Swyddogion yn atal miloedd o bunnoedd rhag mynd i bocedi twyllwyr a'i ddychwelyd i ddioddefwr diolchgar

Mae'r Heddlu ym Mhenarth wedi atal parsel yn cynnwys mwy na £4k o arian parod, a oedd eiddo i bensiynwr, a oedd ar ei ffordd i dwyllwyr yn Llundain.

Roedd yr arian yn eiddo i Anne, menyw leol 80 oed, a oedd wedi cael galwad ffôn dwyllodrus gan unigolion yn honni eu bod yn gweithio i'w banc.

Gwnaethant ddweud wrth Anne fod arian wedi cael ei gymryd o'i chyfrif ond y gallent ei gael yn ôl iddi pe bai'n anfon arian atynt.

Ychydig oriau ar ôl iddi bostio'r arian, sylweddolodd Anne ei bod wedi cael ei thwyllo a chysylltoedd â Heddlu De Cymru.

Pan aeth PC Jay Monk a PC Nicholas Beynon (yn y llun) i gartref Anne, dywedodd wrthynt ei bod wedi codi £4,250 o arian parod o’i chyfrif banc, ei roi mewn blwch a’i anfon drwy wasanaeth dosbarthiad arbennig y Post Brenhinol i gyfeiriad yn Llundain.

Gan esbonio'r hyn a ddigwyddodd nesaf nos Wener, 15 Ionawr, dywedodd Rhingyll yr Heddlu Andy Mason:

"Gweithredodd PC Monk a PC Beynon yn gyflym a gan ddefnyddio'r rhif olrhain, gwelsant drwy wefan y Post Brenhinol fod y parsel yn gadael Caerdydd am Lundain.

"Aethant i'r swyddfa ddidoli ar Heol Penarth tua 10pm gan obeithio cael rhif cyswllt y gyrrwr neu o leiaf anfon neges i safle'r Post Brenhinol yn Llundain.

"Fodd bynnag, am eu bod wedi gweithredu mor gyflym, llwyddon nhw i gyrraedd y parsel cyn i'r gyrrwr adael.

"Pe bai'r parsel wedi gadael am Lundain, mae'n bosibl y byddem wedi gorfod ceisio ei olrhain drwy'r system nes byddai'n rhy hwyr ac wedi cael ei ddosbarthu.

"Cafodd PC Monk a PC Beynon y pleser o ddychwelyd yr arian at Anne a oedd wrth ei bodd.”

Rhoddwyd gwybod i'r Heddlu Metropolitanaidd ac Action Fraud am y mater.

Mae PCSOs lleol bod yn ymweld ag Anne ar ôl siarad â'i theulu ac mae ein Tîm Atal Troseddau hefyd wedi ymweld â hi i roi cyngor iddi ar sut i adnabod sgamiau.

Gall twyllwyr geisio eich twyllo chi i roi arian iddynt mewn nifer o ffyrdd.

Gall y rhain gynnwys:

• am wneud gwaith diangen ar eich cartref
• i glirio dyledion honedig
• fel rhan o ymgyrch gorfodi’r gyfraith honedig

Ni fydd yr heddlu na banciau byth yn gofyn am arian gennych.

Ni fyddant yn gofyn i chi drosglwyddo arian rhwng cyfrifon.

Ni fyddant yn gofyn i chi ymuno ag ymchwiliad cudd.

Ni fyddant yn eich gorfodi i dalu drwy fygwth eich arestio.

Gofalwch am deulu, ffrindiau a chymdogion drwy rannu'r cyngor hwn. I roi gwybod am achosion o dwyll ffoniwch 101. Mewn argyfwng ffoniwch 999.