Ymchwiliad ôl-ddigwyddiad yn dilyn protestiadau y tu allan i Orsaf Heddlu Bae Caerdydd.

Ymchwiliad ôl-ddigwyddiad yn dilyn protestiadau y tu allan i Orsaf Heddlu Bae Caerdydd.

 

Ym mis Ionawr, cynhaliwyd protestiadau bedair noson yn olynol y tu allan i Orsaf Heddlu Bae Caerdydd ar James Street.

 

Roedd y protestiadau mewn perthynas â marwolaeth Mohamud Hassan a oedd yn 24 oed.

 

Bu farw Mr Hassan mewn eiddo amlfeddiannaeth ar Heol Casnewydd yn y Rhath, toc wedi 10.30pm, ddydd Sadwrn, 9 Ionawr.

 

Cafodd ei gadw yn y ddalfa yng Ngorsaf Heddlu Bae Caerdydd y noson flaenorol.

 

Mae ei farwolaeth bellach yn destun ymchwiliad gan Swyddfa Annibynnol Ymddygiad yr Heddlu yn dilyn atgyfeiriad a wnaed ar unwaith gan Heddlu De Cymru.

 

Mae'r heddlu yn parhau i gydweithredu'n llawn ag ymchwiliad Swyddfa Annibynnol Ymddygiad yr Heddlu ac yn darparu gwybodaeth a deunyddiau, gan gynnwys deunydd fideo camera a wisgir ar y corff a deunydd teledu cylch cyfyng.

 

Mae datganiad diweddaraf Swyddfa Annibynnol Ymddygiad yr Heddlu ar gael yma:

 

https://policeconduct.gov.uk/news/update-investigation-death-mohamud-mohamed-hassan-cardiff-0

 

 

Rydym yn cydnabod yr effaith y mae marwolaeth Mr Hassan wedi’i chael ar y gymuned ehangach ac yn gwerthfawrogi bod pobl am i’w lleisiau gael eu clywed a’u bod am ddangos eu cefnogaeth i deulu a ffrindiau Mr Hassan.

 

Fel arfer, bydd gwasanaethau plismona yn gwneud popeth o fewn eu gallu i helpu pobl sy'n arfer yr hawl honno i gael eu clywed yn gyfreithlon.

 

Ond mae'r coronafeirws yn parhau i fod yn glefyd angheuol ac mae cyfyngiadau ar waith er mwyn ei atal rhag lledaenu.

 

Yn ystod y protestiadau ym mis Ionawr, ceisiodd swyddogion ymgysylltu â’r rhai a oedd yn bresennol i'w hatgoffa o'u rhwymedigaethau o dan ddeddfwriaeth gyfredol y Coronafeirws, gan gynnwys y gwaharddiad ar gwrdd â phobl y tu allan i’ch aelwyd a'r nod cyffredin, sef y dylai pawb gymryd cyfrifoldeb personol drwy ddilyn rheoliadau Llywodraeth Cymru i aros gartref.

 

Mae gennym ddyletswydd i ystyried yr holl ddeddfwriaeth berthnasol, ac mae Heddlu De Cymru wedi ceisio cynnal dull plismona cyson o ymgysylltu, esbonio ac annog, gan orfodi dim ond lle bo angen gwneud hynny pan fetho popeth arall, drwy gydol yr argyfwng iechyd cyhoeddus hwn.

 

Dilynwyd y dull hwn yn ystod y protestiadau ym Mae Caerdydd ar 12, 13, 14 a 15 Ionawr.

 

Rhoddwyd gwybod am un fenyw i'w gwysio am fynd yn groes i reoliadau COVID-19 ar ôl iddi drefnu digwyddiad awyr agored, sef protestiadau ym Mae Caerdydd ar ddwy o’r pedair noson, lle roedd dros 30 o bobl yn bresennol.

 

Rhoddwyd cyfle iddi naill ai dalu hysbysiad cosb benodedig o £500 neu ofyn am wrandawiad llys.

 

Cymerwyd y cam hwn er mwyn diogelu iechyd y cyhoedd yn ystod y pandemig byd-eang hwn.

 

Yn ystod y protestiadau, cafwyd tystiolaeth glir o droseddau eraill, heb fod yn gysylltiedig â mynd yn groes i reoliadau COVID-19 ac mae ein hymchwiliad ôl-ddigwyddiad wedi canolbwyntio ar y troseddau mwy difrifol o'u plith.

 

Lle ceir tystiolaeth o anhrefn neu drais, ni waeth beth yw’r digwyddiad, byddwn bob amser yn mynd ar drywydd y rhai sy’n gyfrifol er mwyn cymryd camau priodol.

 

Mae ymholiadau i’r protestiadau wedi bod yn mynd rhagddynt ac mae tri unigolyn wedi cael eu harestio.

 

* Arestiwyd dyn 30 oed o’r Rhath am 10.40am ar 4 Mawrth ar amheuaeth o affráe. Honnir iddo daflu nifer o daflegrau at swyddogion ac aelodau o’r cyhoedd. Mae wedi cael ei ryddhau ar fechnïaeth tra gwneir ymholiadau pellach.

 

* Arestiwyd dyn 19 oed o Grangetown am 9.20am ar 5 Mawrth. Mae wedi cael ei gyhuddo o ymosod ar un o weithwyr y gwasanaethau brys a defnyddio geiriau neu ymddygiad bygythiol ac mae disgwyl iddo ymddangos yn Llys Ynadon Caerdydd ar 23 Mawrth.

 

* Arestiwyd menyw 19 oed o Gasnewydd am 11am ar 5 Mawrth ar amheuaeth o ymosod ar un o weithwyr y gwasanaethau brys. Cyfaddefodd i’r drosedd, ymddiheurodd am ei hymddygiad a chafodd rybudd.