Cysegru cofeb newydd i anrhydeddu swyddogion a staff yr heddlu a fu farw

Bydd swyddogion a staff arwrol yr heddlu o bob cwr o'r DU a fu farw wrth ddiogelu'r cyhoedd bellach yn cael eu coffáu drwy gofeb barhaus a gafodd ei dadorchuddio heddiw yn yr Ardd Goed Goffa Genedlaethol yn Swydd Stafford.

Bydd Cofeb newydd Heddlu'r DU yn anrhydeddu dewrder ac aberth yr unigolion hynny o bob rhan o wasanaeth yr heddlu sydd wedi ymroi eu bywydau i ddiogelu'r cyhoedd.

Aeth cannoedd o westeion i'r seremoni, a gynhaliwyd yn unol â chyfyngiadau'r Coronafeirws, gan gynnwys urddasolion, uwch-wleidyddion, cynrychiolwyr o bob heddlu yn y DU, elusennau plismona, a theuluoedd a ffrindiau swyddogion a gafodd eu lladd ar ddyletswydd.

Dywedodd y Prif Gwnstabl Jeremy Vaughan, a aeth i'r digwyddiad ar ran Heddlu De Cymru:

“Bu'n fraint cynrychioli swyddogion a staff, ddoe a heddiw, yn y seremoni ddadorchuddio genedlaethol heddiw.
“Mae swyddogion a staff yr heddlu yn wynebu risgiau bob dydd er mwyn helpu i gadw ein cymunedau'n ddiogel, a bydd y gofeb hon yn cydnabod y cyfraniad hanfodol y mae plismona yn ei wneud at ein cymuned.
“Fel pob heddlu, mae Heddlu De Cymru wedi wynebu trasiedi wrth i 17 o swyddogion a staff lleol wneud yr aberth eithaf ers sefydlu Heddlu De Cymru yn 1969.
“Bydd y gofeb yn ganolbwynt i deulu, ffrindiau a chydweithwyr yr unigolion hynny a gafodd eu lladd ar ddyletswydd, lle y gallant fynd i gofio amdanynt.”

I gyd-fynd â'r digwyddiad cenedlaethol, cynhaliwyd digwyddiad lleol ym mhencadlys Heddlu De Cymru dan arweiniad y Prif Gwnstabl Cynorthwyol, Jenny Gilmer a Chomisiynydd yr Heddlu a Throseddu De Cymru, Alun Michael. Roedd y seremoni yn cynnwys darlleniadau, munud o dawelwch, gosod torchau, blodau a biwglwr.

Ers 1749 pan sefydlwyd y Bow Street Runners yn heddlu cydnabyddedig cyntaf y wlad, mae bron 5,000 o swyddogion ac aelodau o staff yr heddlu wedi marw wrth blismona ein cymunedau, dros 1,500 ohonynt drwy weithredoedd treisgar.

Yr Ardd Goed Goffa Genedlaethol yw'r lleoliad cenedlaethol ar gyfer coffáu ein gwasanaethau drwy gydol y flwyddyn. Ceir bron 400 o gofebion sy'n ysgogi'r meddwl yno, gan gynnwys Cofeb Genedlaethol y Lluoedd Arfog, ac mae'n denu dros 300,000 o ymwelwyr bob blwyddyn.

 

Ychwanegodd Comisiynydd yr Heddlu a Throseddu De Cymru, Alun Michael:

“Bob awr o bob diwrnod, mae ymroddiad a phroffesiynoldeb swyddogion a staff yr heddlu ledled y Deyrnas Unedig yn sicrhau diogelwch y cyhoedd yn eu cartrefi ac yn eu cymunedau.
“Ymhlith egwyddorion Syr Robert Peel ar gyfer sefydlu gwasanaeth yr heddlu yn Llundain, gwyddai mai'r heddlu yw'r cyhoedd, a'r cyhoedd yw'r heddlu; bydd Cofeb newydd yr Heddlu yn y DU yn lleoliad i bobl dalu teyrnged i aelodau o'u teuluoedd, eu ffrindiau a'u cydweithwyr a fu'n barod i wneud yr aberth fwyaf wrth ymgymryd â'u dyletswyddau.”

I gael rhagor o wybodaeth ewch i www.ukpolicememorial.org