Dyn wedi'i garcharu am derfysg ar Safle Sipsiwn a Theithwyr Shirenewton

Mae dyn o Lundain wedi cael ei ddedfrydu i bedair blynedd o garchar ar ôl cael ei ddyfarnu'n euog o derfysg.

Mae'r cyhuddiad yn ymwneud ag ymchwiliad sy'n mynd rhagddo i helynt mawr yng Nghaerdydd ym mis Mawrth 2021. 

Ymddangosodd James Anthony Mongan, 35, o Brent, gerbron Llys y Goron Caerdydd heddiw (6 Rhagfyr) i'w ddedfrydu ar ôl pledio'n euog mewn gwrandawiad blaenorol.

Cafodd swyddogion yr heddlu eu galw i Safle Sipsiwn a Theithwyr Shirenewton ar Wentloog Avenue, Trowbridge, Caerdydd ychydig ar ôl 4pm ddydd Sul, 21 Mawrth 2021.

Cafodd pedwar dyn eu hanafu yn ystod yr helynt a chafodd nifer o arfau eu hatafaelu ar y pryd.

Mongan yw'r person cyntaf i'w gael yn euog mewn perthynas â'r digwyddiad.

Ef hefyd yw'r person cyntaf yng Nghymru i'w gael yn euog o derfysg.

Mae 46 o arestiadau eraill wedi cael eu gwneud yn ne Cymru ac mewn ardaloedd eraill o'r DU mewn perthynas â'r helynt.

Yng Nghaerdydd, mae 20 o bobl wedi cael eu harestio mewn cysylltiad â'r helynt, gan gynnwys 15 o ddynion, pedwar bachgen yn eu harddegau ac un fenyw.

Cafodd 26 o bobl eraill eu harestio yn ardaloedd yr heddlu canlynol – Gwasanaeth yr Heddlu Metropolitanaidd (18), Heddlu Dyffryn Tafwys (4), Swydd Bedford (1), Swydd Hertford (1), Surrey (1) a Gwent (1).

Cafodd y rhan fwyaf o'r 46 o bobl eu harestio ar 22 Medi 2021 ac mae pawb a gafodd eu harestio ar fechnïaeth yr heddlu o hyd.

Dywedodd y Ditectif Uwch-arolygydd Ceri Hughes o Heddlu De Cymru: “Fel bob amser, mae Heddlu De Cymru yn ymdrechu i amddiffyn pob cymuned rhag niwed difrifol.

“Ym mis Mawrth, gwnaethom addo y byddem yn dod o hyd i'r bobl a oedd yn gyfrifol am yr anhrefn sylweddol hwn, ac mae'n bleser gennyf ddweud, gyda chymorth heddluoedd eraill, fod nifer sylweddol o bobl wedi cael eu harestio.

“Dylai unrhyw un sy'n meddwl bod rhyddid ganddo i gyflawni trais o'r fath yn ardal Heddlu De Cymru feddwl ddwywaith. 

"Ni chaiff ymddygiad o'r fath ei oddef ac rydym yn gobeithio bod yr ymgyrch ar y cyd hon gan wahanol heddluoedd yn cyfleu hynny'n glir.

“Hoffwn ddiolch i gymunedau lleol unwaith eto am eu hamynedd, eu dealltwriaeth a'u cydweithrediad wrth i'r arestiadau a'r chwiliadau fynd rhagddynt yn ystod ein hymchwiliad.”