Yr heddlu yn ailadrodd rhybudd wrth i fwy o bobl gael eu dal gan sgam ‘swyddog heddlu ffug’

Mae Heddlu De Cymru yn rhybuddio’r cyhoedd i fod yn wyliadwrus ar ôl i nifer o bobl sôn bod rhywun yn honni ei fod yn swyddog heddlu wedi cysylltu â nhw. Mae’r person hwnnw wedyn yn defnyddio stori fanwl mewn ymgais i geisio annog y dioddefwr i roi symiau sylweddol o arian iddo.

Mewn rhai achosion, rhoddwyd gwybod i ddioddefwyr bod eu cardiau wedi’u clonio neu eu bod wedi cael eu twyllo, a gofynnwyd iddynt ddarparu eu manylion banc. Yn ystod galwadau eraill, cafodd dioddefwyr eu hysbysu bod aelod o’r teulu wedi’i arestio, a soniwyd wrth eraill am fynd i beiriannau codi arian a chodi miloedd o bunnoedd neu brynu eitemau drud i’w trosglwyddo i ‘gludwr’ a fyddai’n casglu’r arian o’u cartref.

Ym mhob un achos, roedd y person a oedd yn galw yn honni ei fod yn dditectif ac roedd mor argyhoeddiadol nes i rai o’r bobl y cysylltwyd â nhw drosglwyddo’r arian neu’r manylion banc y gofynnwyd amdanynt.

Dywedodd y Ditectif Arolygydd Paul Raikes:

“Mae’r sgamwyr hyn yn llawn perswâd ac maent yn aml yn llwyddo i dwyllo pobl i roi symiau mawr o arian iddynt.
“Mae llawer o’r dioddefwyr yr wythnos hon wedi bod yn oedrannus, ond y gwir amdani yw y gall unrhyw un gael ei dargedu gan y sgamwyr hyn a byddwn i’n annog pawb i fod yn wyliadwrus a siarad â ffrindiau a theulu am y sgamiau. Po fwyaf o ymwybyddiaeth fydd ohonynt, y lleiaf llwyddiannus fydd y twyllwyr. Dylech roi gwybod i ni am unrhyw beth amheus yn syth.”

Ychwanegodd y Ditectif Arolygydd Paul Giess o’r Uned Troseddau Economaidd:

“Er bod llawer o’r dioddefwyr yn yr achosion hyn wedi bod yn oedrannus neu’n agored i niwed, ni allaf bwysleisio digon pa mor soffistigedig ac effeithiol yw’r sgamwyr hyn, a gallai unrhyw un ohonom gael ein twyllo os nad ydym yn wyliadwrus.
“Yn syml, fy neges i’r cyhoedd yw na fyddai’r heddlu nac unrhyw sefydliad cyfreithlon arall o ran hynny byth yn cysylltu â chi yn y ffordd hon. Mae pob galwad o’r fath yn sgam, a dylai’r person sy’n derbyn yr alwad roi’r ffôn i lawr cyn gynted â phosibl.”

Er mwyn lleihau’r risg o gael eu twyllo, mae’r cyhoedd yn cael eu hannog i gofio’r awgrymiadau syml hyn:

Gwnewch y canlynol:

• Gofyn am fanylion y sawl sy’n galw gan gynnwys enw, rheng, rhif coler a gorsaf
• Gofyn pa heddlu y mae’n gweithio iddo
• Nodi unrhyw fanylion cyswllt sy’n ymddangos ynghylch y galwr neu drwy 1471 ar ôl i’r alwad ddod i ben
• Dod o hyd i brif rif ffôn ystafell reoli’r heddlu yn y llyfr ffôn, ar y rhyngrwyd neu drwy’r gwasanaeth ymholiadau cyfeiriadur
• Dod â’r alwad i ben gan nodi y byddwch yn cysylltu ag ystafell reoli’r heddlu yn uniongyrchol i gadarnhau pwy ydyw a chael eich rhoi trwodd iddo yn fewnol (dylid ffonio aelod o’r teulu yn gyntaf i sicrhau bod y llinell wedi datgysylltu o’r galwr cychwynnol)
• Os bydd unrhyw un yn galw yn eich cyfeiriad ar ôl eich ffonio, ffonio 999.

Peidiwch â gwneud y canlynol:

• Darparu manylion cardiau banc, rhifau cyfrif, amgylchiadau ariannol na manylion personol
• Cytuno i brynu eitemau neu godi arian o gyfrifon i’w drosglwyddo i gludwyr
• Trosglwyddo eich cardiau banc neu waith papur cyfrifon.

Dylai unrhyw un sy’n credu ei fod wedi’i dwyllo gan sgamiwr roi gwybod amdano drwy ffonio 101, neu Action Fraud ar 0300 123 2040.