Gorfodi rheoliadau COVID-19: Mwy na 240 o bobl yn cael dirwy wrth i'r heddlu amharu ar gynulliadau dan do a phartïon mewn tai

Roedd pobl a oedd yn torri cyfyngiadau Llywodraeth Cymru ar gynulliadau dan do ymhlith y 240 o bobl a oedd wedi cael dirwy gan Heddlu De Cymru ar y penwythnos.

Rhwng nos Wener a dydd Sul, cafodd yr heddlu fwy na 400 o alwadau yn ymwneud ag achosion posibl o dorri cyfyngiadau COVID-19, a chafodd 109 o ddirwyon eu cyflwyno yn rhanbarth Morgannwg Ganol yn unig. Mae'r rhanbarth yn cwmpasu Pen-y-bont ar Ogwr, Rhondda Cynon Taf a Merthyr Tudful, sydd wedi gweld cynnydd mewn heintiau dros yr wythnosau diwethaf.

Ymhlith y 243 o bobl a gafodd ddirwy am dorri rheoliadau'r coronafeirws yn fwriadol roedd y canlynol:

• Chwe unigolyn mewn parti mewn tŷ yn y Gurnos, Merthyr Tudful;
• Saith unigolyn mewn parti mewn tŷ ym Merthyr Tudful;
• 14 unigolyn a oedd wedi ymgynnull mewn cyfeiriad ym Merthyr Tudful i wylio gêm Ffrainc yn erbyn Cymru ar daflunydd;
• 11 unigolyn mewn cyfeiriad ym Mhenarth;
• Chwe unigolyn a aeth i barti mewn tŷ yn ardal Trowbridge, Caerdydd;
• Pum unigolyn a aeth i barti mewn cyfeiriad yng Nglan yr Afon, Caerdydd;
• Naw unigolyn mewn cyfeiriad yn ardal Cathays, Caerdydd;
• Pum unigolyn a aeth i barti mewn tŷ yn ardal Butetown, Caerdydd;
• 13 o unigolion a aeth i barti mewn tŷ yn ardal Cathays, Caerdydd;
• Tair menyw o aelwydydd gwahanol y daethpwyd o hyd iddynt mewn cerbyd ar ystad ddiwydiannol ym Mhontardawe, Cwm Tawe;
• Pedwar unigolyn a aeth i barti mewn tŷ yng Nghlydach, Abertawe;
• Pum unigolyn a aeth i barti yn Ystalyfera, Cwm Tawe;
• Cwpwl a oedd wedi caniatáu i grŵp o bobl ifanc yn eu harddegau i ymgynnull yn eu cyfeiriad ym Mhenlan, Abertawe.
• Pum unigolyn a aeth i barti mewn tŷ yn St Thomas, Abertawe.

Mae'r Timau Gorfodi ar y Cyd ym mhob ardal awdurdod lleol hefyd yn parhau i gymryd camau gorfodi, yn y fan a'r lle ac yn ôl-weithredol. Ddydd Sadwrn, cyflwynodd Tîm Gorfodi ar y Cyd Caerdydd 27 o hysbysiadau cosb benodedig i bobl a aeth i bedwar parti yn ardal Cathays. Yn Abertawe, mae tafarn wedi cael ei chyfeirio at dimau trwyddedu yn dilyn pryderon ynghylch niferoedd uchel o bobl yn ymgynnull ac yn yfed yn y lleoliad.

Cafodd nifer o orchmynion cyfeirio ymddygiad gwrthgymdeithasol eu cyflwyno hefyd ar ôl i'r heddlu amharu ar amrywiaeth o bartïon mewn tai a chynulliadau yn cynnwys pobl o dan 18 oed ar draws ardal yr heddlu, gan gynnwys un yn y Gurnos, Merthyr Tudful, lle roedd tua 30 o bobl ifanc yn bresennol.