Barbwr, unigolion a aeth i bartïon ac unigolion a wnaeth rannu car ymhlith mwy na 250 o bobl a gafodd ddirwy am dorri rheoliadau COVID-19 dros y penwythnos

Yn dilyn cadarnhad gan Lywodraeth Cymru ddydd Gwener (Chwefror 19) na fyddai Cyfyngiadau Lefel Rhybudd 4 yn newid llawer yng Nghymru am dair wythnos arall, parhaodd Heddlu De Cymru i ymateb i nifer mawr o achosion o dorri'r rheoliadau y cafodd wybod amdanynt dros y penwythnos.

Rhwng dydd Gwener a dydd Llun, cafodd yr heddlu dros 550 o alwadau yn ymwneud â COVID-19 - cynnydd o 20% o gymharu â'r penwythnos blaenorol - ac er bod gan lawer o'r galwadau y bwriad gorau ond nad oedd yr achosion y cyfeiriwyd atynt yn torri'r rheoliadau, bu'n rhaid i swyddogion gyflwyno 278 o ddirwyon am bartïon, cynulliadau, teithio i Gymru a rhannu ceir.

Ymhlith yr achosion a oedd yn agored i gamau gorfodi am dorri rheoliadau COVID-19 oedd y canlynol:

• Barbwr yn gweithio o'i gartref ym Mhen-y-bont ar Ogwr, ynghyd â dau gwsmer;
• Saith unigolyn a oedd wedi mynychu parti mewn tŷ yn Nhonypandy a oedd wedi teithio o Gasnewydd, Caerdydd, Abertawe, Pont-y-pŵl a Wolverhampton;
• Wyth unigolyn a oedd wedi mynychu parti mewn tŷ ym Maesteg;
• Pum unigolyn a oedd wedi mynychu cynulliad yn Nhrefforest;
• Naw unigolyn a oedd wedi mynychu parti mewn tŷ yn Aberpennar;
• Saith oedolyn a oedd wedi mynychu parti mewn fflat yn Adamsdown gyda'u plant;
• Tri unigolyn a oedd wedi mynychu cynulliad mewn tŷ yng Ngabalfa;
• Pedwar unigolyn a oedd yn teithio mewn car a oedd yn destun gwiriad cerbyd yng nghanol dinas Caerdydd; cafodd y car hefyd ei atafaelu a rhoddwyd gwybod i'r awdurdodau bod y perchennog yn gyrru heb yswiriant;
• 47 o unigolion a oedd wedi mynychu pum parti mewn tŷ a chynulliadau gwahanol yn ardal Cathays;
• 14 o unigolion am barti mewn tŷ yng Nglan yr Afon;
• Chwe unigolyn am barti pen-blwydd rhywun yn 17 oed yn Nhreganna;
• Pedwar aelod o dri theulu gwahanol a oedd wedi ymgynnull mewn cyfeiriad yn Nhreganna;
• Pum unigolyn a oedd wedi mynychu parti pen-blwydd rhywun yn 30 oed mewn llety a oedd wedi'i logi yn Sain Tathan, Bro Morgannwg, yr oedd un unigolyn wedi teithio o Swydd Efrog i fod yn bresennol;
• 10 o unigolion am ddau barti mewn tai gwahanol yn Grangetown;
• Chwech unigolyn am barti mewn tŷ ym Mhentwyn;
• Saith unigolyn am barti mewn tŷ yn Nhrelái;
• Pedwar dyn a welwyd yn gadael safle busnes yng nghanol dinas Abertawe;
• Saith unigolyn a oedd wedi mynychu parti ym Mlaendulais, Castell-nedd.

Mae ymholiadau ôl-ddigwyddiad hefyd yn mynd rhagddynt gyda phartneriaid, gan gynnwys y Timau Gorfodi ar y Cyd, prifysgolion ac awdurdodau lleol, mewn perthynas â nifer o ddigwyddiadau, a chaiff camau ôl-weithredol eu cymryd lle y bo'n angenrheidiol ac yn briodol.

Gwnaeth Prif Uwcharolygydd Andy Valentine, sy'n arwain ymateb Heddlu De Cymru i'r pandemig, ganmol y rheini sy'n parhau i gefnogi'r ymdrech gyfunol i arafu lledaeniad y feirws ac sy'n mynd yn fwyfwy rhwystredig â'r nifer bach o bobl sy'n torri'r rheoliadau.

Ychwanegodd Prif Uwch-arolygydd Valentine:

"Ni chaiff achosion o dorri'r rheolau yn fwriadol eu goddef, a byddwn yn parhau i ymateb i bryderon gan ein cymunedau, cynnal patrolau rhagweithiol a gweithio'n agos gyda'n partneriaid yn yr awdurdodau lleol ar y Timau Gorfodi ar y Cyd er mwyn sicrhau ein bod yn cymryd camau gorfodi yn erbyn y rheini sy'n torri'r rheoliadau yn amlwg neu dro ar ôl tro."