Anogir y cyhoedd i fod yn wyliadwrus o alwadau ffôn twyllodrus am ‘arian ffug’ gan dwyllwyr sy'n honni eu bod yn gweithio i'r heddlu
Cynnwys y prif erthygl
Rydym yn annog y cyhoedd i fod yn wyliadwrus yn dilyn galwad ffôn dwyllodrus a dwyllodd dyn oedrannus i drosglwyddo miloedd o bunnau.
Cysylltodd rhywun a'r dioddefwr, sy'n byw yng Nghaerdydd, yn honni ei fod yn gweithio i'r heddlu yn Lloegr.
Dywedwyd wrtho ei fod wedi dioddef twyll a bod arian ffug wedi cael ei drosglwyddo i'w gyfrif yr oedd angen ei symud oddi yno.
Yn ystod cyfnod o wythnos, trosglwyddodd y dioddefwr filoedd o bunnau yn ddiarwybod i gyfrif banc y twyllwr.
Rhoddwyd gwybod am ddigwyddiad tebyg gan rywun yn Abertawe ac mae pryderon y gall eraill fod wedi cael eu targedu.
Anogir pobl i fod yn wyliadwrus, ac i ofalu am berthnasau agored i niwed.
Dylai pawb sy'n amau eu bod nhw neu berthynas iddynt wedi cael ei dargedu ffonio 101 neu Action Fraud ar 0300 123 2040.