Mwy na £6,000 o ddirwyon i 10 o bobl a deithiodd i rêf anghyfreithlon mewn cymuned yn Ne Cymru

Mae gwerth mwy na £6,000 o ddirwyon wedi'u cyflwyno i 10 o bobl a deithiodd o rannau gwahanol o'r wlad i fynd i rêf anghyfreithlon mewn cymuned yn Ne Cymru.

Cynhaliwyd y digwyddiad cerddoriaeth pedwar diwrnod heb ei drwyddedu, a oedd yn cynnwys pedwar llwyfan ac a ddenodd rhwng 3,000 a 4,000 o bobl, ym Manwen ar benwythnos gŵyl banc mis Awst y llynedd, gan dorri deddfwriaeth y coronafeirws.

Mewn gwrandawiad llys arbennig yn Llys Ynadon Abertawe ddydd Llun (11 Ionawr), plediodd y canlynol yn euog i ymgynnull yn yr awyr agored gyda mwy na 30 o bobl, gan fynd yn groes i ddeddfwriaeth Coronafeirws Llywodraeth Cymru:

• Felix Blake, 28 oed, o Easton, Bryste – dirwy o £1,000, gordal dioddefwyr o £100, £85 mewn costau;
• Luke Horwood, 18 oed, o Aylesbury – dirwy o £200, £85 mewn costau, gordal dioddefwyr o £34;
• Zoe Malins 32 oed, o Gei Newydd, Ceredigion – dirwy o £500, gordal dioddefwyr o £50, £85 mewn costau;
• Dean Horwood, 37 oed, o Aylesbury, Swydd Buckingham – £600, £85 mewn costau, gordal dioddefwyr o £60;
• George Baggaley, 23 oed, o Alton, Hampshire – dirwy o £500, gordal dioddefwyr o £50, £85 mewn costau;
• James Anderson, 30 oed, o Lynebwy – dirwy o £1,000 , gordal dioddefwyr o £60, £85 mewn costau;
• Oliver Preece, 25, o Lynebwy –  dirwy o £600, gordal dioddefwyr o £60, £85 mewn costau;
• Rhys Cox, 26 oed, o Didcot, Swydd Rydychen – dirwy o £1,050, gordal dioddefwyr £100 ac £85 mewn costau;
• Julian Hammond, 24 oed, o Rydwely – dirwy o £1,000, gordal dioddefwyr o £100, £85 mewn costau. Plediodd Hammond yn euog hefyd i gyhuddiad arall o dan y Ddeddf Cyfiawnder Troseddol a Threfn Gyhoeddus, sef peidio â gadael y tir pan ofynnwyd iddo wneud hynny. Ni roddwyd cosb ar wahân iddo.
• Jordan Venus, 25 oed, o Brislington, Bryste – dirwy o £600, £85 mewn costau, gordal dioddefwyr o £60. Hefyd, penderfynodd y llys ymestyn dedfryd ohiriedig bresennol o 12 mis am gyfnod o chwe mis arall, ar ôl i Venus gyfaddef ei fod wedi mynd i'r rêf tra roedd yn ddarostyngedig i'r gorchymyn llys.

Wrth ddedfrydu pob un o'r diffynyddion yn unigol, dywedodd y Barnwr Rhanbarth Chris James wrthynt fod eu gweithredoedd yn teithio i'r digwyddiad yn ystod pandemig byd-eang, pan oedd cyfyngiadau clir ar waith a phan oedd “ein gwasanaethau iechyd y cyhoedd dan lawer iawn o straen” yn “gwbl anghyfrifol yn gymdeithasol”.

Wrth gyfeirio at un diffynnydd, dywedodd y barnwr: “Nod y rheoliadau yw atal lledaeniad feirws difrifol – feirws sydd wedi effeithio ar ein cenedl ac, yn wir, y byd. Eu nod oedd diogelu'r cyhoedd. [Roedd mynd i'r rêf] yn dangos diffyg parch i'r rheoliadau a diystyriaeth o'ch cyfrifoldeb cymdeithasol chi eich hun.”

Dywedwyd wrth y diffynyddion fod eu gweithredoedd unigol wedi cyfrannu at y niwed sylweddol a achoswyd i breswylwyr Banwen. Clywodd y llys na allent gysgu oherwydd y gerddoriaeth uchel a'u bod wedi gweld ymddygiad gwrthgymdeithasol, gan gynnwys ymddygiad ymosodol a bygythiol a sbwriel, ysgarthion a chyfarpar cyffuriau ar y strydoedd.

Cafodd yr achosion yn erbyn 10 o bobl nad oeddent yn bresennol eu gohirio tan 29 Ionawr. Mae pob un ohonynt yn wynebu'r un cyhuddiad o ymgynnull yn yr awyr agored yng Nghymru gyda mwy na 30 o bobl, yn groes i ddeddfwriaeth Coronafeirws Llywodraeth Cymru.

Bydd dyn 36 oed yn ymddangos gerbron y llys ar y dyddiad hwnnw hefyd, i wynebu cyhuddiad o ymwneud â threfnu'r digwyddiad cerddoriaeth heb ei drwyddedu.