Ymosodiad Parc Bute: Teulu'n talu teyrnged ar ôl i'r dioddefwr farw yn yr ysbyty

Gall Heddlu De Cymru gadarnhau bod dyn 54 oed yr ymosodwyd arno ym Mharc Bute, Caerdydd, fis diwethaf wedi marw.

Roedd Gary Jenkins o Fae Caerdydd wedi bod mewn cyflwr difrifol ers y digwyddiad yn ystod oriau mân bore dydd Mawrth, 20 Gorffennaf, a bu farw yn Ysbyty Athrofaol Cymru, Caerdydd, ddydd Iau 5 Awst.

Fe'i disgrifiwyd gan ei deulu fel tad, gŵr a brawd annwyl.

Mae ei deulu, sy'n parhau i gael cefnogaeth gan swyddogion cyswllt â theuluoedd arbenigol, wedi rhyddau'r datganiad canlynol.

“Rydym yn torri ein calonnau wrth gyhoeddi marwolaeth annhymig Dr Gary Jenkins, a oedd yn dad annwyl i ddwy ferch hyfryd.
“Bu'n byw ei fywyd yn hapus gyda chariad, cerddoriaeth, creadigrwydd ac ymroddiad i'w broffesiwn.
“Gofynnwn am breifatrwydd yn ystod y cyfnod anodd hwn.”

Mae tri unigolyn wedi’u cyhuddo o ymgais i lofruddio ac nid yw'r ditectifs yn chwilio am neb un arall mewn cysylltiad â’r ymosodiad ar hyn o bryd.

Dywedodd yr Uwch Swyddog Ymchwilio, sef y Ditectif Brif Arolygydd Dros Dro Stuart Wales o Dîm Ymchwilio i Droseddau Mawr Heddlu De Cymru:

“Rydym yn ymwybodol o farwolaeth drist Dr Gary Jenkins ac rydym yn meddwl am ei deulu a'i ffrindiau yn ystod y cyfnod hwn.
“Rydym mewn cysylltiad â Gwasanaeth Erlyn y Goron a Chrwner EM mewn perthynas â'i farwolaeth, a bydd y mater yn symud yn ei flaen fel ymchwiliad i lofruddiaeth.
“Hoffwn ddiolch i'r cyhoedd am eu cymorth gwerthfawr wrth i ni barhau i ymchwilio i amgylchiadau'r digwyddiad hwn.
“Er bod y tri unigolyn wedi'u cyhuddo, rydym yn apelio am wybodaeth o hyd. Ni waeth pa mor ddibwys yw'r wybodaeth i bob golwg, gallai fod yn hanfodol i'n hymchwiliad.
“Hoffem yn arbennig glywed gan unrhyw un a oedd ym Mharc Bute yn ystod oriau mân bore dydd Mawrth, 20 Gorffennaf.
“Yn benodol, rydym am siarad ag unrhyw un a oedd yn agos at bont droed y Mileniwm, sy'n cysylltu Parc Bute â Gerddi Sophia, rhwng hanner nos ac 1.20am.”

Mae Jason Edwards, sy'n 25 oed, a Lee William Strickland, sy'n 36 oed, ill dau o Gaerdydd, a merch 16 oed na ellir ei henwi am resymau cyfreithiol, yn cael eu cadw yn y ddalfa a byddant yn ymddangos gerbron Llys y Goron Caerdydd ar 23 Awst.

Gellir cyflwyno unrhyw wybodaeth neu ddeunydd fideo a allai helpu'r ymchwiliad gan ddefnyddio porth ar-lein https://mipp.police.uk/operation/62SWP21B34-PO1
Fel arall, gallwch gysylltu â ni drwy un o'r dulliau canlynol, gan ddyfynnu rhif digwyddiad *254215. 
Ewch i: https://bit.ly/HDCDarparuGwyb
Anfonwch neges breifat atom ar Facebook/Twitter
E-bostiwch: [email protected]
Ffoniwch: 101
Gallwch hefyd gyflwyno gwybodaeth i Taclo'r Tacle yn ddienw ar 0800 555 111.