Cyflwynodd Heddlu De Cymru dros 430 o hysbysiadau cosb benodedig am dorri rheolau COVID-19 ym mis Rhagfyr

A ninnau'n croesawu 2021 a Chymru ar Lefel Rhybudd 4 o hyd, mae Heddlu De Cymru, yn annog y cyhoedd i wneud y peth iawn a chadw cymunedau'n ddiogel.

Gyda'r cyfraddau heintio yn parhau i fod yn uchel iawn ledled y rhanbarth, mae'r lefel uchaf o gyfyngiadau Llywodraeth Cymru ar waith.

Ar lefel rhybudd 4, mae'n rhaid i chi wneud y canlynol:

• Dilyn rheolau cadw pellter cymdeithasol gyda phobl nad ydych yn byw gyda nhw neu nad ydynt yn rhan o'ch swigen gefnogaeth.
• Gwisgo gorchudd wyneb (os ydych yn gallu gwneud hynny) ym mhob lleoliad cyhoeddus dan do.
• Aros gartref. Rhaid dechrau a gorffen ymarfer corff gartref – peidiwch â theithio.
• Peidio â chreu aelwyd estynedig (gall oedolion sy’n byw ar ei ben ei hun neu rieni sengl ymuno ag un aelwyd arall i ffurfio swigen gefnogaeth).
• Cwrdd â'r bobl yn eich cartref neu eich swigen gefnogaeth yn unig.
• Cwrdd â'r bobl yn eich cartref neu eich swigen gefnogaeth yn unig mewn gerddi preifat neu yn yr awyr agored.
• Gweithio o gartref os gallwch.
• Peidio â theithio heb esgus rhesymol.
• Peidio â theithio'n rhyngwladol heb esgus rhesymol.

Drwy gydol mis Rhagfyr, mae Heddlu De Cymru wedi parhau â’i ddull plismona o esbonio’r rheolau, annog pobl i gydymffurfio â'r rheolau a chymryd camau gorfodi pan fetho popeth arall yn unig, pan fydd unigolion wedi mynd ati'n fwriadol i dorri'r rheolau.

Rhoddwyd pwerau newydd i'r heddlu i gynnal gwiriadau ar hap ar gerbydau. O dan Lefel Rhybudd 4, disgwylir i'r cyhoedd aros gartref a pheidio â theithio heb esgus rhesymol. Er mwyn cefnogi'r ymdrech genedlaethol i helpu i arafu lledaeniad y feirws, a helpu i orfodi'r cyfyngiadau, rhoddwyd awdurdod i'n swyddogion stopio unrhyw gerbyd sy'n teithio yn ardal yr heddlu.

Cynhaliwyd gwiriadau ar gyfanswm o 941 o gerbydau ers 23 Rhagfyr, pan ddechreuodd ymgyrch i adnabod y rhai a oedd yn teithio yn ardal Heddlu De Cymru heb esgus cyfreithlon neu resymol. Bwriedir i'r ymgyrch hon barhau tan o leiaf ddydd Llun, 11 Ionawr, 2021.

Dywedodd yr Uwch-arolygydd Claire Evans o Heddlu De Cymru: “Mae'r rheolau'n glir iawn na ddylech gymysgu ag aelwydydd eraill. Mae ein partneriaid iechyd wedi nodi'n glir mai trosglwyddo'r feirws dan do yw un o'r risgiau mwyaf o hyd. Felly, er y byddwn yn parhau i weithio gyda'n cymunedau er mwyn eu helpu i ddeall y rheolau, byddwn hefyd yn cymryd camau gorfodi yn yr ardaloedd hynny lle rydym yn gweld achosion amlwg neu fynych o dorri'r rheolau.

“Ni chaniateir partïon tŷ, ymgynnull na theithio i ymarfer corff, ac os byddwch yn gwneud unrhyw rai o'r pethau hyn, rydych yn wynebu risg o gael dirwy.”

Gallwn gadarnhau y cyflwynwyd 430 o hysbysiadau cosb benodedig yn ystod mis Rhagfyr, ond cyflwynwyd mwy na dwywaith gymaint â hynny o rybuddion hefyd.

Nos Galan, cafodd yr heddlu dros 240 o alwadau yn ymwneud â thorri rheolau COVID-19 – aeth swyddogion yr heddlu i gynifer o’r rhain ag y gallent yn ystod yr hyn a fu'n noson brysur a chyflwynwyd cyfanswm o 43 o hysbysiadau cosb benodedig. Ymchwilir i achosion posibl eraill o dorri'r rheolau dros y dyddiau nesaf.

Ychwanegodd yr Uwch-arolygydd Evans: “Hoffwn ddiolch i'r cyhoedd am eu cymorth ac am yr aberth y mae cymunedau ledled De Cymru wedi'u gwneud yn ystod ail don y pandemig.

“Mae'r cyfyngiadau sydd ar waith mewn grym am reswm ac mae'n bwysicach nag erioed i weithredu mewn ffordd gyfrifol. Yn lle meddwl am yr hyn y gallwch ei wneud heb gael eich cosbi, ystyriwch yr hyn y dylech ei wneud i gadw eich hun a'ch teulu'n ddiogel.”