Achos o dreisio gan ddieithryn 41 mlynedd yn ôl – dyn wedi'i gyhuddo

Mae dyn 66 oed wedi cael ei gyhuddo o achos o dreisio gan ddieithryn yng Nghaerdydd 41 mlynedd yn ôl.

Cafodd Roland Long ei arestio ar 15 Medi 2020, a chafodd ei gyhuddo wythnos diwethaf ar 3 Awst 2021. Bydd yn ymddangos gerbron Llys Ynadon Caerdydd ar 27 Awst 2021.

Cafodd ei arestio yn dilyn ymchwiliad gan Uned Adolygu Troseddau Arbenigol Heddlu De Cymru i ddigwyddiad yn ardal y Rhath yng Nghaerdydd ym mis Awst 1980.

Dywedodd y Ditectif Brif Arolygydd Andrew Miles, sef pennaeth Uned Adolygu Troseddau Arbenigol Heddlu De Cymru:

“Rydym yn parhau i fod yn ymrwymedig i ymchwilio i droseddau difrifol heb eu datrys, a byddwn yn aml yn ailedrych ar achosion wrth i wyddoniaeth fforensig ddatblygu.

“Mae cymorth a chefnogaeth ar gael i bob dioddefwr trais rhywiol, a byddwn yn annog pob dioddefwr, ni waeth pryd y digwyddodd y drosedd, i roi gwybod i'r heddlu.”

Dros y flwyddyn ddiwethaf, mae'r uned – o dan yr enw Ymgyrch Dudley – wedi bod yn ymchwilio i droseddau rhywiol difrifol heb eu datrys ledled De Cymru sy'n dyddio'n ôl sawl degawd.

Mae'r uned wedi'i chydnabod yn genedlaethol ac wedi arloesi ym maes technegau ymchwilio i achosion heb eu datrys o'r blaen.

Gofynnir i unrhyw un sydd â gwybodaeth am y digwyddiad hwn gysylltu â Heddlu De Cymru ar 101 neu Taclo'r Tacle yn ddienw ar 0800 555 111 gan ddyfynnu rhif digwyddiad 2000241680.