:

“Yn naturiol, mae'r ymosodiad difrifol hwn wedi peri pryder yn lleol, ac rydym am roi sicrwydd i'r cyhoedd bod nifer fawr o ymholiadau'n mynd rhagddynt. Byddwn yn gweithio'n ddi-baid i adnabod unrhyw un a oedd yn rhan o'r ymosodiad treisgar hwn a'i ddwyn gerbron y llys.

“Mae'r ffaith ein bod wedi cyhuddo'r ddau ddyn hyn yn dangos ein bod yn gwneud cynnydd sylweddol a hoffwn ddiolch i'r cyhoedd am ein helpu.

“Byddwn yn eu hannog i barhau i wneud hynny, gan gyflwyno unrhyw wybodaeth i ni – ni waeth pa mor ddibwys y mae'n ymddangos. Byddwn hefyd yn apelio’n uniongyrchol at y fenyw yr amheuir ei bod yn rhan o’r digwyddiad hwn i ddod ymlaen o'i gwirfodd, gan y byddwn yn dod o hyd iddi ac yn ei henwi yn hwyr neu'n hwyrach.”

Mae Ystafell Digwyddiad Mawr yn parhau i weithredu yng Ngorsaf Heddlu Canol Caerdydd a chynyddwyd y nifer o batrolau yn yr ardal.

Dylai unrhyw un sydd â gwybodaeth neu ddeunydd fideo a allai helpu gyda'r ymchwiliad gysylltu â'r heddlu gan ddefnyddio'r porth penodol https://mipp.police.uk/operation/62SWP21B34-PO1

Fel arall, gallwch gysylltu â ni drwy un o'r ffyrdd canlynol gan ddyfynnu cyfeirnod 2100254215.

 

Ewch i: https://www.south-wales.police.uk/cy-GB/cysylltu-a-ni/af/cysylltu-a-ni/us/cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/
Anfonwch neges breifat atom drwy Facebook/Twitter
Drwy e-bost: [email protected]
Ffôn: 101

Gallwch hefyd gysylltu â Taclo'r Tacle yn gwbl ddienw ar 0800 555 111.