Cannoedd yn fwy o ddirwyon wedi'u cyflwyno dros y penwythnos wrth i nifer bach o bobl barhau i dorri rheoliadau Covid-19

Cafodd 308 o hysbysiadau cosb benodedig pellach eu cyflwyno yn ne Cymru dros y penwythnos, wrth i nifer bach o bobl barhau i dorri cyfyngiadau Coronafeirws Llywodraeth Cymru.

Cafodd y mwyafrif helaeth o ddirwyon eu cyflwyno i bobl am gynnull neu gael partïon mewn tai, a gwnaeth patrolau rhagweithiol o barciau poblogaidd, mannau prydferth a chyrchfannau i dwristiaid hefyd arwain at gyflwyno nifer o gosbau am dorri cyfyngiadau teithio.

Ymhlith y dirwyon a gyflwynwyd dros y penwythnos roedd y canlynol:

• 61 o ddirwyon i bobl mewn saith parti mewn tŷ ar wahân yn ardal Cathays;
• Tair dirwy i ddynion a oedd wedi cynnull mewn fflat yng nghanol tref y Barri;
• Pedair dirwy i bobl a oedd wedi cynnull mewn tŷ yn y Barri;
• Dwy ddirwy i fenywod a oedd wedi llogi fflat yn y Sblot i 'ymlacio';
• Tair dirwy i ddynion a geisiodd ffoi ar ôl iddynt gael eu dal yn chwarae gêm bêl-droed ym Mharc Bute;
• Naw dirwy i bobl mewn parti mewn tŷ yn Nhredelerch;
• 10 dirwy i bobl mewn parti mewn tŷ yn y Tyllgoed;
• Saith dirwy i bobl mewn parti pen-blwydd 60 oed mewn tŷ yn y Barri;
• Naw dirwy i bobl mewn parti mewn tŷ yn Llanrhymni;
• Un ddirwy i fenyw a oedd wedi gwahodd technegydd ewinedd symudol i'w chartref yn y Tyllgoed;
• Pum dirwy i grŵp a oedd wedi cynnull i wylio'r rygbi yng Nghilâ, Abertawe;
• Chwe dirwy i bobl a oedd wedi cynnull mewn cyfeiriad ym Mhenlan, Abertawe.

Cynhaliwyd patrolau gwelededd uchel – llawer ohonynt mewn ymateb i bryderon a godwyd gan drigolion lleol – mewn amrywiaeth o ardaloedd, gan gynnwys Llynnoedd Cosmeston a Marina Penarth. Ym Mhorthcawl, arweiniodd ymgyrch i atal pobl rhag teithio'n ddiangen at gyflwyno 11 o ddirwyon. Hefyd, cafodd taflenni yn atgoffa modurwyr am y cyfyngiadau eu rhoi ar ddwsinau o gerbydau wedi'u parcio. Cafodd car ei atafaelu o dan Adran 165 o'r Ddeddf Traffig Ffyrdd hefyd.

Gwnaed nifer o atgyfeiriadau ar gyfer camau dilynol gan y Timau Gorfodi ar y Cyd, sy'n cynnwys swyddogion yr heddlu a swyddogion y cyngor ac sy'n gweithredu ym mhob ardal awdurdod lleol yng Nghymru.

Dywedodd y Prif Uwcharolygydd, Andy Valentine:

"Mae'r mwyafrif helaeth o bobl yn parhau i wneud y peth iawn ac yn gwneud aberthau i ddiogelu eu hunain, eu hanwyliaid a'r GIG. Ni allwn fforddio dadwneud yr holl gynnydd a wnaed hyd yma.

"Ni chaiff achosion o'r fath o dorri'r rheolau yn fwriadol eu goddef, a byddwn yn parhau i ymateb i bryderon gan ein cymunedau, cynnal patrolau rhagweithiol a gweithio'n agos gyda'n partneriaid yn yr awdurdodau lleol ar y Timau Gorfodi ar y Cyd er mwyn sicrhau ein bod yn cymryd camau gorfodi yn erbyn y rheini sy'n torri'r rheolau yn amlwg neu dro ar ôl tro."