Protestwyr a phobl yn mynd i bartïon a mannau o harddwch ymhlith mwy na 350 o bobl a gafodd ddirwy dros y penwythnos

Roedd protestwyr a phobl yn mynd i bartïon ac yn ymgasglu mewn mannau o harddwch ymhlith mwy na 370 o bobl a gafodd ddirwy gan Heddlu De Cymru am dorri cyfyngiadau'r coronafeirws y penwythnos hwn.

Er gwaethaf y ffaith bod Cymru gyfan o dan gyfyngiadau Lefel Rhybudd 4 Llywodraeth Cymru o hyd, teithiodd llawer o bobl i draethau a pharciau ac ymgasglodd i yfed yn yr awyr agored o ganlyniad i'r tywydd braf. Fel mewn wythnosau blaenorol, bu swyddogion hefyd yn ymateb i nifer mawr o bartïon mewn tai.

Ymhlith y rhai a gafodd ddirwy roedd:

• 13 o bobl a gafodd ddirwy am deithio'n ddiangen i Lanfa Penarth;
• Pedwar unigolyn a deithiodd o Gwm Rhondda i Aberogwr;
• Dau unigolyn a gafodd eu stopio ar yr A48 ym Mhen-y-bont ar Ogwr ar y ffordd o Gasnewydd i Abertawe er mwyn mynd i'r traeth;
• 105 o ddirwyon i bobl a aeth i un o wyth parti mewn tai yn ardal Cathays;
• 13 o bobl a aeth i ddau barti yn y Barri;
• 14 o bobl mewn dau barti mewn tai yn ardal Trelái;
• 11 o bobl a oedd wedi teithio o wahanol ardaloedd, gan gynnwys Casnewydd, Rhondda Cynon Taf, Caerdydd, Swydd Warwig a Chofentri, er mwyn ymweld â Southerndown;
• Pedwar unigolyn a ganfuwyd mewn tafarn yn Llandaf;
• Chwe unigolyn a oedd wedi ymgasglu mewn tŷ ym Mhentre'r Eglwys;
• 10 o bobl mewn dau wahanol gynulliad ym Merthyr Tudful;
• Chwe unigolyn a oedd wedi ymgasglu mewn tŷ yn Sarn, Pen-y-bont ar Ogwr;
• Pedwar unigolyn a deithiodd i fynd â'u ci am dro yng Nghyfarthfa;
• Dau unigolyn a deithiodd o Gasnewydd i Borthcawl am ddiwrnod bant;
• Pum unigolyn o aelwydydd gwahanol a gafodd eu stopio wrth deithio mewn car i barti mewn tŷ yn y Beddau;
• Grŵp o bum dyn a oedd wedi teithio o Loegr i fynd i barti mewn tŷ yn Brynmill, Abertawe;
• 11 o bobl a aeth i barti mewn tŷ yng nghanol dinas Abertawe;
• 12 o bobl a gafodd ddirwy am deithio'n ddiangen i Fae'r Freichled yn y Mwmbwls;
• Tri unigolyn a oedd wedi ymgasglu mewn fflat yn Abertawe i gael torri eu gwallt;
• Cwpl a oedd wedi teithio i Abertawe i aros dros nos mewn cerbyd gwersylla;
• Pum menyw a aeth i barti mewn tŷ ym Mhorth Tennant, Abertawe;
• Tair menyw a oedd yn cael lliwio eu gwallt mewn maes parcio ym Mae Langland.

Cyflwynwyd adroddiad gwysio i 10 o bobl a aeth i brotestiadau yng nghanol dinas Abertawe am dorri rheoliadau COVID-19, ac mae ymholiadau ar ôl digwyddiad yn mynd rhagddynt mewn perthynas â nifer o ddigwyddiadau. Gwnaed nifer o atgyfeiriadau ar gyfer camau dilynol ac ymchwilio hefyd i'r Timau Gorfodi ar y Cyd sy'n gweithredu ym mhob ardal awdurdod lleol yn Ne Cymru.

Dywedodd y Prif Uwcharolygydd, Andy Valentine:

“Rydym yn gwybod bod yr ychydig fisoedd diwethaf wedi bod yn heriol iawn i'n cymunedau, a gallwn ddeall fod pobl wedi bod yn awyddus i deithio allan o'u cynefin i fwynhau'r tywydd braf dros y penwythnos.

"Ond y gwir yw, mae'r coronafeirws yn parhau'n fygythiad gwirioneddol i bob un ohonom, ac mae rheswm da dros y ffaith bod Cymru gyfan o dan gyfyngiadau Lefel 4 o hyd.

“Mae'r mwyafrif helaeth ohonom wedi gwneud aberth go iawn i gefnogi'r ymdrech genedlaethol; pe byddem yn rhoi'r gorau iddi nawr, mae risg y byddem yn dadwneud popeth a wnaed gennym hyd yn hyn.

"Mae'r ffaith bod y brechlyn yn cael ei gyflwyno a'r cynlluniau i lacio'r cyfyngiadau a gyhoeddwyd yn ddiweddar yn rhoi gobaith mawr ei angen i ni, ond byddem yn annog ein cymunedau lleol i barhau i ddilyn y rheolau sydd ar waith ar hyn o bryd.

"Nid ein dewis ni yw gorfodi'r rheolau hyn; byddai'n well gennym pe bai pawb yn gwneud y peth iawn. Ond rydym yn parhau i bwysleisio y bydd y bobl hynny sy'n torri'r rheolau yn amlwg neu dro ar ôl tro yn wynebu camau gorfodi.”