Trefnwyr partïon ac ymwelwyr o’r tu allan i Gymru ymysg y rhai sydd wedi cael dirwy gan Heddlu De Cymru

Yn ystod y dyddiau diwethaf, bu’n rhaid i Heddlu De Cymru gymryd camau gorfodi i ddelio â phartïon mewn tai, pobl yn ymgynnull mewn grwpiau mawr yn yr awyr agored ac achosion o dorri cyfyngiadau teithio.

Yn unol â heddluoedd ledled y DU, mae’r heddlu wedi gweithio i gynnal dull cyson o blismona drwy gydsyniad, waeth pa gyfyngiadau sydd ar waith oherwydd y coronafeirws. Er bod y mwyafrif yn parhau i chwarae eu rhan i gefnogi’r ymdrech ar y cyd i arafu lledaeniad y feirws, bu’n rhaid i swyddogion orfodi’r rheoliadau ar sawl achlysur yn ystod y cyfnod atal byr ac ar ôl hynny.

Yn ystod yr ychydig ddyddiau diwethaf yn unig, rhoddwyd hysbysiadau i’r canlynol:

• Teulu a deithiodd o’r Almaen i fynd ar wyliau yn y Gŵyr. Pan stopiodd swyddogion y teulu yn ei gerbyd a oedd wedi’i gofrestru yn yr Almaen, honnodd y teulu i ddechrau ei fod yn byw yn Abertawe, cyn cyfaddef ei fod, mewn gwirionedd, wedi teithio yn ystod y cyfnod atal byr er mwyn mynd ar wyliau yn ne Cymru;
• Trefnydd digwyddiad mawr ym Maesteg a oedd yn cynnwys tân gwyllt a choelcerth. Hysbysebodd y trefnydd y digwyddiad ar y cyfryngau cymdeithasol, a denodd llawer o bobl er gwaethaf y cyfnod atal byr a oedd ar waith ar y pryd;
• Gyrrwr a theithiwr cerbyd a oedd wedi cael ei yrru o Birmingham ac a gafodd ei stopio gan swyddogion yn Hirwaun. Gwnaethant ddweud wrth y swyddogion eu bod ar eu ffordd i werthu cerbydau yn Llanelli, er eu bod yn gwybod bod eu hardal leol dan gyfyngiadau symud a oedd wedi’u cyflwyno ym mhob rhan o Loegr, a bod gan Gymru hefyd gyfyngiadau teithio ar waith;
• Trefnwyr a gwesteion dau barti gwahanol mewn tai yn ardal Cathays.

Dywedodd y Prif Uwch-arolygydd Andy Valentine, sy’n arwain ymateb Heddlu De Cymru i’r pandemig: “Er bod y cyfnod atal byr pythefnos o hyd bellach wedi dod i ben, mae cyfyngiadau ar waith o hyd y dylai pobl gydymffurfio â nhw. Rwy’n annog pawb, fel yr wyf wedi’i wneud drwy gydol y pandemig, i barhau i chwarae eu rhan drwy wneud y peth iawn .

“Er bod rhai cyfyngiadau wedi cael eu llacio, mae’n bwysicach nag erioed ein bod yn parhau i ymddwyn yn gyfrifol – gan ganolbwyntio ar yr hyn y dylem ei wneud yn hytrach na’r hyn y gallwn ei wneud – er mwyn helpu i arafu lledaeniad y feirws yma yn ne Cymru ac amddiffyn ein GIG.

“Mae ein partneriaid iechyd wedi nodi’n glir mai trosglwyddo’r feirws dan do yw un o’r risgiau mwyaf o hyd. Felly, er y byddwn yn parhau i weithio gyda’n cymunedau er mwyn eu helpu i ddeall y rheolau, byddwn hefyd yn cymryd camau gorfodi yn yr ardaloedd hynny lle rydym yn gweld achosion amlwg neu fynych o dorri’r rheolau.”