Dyn wrthododd hunanynysu ymhlith 90 o bobl a gafodd ddirwy am dorri rheolau COVID-19 dros y penwythnos

Roedd egin ffotograffydd, gwesteion mewn parti datgelu rhyw babi a dyn a oedd wedi gwrthod hunanynysu gyda'i wraig a gafodd canlyniad prawf positif ar gyfer COVID-19 ymhlith 90 o bobl a gafodd eu dirwyo gan Heddlu De Cymru y penwythnos hwn.

Er bod Cymru gyfan o dan gyfyngiadau Lefel Rhybudd 4 o hyd, clywodd yr heddlu am fwy na 442 o achosion posibl o dorri rheolau COVID-19.

Er bod llawer o'r rhain yn llawn bwriadau da ond nad arweiniodd at achosion o dorri'r rheolau, bu'n rhaid i swyddogion roi dirwy i nifer o bobl.

Yn eu plith roedd y canlynol:

• Dyn a deithiodd o Borthcawl i Gaerdydd i dynnu lluniau ar gyfer cystadleuaeth ffotograffiaeth;
• Dyn a oedd wrthododd hunanynysu gyda'i wraig a gafodd canlyniad prawf positif yn y Barri;
• Pedwar dyn a deithiodd i Lanfa Penarth ac a oedd yn yfed alcohol ar y stryd;
• 12 o bobl a aeth i barti tŷ yn Y Rhath;
• Pedwar dyn a deithiodd yn yr un cerbyd o wahanol rannau o Gaerdydd a'r Fro i ymweld â Pharc Gwledig Cosmeston;
• Rhieni a yrrodd i brofi beic cwad eu merch mewn caeau ym Mhen-y-bont ar Ogwr, a gafodd rybudd Adran 59 hefyd mewn perthynas â'r defnydd o'r cwad;
• Dyn y daethpwyd o hyd iddo mewn eiddo yng Nghaerdydd, 28 o filltiroedd i ffwrdd o'i gyfeiriad cartref;
• Tri unigolyn o aelwydydd gwahanol a oedd yn cymysgu mewn cyfeiriad ym Mhenarth;
• 11 o bobl a aeth i barti mewn gardd yng Nghaerdydd;
• Wyth o bobl a oedd wedi ymgynnull mewn sied mewn gardd yn Sgeti;
• Tri unigolyn a aeth i barti pen-blwydd plentyn ym Mhenlan, Abertawe;
• Naw o bobl a oedd wedi ymgynnull mewn tŷ ar gyfer parti datgelu rhyw babi yn Townhill, Abertawe;
• Pedwar unigolyn a oedd wedi ymgynnull i wylio gêm bêl-droed ym Mount Pleasant, Abertawe;
• Dau unigolyn yn yfed alcohol yn y stryd ym Mhort Talbot;
• Pedwar unigolyn a oedd mewn parti mewn fflat yn Aberafan.

Mae Heddlu De Cymru yn parhau i ymgysylltu â'n cymunedau er mwyn annog pobl i gydymffurfio â deddfwriaeth y coronafeirws Llywodraeth Cymru, ac mae ein timau yn cynnal patrolau rhagweithiol rheolaidd i orfodi'r rheolau lle bo angen.

Yn ystod y penwythnos hwn yn unig, cynhaliodd Tîm Plismona yn Gymdogaeth Gŵyr ymgyrch mewn meysydd parcio ym Mae Langland, Bae Bracelet a Bae Cas-wellt, gan stopio 143 o geir dim ond mewn tair awr. Roedd y mwyafrif helaeth o'r bobl wedi teithio heb esgus rhesymol, gan arwain at gymryd camau gorfodi pellach. Ac ym Mhenarth, bu'n rhaid i swyddogion gau ffordd i wasgaru torfeydd a chynnal gwiriadau.

Hefyd, sefydlwyd Timau Gorfodi ar y Cyd (sy'n cynnwys swyddogion yr heddlu a staff cynghorau) ym mhob un o'r saith awdurdod lleol ac maent yn parhau i dargedu ardaloedd sy'n peri llawer o bryder.

Dywedodd y Prif Uwcharolygydd, Andy Valentine: “Mae cyfyngiadau Lefel Rhybudd 4 wedi bod ar waith ers cyn y Nadolig ac mae'r ddeddfwriaeth yn glir. Ni ddylai mwy nag un aelwyd fod yn cymysgu, boed hynny y tu fewn neu'r tu allan, a dim ond am nifer cyfyngedig o resymau y dylai pobl fod yn gadael eu cartrefi, megis siopa am hanfodion.

“Er y caniateir i ymarfer corff ac fe'ch anogir i chi wneud hynny, mae Llywodraeth Cymru wedi bod yn glir nad ystyrir ei bod yn rhesymol i chi deithio er mwyn ymarfer corff. Felly, mae gweld dwsinau o geir ym meysydd parcio ardaloedd o harddwch eto y penwythnos hwn yn rhwystredig ac yn siomedig.

“Gwelodd ein swyddogion rai achosion difrifol o dorri'r rheolau y penwythnos hwn, gan arwain at roi cosbau penodedig.

“Gwn fod y cyfyngiadau'n anodd ond rydym yn parhau i fod yng nghanol argyfwng iechyd difrifol iawn, ac mae gan bob un ohonom ran i'w chwarae wrth helpu i arafu lledaeniad y coronafeirws a helpu i leddfu'r pwysau ar ein GIG. 

“Dylai'r rheini nad ydynt yn fodlon ymddwyn yn gyfrifol drwy dorri'r rheolau'n fwriadol ddisgwyl wynebu camau gorfodi.”