Ymchwiliad i lofruddiaeth Wenjing XU: Heddlu yn galw ar yrwyr i edrych ar eu camerâu dashfwrdd

Mae Tîm Ymchwiliadau Troseddau Mawr Heddlu De Cymru yn parhau â'i ymchwiliad i lofruddiaeth Wenjing XU, 16 oed, a fu farw yn dilyn digwyddiad yn siop tecawê Blue Sky ar Stryd Baglan, Treorci ddydd Gwener (5 Mawrth, 2021).

Mae swyddogion yn galw ar yrwyr a oedd yn teithio ar hyd Stryd Baglan rhwng 11.50am a 12.15pm ddydd Gwener (5 Mawrth, 2021) i edrych ar unrhyw fideo o gamera dashfwrdd sydd ganddynt a allai fod wedi recordio digwyddiadau y tu allan i'r eiddo rhwng yr amseroedd hyn.

Dywedodd y Ditectif Brif Arolygydd Mark Lewis: “Mae gennym dîm dynodedig o swyddogion sydd wedi bod yn cynnal ymholiadau helaeth yn yr ardal a hoffwn ddiolch i bawb sydd wedi cysylltu hyd yn hyn.

“Gwyddom fod y digwyddiad wedi cymryd lle ar adeg brysur iawn o'r dydd pan fyddai llawer o geir wedi gyrru heibio Blue Sky sy'n rhan ganolog o'n hymholiadau, ac mae'n debygol y bydd gan sawl un o'r bobl hynny fideo o gamera dashfwrdd a allai ein helpu.”

Mae'r ddau ddyn a gafodd eu harestio mewn cysylltiad â'r digwyddiad yn yr ysbyty o hyd – mae'r ddau mewn cyflwr sefydlog.

Mae swyddogion sydd wedi cael hyfforddiant arbenigol yn parhau i gefnogi teulu Wenjing yn ystod y cyfnod anodd iawn hwn.

Ychwanegodd y Ditectif Brif Arolygydd Mark Lewis: “Mae'n gyfnod anodd a thrawmatig dros ben i deulu Wenjing ar hyn o bryd. Gwn fod dyfalu a rhannu sïon wedi bod ar-lein, felly byddwn yn annog pobl i ddangos parch a pheidio â chynhyrfu pethau. Rydym yn monitro llwyfannau agored a byddwn yn mynd i'r afael yn gadarn ag unrhyw un fydd yn cyflawni troseddau.”

Gall tystion neu unrhyw un sydd â gwybodaeth gysylltu drwy ddefnyddio'r Porth Cyhoeddus ar gyfer Digwyddiadau Mawr: https://mipp.police.uk/operation/62SWP21B30-PO1

Fel arall, gallant gysylltu â Heddlu De Cymru ar 101 neu ffonio Taclo'r Tacle yn ddienw ar 0800 555 111 gan ddyfynnu cofnodrif *077519.