Rhoddwyd mwy na 200 o ddirwyon am dorri rheolau COVID-19 yn Ne Cymru dros y penwythnos

Rhoddwyd cyfanswm o 240 o ddirwyon yn Ne Cymru dros y penwythnos wrth i swyddogion barhau i gymryd camau i gosbi'r rhai sy'n torri deddfwriaeth y coronafeirws.

Er bod y mwyafrif helaeth yn parhau i gefnogi'r mesurau a roddwyd ar waith er mwyn helpu i arafu lledaeniad y feirws, ataliodd swyddogion Heddlu De Cymru nifer o bartïon mewn tai a phobl yn ymgynnull, gan gymryd camau gorfodi i ddelio ag achosion o dorri cyfyngiadau teithio.

Ymhlith y dirwyon a roddwyd rhwng dydd Gwener, 29 Ionawr a dydd Sul, 31 Ionawr, roedd:

• 20 yn dilyn parti mewn tŷ yn Cathays, gyda rhai o'r unigolion a oedd yn bresennol wedi teithio o Abertawe;
• Naw yn dilyn parti mewn tŷ yn Llanbydderi, Bro Morgannwg;
• Wyth yn dilyn parti mewn tŷ yn Cathays;
• 13 yn dilyn parti mewn tŷ yn Ystum Taf;
• Chwech yn dilyn parti mewn tŷ yn Y Tyllgoed;
• Chwech yn dilyn parti mewn tŷ yn Nhrelái;
• Pump yn dilyn parti mewn tŷ yn Cathays;
• Pedwar ar ôl i bobl ymgynnull mewn tŷ yn Y Rhws, Bro Morgannwg;
• Tri i unigolion a oedd yn teithio o Swydd Rhydychen i Ben-coed ar gyfer seremoni grefyddol;
• Wyth i grŵp o oedolion a oedd yn yfed alcohol mewn gerddi cyhoeddus yn Llandaf;
• 20 yn dilyn parti mewn tŷ yn Y Maerdy, Cwm Rhondda;
• Tri i grŵp o oedolion a oedd yn yfed alcohol mewn maes parcio ym Merthyr Tudful;
• Saith yn dilyn parti mewn tŷ yn Nhwynyrodyn, Merthyr Tudful;
• Wyth i grŵp o aelwydydd gwahanol yng Nghaerdydd a stopiwyd ym Merthyr Tudful ar eu ffordd adref o Ben y Fan;
• Chwech yn dilyn parti mewn tŷ ym Mherthcelyn, Aberpennar;
• Dwy ddirwy am deithio i Bentref Hamdden Merthyr Tudful yn ddiangen o'r Maerdy, RhCT;
• Saith i grŵp a oedd wedi ymgynnull mewn maes parcio ym Mhenyard, Merthyr Tudful;
• Dau am deithio i Dreherbert yn ddiangen;
• Pedwar i grŵp o ffrindiau o gyfeiriadau gwahanol a gafodd eu stopio mewn cerbyd ym Mhentre'r Eglwys;
• Un i drefnydd parti pen-blwydd annisgwyl yng Nghlydach, Abertawe;
• Pedwar i feicwyr oddi ar y ffordd yng Nglyn-nedd.

Cynhaliwyd gwiriadau rhagweithiol ar gerbydau hefyd ledled ardal yr heddlu, gan gynnwys Rhiwbeina, Pontcanna a Phorthcawl, a rhoddwyd nifer o ddirwyon am achosion o deithio'n ddiangen.

Rhoddwyd y dirwyon diweddaraf oriau ar ôl i'r Prif Weinidog Mark Drakeford gadarnhau y byddai cyfyngiadau Lefel Rhybudd 4 yn parhau am dair wythnos arall.  Roedd y dirwyon hefyd yn dilyn wythnos o gamau gorfodi pellach a arweiniodd at nifer o achosion tebyg o dorri'r rheolau, gan gynnwys saith o bobl yn ymgynnull mewn bar Shisha yn Abertawe, a chwech o bobl yn hyfforddi mewn clwb bocsio ym Maesteg.

Dywedodd y Prif Uwcharolygydd, Andy Valentine: “Cymerwyd y camau gorfodi diweddaraf hyn yn yr oriau a'r dyddiau yn dilyn cyhoeddiad diweddaraf Llywodraeth Cymru.

“Er ein bod yn deall yn iawn pa mor heriol y bu'r cyfyngiadau hyn, mae'r union ffaith eu bod wedi'u hymestyn yn dangos nad nawr yw'r amser i orffwys ar ein rhwyfau. Mae achosion amlwg o dorri'r rheolau, megis yr achosion a welwyd gan ein swyddogion dros y penwythnos, yn peryglu'r cynnydd a wnaed gan y mwyafrif helaeth sy'n dilyn y rheolau, ac yn rhoi straen ychwanegol ar ein gwasanaethau iechyd sydd eisoes dan bwysau.

“Ni ellir goddef y fath achosion difrifol o dorri'r rheolau, a byddwn yn parhau i ymateb i bryderon gan ein cymunedau, cynnal patrolau rhagweithiol a gweithio'n agos gyda'n partneriaid yn yr awdurdodau lleol ar y Timau Gorfodi ar y Cyd i sicrhau bod y rhai sy'n torri'r rheolau'n fwriadol neu dro ar ôl tro yn wynebu camau gorfodi.”