Saith yn cael eu dedfrydu i gyfanswm o 119 o flynyddoedd yn y carchar am lofruddiaeth greulon a ffyrnig Harry Baker

Mae saith unigolyn a gafodd eu dyfarnu'n euog am eu rhan mewn achos angheuol o drywanu bachgen yn ei arddegau mewn porthladd cynwysyddion diwydiannol yn y Barri yn 2019 wedi cael eu dedfrydu heddiw i gyfanswm o 119 o flynyddoedd yn y carchar.

Yn gynharach y mis hwn, daeth rheithgor i'r casgliad bod Peter McCarthy, Leon Clifford, Leon Symons a bachgen 17 oed – a all bellach gael ei enwi fel Brandon Liversidge ar ôl i'r barnwr godi cyfyngiadau adrodd a oedd sicrhau ei fod yn ddienw – yn euog o lofruddio Harry Baker, a oedd yn 17 oed, yn dilyn anghydfod dros gyffuriau.

Cafodd Lewis Evans, Ryan Palmer a Raymond Thompson eu dyfarnu'n euog o ddynladdiad.

Yn Llys y Goron Casnewydd heddiw (dydd Llun, Mawrth 29), rhoddodd Barnwr Justice Picken y dedfrydau canlynol:

• Leon Clifford, 23, 27 o flynyddoedd
• Leon Symons, 22, 28 o flynyddoedd
• Peter McCarthy, 38, 27 o flynyddoedd
• Brandon Liversidge, 17, 20 blynedd 
• Lewis Evans, 62, pedwar blynedd 
• Ryan Palmer, 34, 11 blynedd
• Raymond Thompson, 48, chwech blynedd.

Ar ôl y ddedfryd, dywedodd y Ditectif Cwnstabl Bethan Watkins:

“Roedd hwn yn achos hir a chymhleth gyda nifer o ddiffynyddion, ac rwy'n ddiolchgar i'r rheithgor am y diwydrwydd a'r ymrwymiad y gwnaethant eu dangos drwy gydol yr achos ac am roi dyfarniadau sy'n rhoi cyfiawnder i Harry ac aelodau ei deulu, sydd wedi cael ergyd drom yn sgil y digwyddiad.

“Ni fydd unrhyw ddedfryd yn ddigon hir iddynt; cafodd dyfodol Harry a chyfle iddo newid ei fywyd eu dwyn oddi wrtho, ac mae ei deulu a'i ffrindiau wedi colli mab, brawd a ffrind hoffus.

“Maent wedi dangos cryfder ac urddas aruthrol drwy gydol yr ymchwiliad a'r achos llys dilynol ac rydym yn estyn ein cydymdeimlad iddynt o hyd wrth iddynt ddechrau ceisio ailadeiladu eu bywydau.

“Ni roddodd y diffynyddion unrhyw ystyriaeth i fywyd ar noson yr ymosodiad, ac mae'r diffyg parch ac edifeirwch hyn wedi parhau drwy gydol yr achos hwn. Rwy'n gobeithio y bydd y dedfrydau sylweddol a roddwyd iddynt heddiw yn rhoi amser i bob un ohonynt fyfyrio ar y distryw diwrthdro y mae eu gweithredoedd dideimlad a threisgar wedi'i achosi.

“Rwy'n gobeithio bod y dedfrydau hefyd yn anfon rhybudd i'r rhai sy'n cymryd rhan mewn gweithgarwch cyffuriau anghyfreithlon a throseddau'n ymwneud â chyllyll; mae mynd i'r afael â throseddau o'r fath yn flaenoriaeth i Heddlu De Cymru a byddwn yn gweithio'n ddi-baid wrth ymchwilio i'r rhai sy'n cymryd rhan, mynd i'r afael â nhw a dod â nhw gerbron llys barn."