Mae'r gyfraith ar arfau tanio hynafol yn newid

Mae'r gyfraith ar arfau tanio hynafol yn newid. Ers 22 Mawrth 2021 ni fydd rhai arfau tanio a oedd yn cael eu hystyried yn hynafol yn y gorffennol, ac felly wedi'u heithrio rhag cael eu rheoli, yn gymwys mwyach ac mae'n rhaid cael trwydded ar eu cyfer bellach. Mae'n rhaid i berchnogion yr arfau tanio hyn weithredu erbyn hanner nos ar 21 Medi 2021 i'w trwyddedu neu gael gwared arnynt yn gyfreithlon.

Mae Adran 58 o Ddeddf Arfau Tanio 1968 a Rheoliadau Arfau Tanio Hynafol 2021 yn nodi yn gyfreithiol pa arfau tanio y gellir eu hystyried yn rhai hynafol, ac felly wedi'u heithrio rhag trwyddedu.

Yn dilyn eu defnydd mewn troseddau, bydd angen trwyddedu saith cetrisen bellach nad oedd angen eu trwyddedu yn flaenorol o dan y gyfraith sydd wedi newid. Y cetris hyn yw:

• .320 British (sydd hefyd yn cael ei alw'n .320 Revolver CF, byr neu hir)
• .41 Colt (byr neu hir)
• .44 Smith and Wesson Russian
• .442 Revolver (sydd hefyd yn cael ei alw'n .44 Webley)
• 4mm Dutch Revolver
• 6mm German Ordnance Revolver
• 11mm French Ordnance Revolver M1873 (Army)

Bydd cyfnod pontio tan 23:59 ar 21 Medi 2021, ac yn ystod y cyfnod hwn gall perchnogion arfau tanio o'r fath benderfynu beth y maent am ei wneud â nhw.

Os ydych yn berchen ar unrhyw un o'r arfau tanio a amlinellwyd, neu yn adnabod rhywun sy'n berchen ar unrhyw un ohonynt, ewch i Wefan Llywodraeth y DU i gael rhagor o wybodaeth am beth i'w wneud nesaf.