Trais ar Stryd y Frenhines – Diweddariad

Rhoddwyd pwerau ychwanegol i swyddogion gyfarwyddo pobl i adael canol dinas Caerdydd wrth i dditectifs barhau i ymchwilio i derfysg treisgar lle cafodd chwe pherson eu derbyn i'r ysbyty.

Gosodwyd gorchymyn gwasgaru adran 35 ar gyfer ardal ddynodedig (gweler y map atodedig), sy'n galluogi swyddogion i gyfarwyddo unigolion neu grwpiau i adael yr ardal am gyfnod o 24 awr os bydd eu hymddygiad wedi cyfrannu at anhrefn neu wedi achosi achos o aflonyddu, pryder neu ofid i aelodau o'r cyhoedd, neu'n debygol o wneud hynny.

Bu'r mesur ar waith ers y digwyddiad yn ardal Stryd y Frenhines tua 9.50pm nos Sadwrn (21 Tachwedd) a'r prynhawn yma, cafodd ei estyn tan fore dydd Mawrth.

Dywedodd Ditectif Uwcharolygydd Esyr Jones: "Rydym am sicrhau ein cymunedau lleol ein bod yn gwneud popeth o fewn ein gallu i geisio adnabod pawb a fu'n gysylltiedig â'r achos o drais cwbl annerbyniol nos Sadwrn, a bod canol y ddinas yn lle diogel i ymweld ag ef o hyd.

"Bydd y pwerau hyn yn galluogi swyddogion i stopio unrhyw unigolion yr amheuir eu bod yn ymddwyn mewn ffordd wrthgymdeithasol, neu sydd wedi dod i'r ardal er mwyn achosi trafferth, a'u cyfarwyddo i adael.

"Cynyddwyd nifer y patrolau yn yr ardal ac mae tîm penodedig yn parhau i ymchwilio i'r digwyddiad ddydd Sadwrn".

Mae pedwar person ifanc, 16 ac 17 oed, wedi cael eu harestio ar amheuaeth o anhrefn dreisgar ac maent yn y ddalfa o hyd.

Mae pedwar person yn yr ysbyty o hyd ag amrywiol anafiadau. Er eu bod yn ddifrifol, ni chredir bod yr anafiadau yn bygwth bywyd.

Mae nifer o ymholiadau yn mynd rhagddynt, ac mae swyddogion yn parhau i apelio i unrhyw un sy'n meddu ar wybodaeth ond nad yw wedi siarad â swyddogion eto i gysylltu â ni.

Gan ailbwysleisio ei apêl gynharach, ychwanegodd Ditectif Uwcharolygydd Jones: “Yn arbennig, byddwn yn annog unrhyw riant sy'n amau bod ei blentyn yn gysylltiedig â'r digwyddiad mewn unrhyw ffordd i gysylltu â ni. Mae cyfrifoldeb ar bob un ohonom i fynd i'r afael â throseddau'n ymwneud â chyllyll ac ni fydd unrhyw rieni sy'n amau bod eu plant yn gysylltiedig â'r digwyddiad yn eu hamddiffyn drwy gadw'n dawel."

Anogir unrhyw un sy'n meddu ar wybodaeth i ffonio 101, gan ddyfynnu cofnodrif 2000424668.

Gallwch hefyd gysylltu â Taclo'r Tacle yn gwbl ddienw ar 0800 555 111.