Cyflwynwyd 138 o ddirywion dros y penwythnos i bobl wnaeth torri cyfyngiadau Coronafeirws Llywodraeth Cymru

Cafodd cyfanswm o 138 o hysbysiadau cosb benodedig eu cyflwyno gan Heddlu De Cymru dros y penwythnos, wrth i nifer bach o bobl barhau i dorri cyfyngiadau Coronafeirws Llywodraeth Cymru.

Cafodd y mwyafrif o ddirwyon eu cyflwyno i bobl am gynnull neu gael partïon mewn tai, a gwnaeth patrolau rhagweithiol o barciau poblogaidd, mannau prydferth a chyrchfannau i dwristiaid hefyd arwain at gyflwyno nifer o gosbau am dorri cyfyngiadau teithio.

Ymhlith y dirwyon a gyflwynwyd dros y penwythnos roedd y canlynol:

• Dyn a deithiodd o Fro Morgannwg i Bort Talbot i brynu cwch, a gafodd ei ddal ar ôl cael twll yn un o'i deiars ar y ffordd adref;
• Dau ddyn o Fro Morgannwg a deithiodd i Dubai am wyliau;
• Pum oedolyn ifanc a gafodd eu dal yn yfed mewn car ym maes parcio archfarchnad yng Nghaerdydd;
• Cyflwynwyd 27 o hysbysiadau ar gyfer pedwar parti gwahanol mewn tai yn y Barri a Chaerdydd;
• Pedair menyw ar gyfer parti pen-blwydd yn y Barri;
• Cafodd pum oedolyn eu dal yng nghegin tŷ ym Mhort Talbot gan swyddogion ar batrôl;
• Saith unigolyn ar feiciau cwad yn Llansawel a oedd wedi gadael eu cartrefi heb esgus rhesymol;
• Deg dirwy ar gyfer dau barti gwahanol mewn tai a chynulliadau yn Abertawe.

Gwnaed nifer o atgyfeiriadau hefyd ar gyfer camau dilynol gan y Timau Gorfodi ar y Cyd, sy'n cynnwys swyddogion yr heddlu a swyddogion y cyngor ac sy'n gweithredu ym mhob ardal awdurdod lleol yn ne Cymru.

Dywedodd y Prif Uwcharolygydd, Andy Valentine:

"Mae'r mwyafrif helaeth o bobl yn parhau i wneud y peth iawn ac yn gwneud aberthau i ddiogelu eu hunain, eu hanwyliaid a'r GIG. Yn anffodus mae nifer bach o bobl yn torri'r rheolau ac yn wynebu camau gorfodi.

“Ni chaiff achosion o dorri'r rheolau yn fwriadol eu goddef, a byddwn yn parhau i ymateb i bryderon gan ein cymunedau, cynnal patrolau rhagweithiol a gweithio'n agos gyda'n partneriaid yn yr awdurdodau lleol ar y Timau Gorfodi ar y Cyd er mwyn sicrhau bod pobl yn dilyn y rheolau."