22 o bobl wedi'u harestio mewn ymgyrch llinellau cyffuriau

Arestiwyd 22 o bobl yn ystod ymgyrch ddwys yn targedu delwyr cyffuriau yn Abertawe, Castell-nedd a Phort Talbot.

Roedd yr ymgyrch yn cynnwys mwy o batrolau gan swyddogion mewn dillad plaen. Cafodd saith warant eu gweithredu a chafodd cyffuriau Dosbarth A eu tynnu oddi ar ein strydoedd gan gynnwys 1.8kg o sylwedd yr amheuwyd ei fod yn cocên a 200g o heroin. Cafodd gynnau taser a bron £11,000 o arian parod eu hatafaelu hefyd. Cafodd sylweddau yr amheuwyd mai crac cocên a heroin oeddent â gwerth stryd o tua £30,000 eu hatafaelu hefyd o gyfeiriad yng Nghlydach.

Mae 13 o'r bobl a arestiwyd eisoes wedi cael eu cyhuddo o droseddau, gan gynnwys:

• Menyw 47 oed a gafodd ei chyhuddo o ymwneud â chyflenwi cyffuriau Dosbarth A a dyn ifanc 17 oed a gafodd ei gyhuddo o ddau achos o feddu ar gyffuriau Dosbarth A gyda'r bwriad o'u cyflenwi yn dilyn gweithredu gwarant yn Sgeti;
• Dyn 54 oed a dyn 22 oed a gafodd eu cyhuddo o feddu ar gyffuriau Dosbarth A gyda'r bwriad o'u cyflenwi, a chaffael neu ddefnyddio eiddo troseddol yn ogystal â chyhuddiadau'n ymwneud â meddu ar ynnau taser a dryll aer yn dilyn gweithredu gwarant yn ardal Brynhyfryd;
• Dyn 40 oed a gafodd ei gyhuddo ar ôl gwrthod stopio i swyddogion yr heddlu ac wedyn defnyddio ei gerbyd i fwrw i mewn i gerbydau'r heddlu. Cafodd ei gyhuddo o feddu ar gyffuriau Dosbarth A gyda'r bwriad o'u cyflenwi, nifer o droseddau gyrru a phedwar achos o ymosod ar weithiwr brys. Cafodd menyw 30 oed ei chyhuddo o feddu ar gyffuriau gyda'r bwriad o'u cyflenwi hefyd.

Dywedodd y Ditectif Rhingyll Andrew Price o uned troseddau cyfundrefnol yr heddlu, “Mae Heddlu De Cymru wrthi bob dydd yn gweithredu i fynd i'r afael â'r diflastod y gall cyffuriau eu hachosi yn ein cymunedau. Roedd yr ymgyrch ddwys yn cyfuno gwybodaeth a sgiliau sawl adran o fewn y sefydliad i dargedu delwyr llinellau cyffuriau yn benodol.

“Mae'n bwysig pwysleisio bod gan bob un ohonom rôl i'w chwarae er mwyn cadw ein hardaloedd lleol yn ddiogel rhag delio mewn cyffuriau, a'r cam-fanteisio a thrais gan gangiau sy'n gysylltiedig â hynny, ac rwy'n annog y gymuned i'n cefnogi er mwyn cael gwared ar y broblem hon.
“Os byddwch yn amau bod pobl yn delio mewn cyffuriau neu os byddwch yn poeni bod person ifanc neu oedolyn sy'n agored i niwed wedi cael ei dargedu gan grŵp troseddau cyfundrefnol, rhowch wybod i ni. Nid oes angen i chi fod yn bendant, dim ond yn bryderus.
“Ffoniwch ni ar 101, neu gallwch gysylltu â Taclo'r Tacle i roi gwybod yn ddienw os byddai'n well gennych wneud hynny – ar-lein neu drwy ffonio 0800 555 111. Os oes rhywun mewn perygl uniongyrchol neu os yw trosedd yn mynd rhagddi, dylech ffonio 999 bob amser.”