Gorfodi rheoliadau COVID-19: Tua 120 yn cael dirwyon yn ystod gŵyl banc y Pasg

Cafodd tua 120 o bobl ddirwyon dros benwythnos gŵyl y banc wrth i leiafrif o bobl barhau i dorri'r rheolau gyda phartïon mewn tai ac achosion eraill o dorri rheoliadau'r coronafeirws.

Er bod y rheoliadau wedi'u llacio yn ddiweddar, a bod caniatâd bellach i bobl aros mewn llety gwyliau hunangynhwysol, teithio unrhyw le yng Nghymru, a chwrdd â hyd at chwe unigolyn o ddwy aelwyd, gwelwyd bod lleiafrif o bobl yn torri'r rheoliadau o hyd.

Roedd llawer o'r hysbysiadau cosb benodedig ar gyfer torri rheoliadau'r coronafeirws ar gyfer partïon mewn tai a chynulliadau, gan gynnwys:

10 o bobl yn Butetown, Caerdydd

Wyth unigolyn i gyd o aelwydydd gwahanol, yn ymgynnull mewn gardd yn Sandfields, Castell-nedd Port Talbot

10 o bobl ym Mae Caerdydd

Saith unigolyn am fynd i barti pen-blwydd ym Mhontardawe, Castell-nedd Port Talbot

20 o bobl mewn cynulliad ar raddfa fawr yn ardal Cathays, Caerdydd

Aeth swyddogion i gyfeiriad yn Aberpennar, Rhondda Cynon Taf, ar ôl cael adroddiadau am 30 o bobl mewn parti. Fodd bynnag, ni wnaeth y rhai a oedd yn lletya adael y swyddogion i mewn i'r eiddo o wirfodd. Ar ôl gorfodi mynediad, gwnaeth nifer o bobl ymddwyn yn elyniaethus tuag at y swyddogion ac roedd yn amlwg bod achosion digywilydd o dorri'r rheoliadau. Cafodd un dyn ei arestio am rwystro swyddog a chyflwynwyd hysbysiadau cosb benodedig.

Bu cynnydd yn nifer yr achosion o ymddygiad gwrthgymdeithasol a grwpiau mawr yn ymgynnull yn Abertawe y penwythnos hwn hefyd, gan gynnwys adroddiad am 100 o bobl yn ymgasglu ym Mae Abertawe.

Mae gorchymyn gwasgaru Adran 35 ar waith yng Nghei'r Fôrforwyn, Bae Caerdydd o hyd, sy'n rhoi'r pŵer i swyddogion a swyddogion cymorth cymunedol yr heddlu wahardd unigolyn o'r ardal.

Wrth i'r cyfyngiadau barhau i lacio ac wrth i'r tywydd gynhesu, rydym yn parhau i annog pobl i fod yn synhwyrol a pharchu'r rheoliadau. Maent ar waith i'n cadw ni i gyd yn ddiogel.