Rhybudd am sgam ‘heddlu ffug’

Ni fydd yr heddlu na swyddogion eraill BYTH yn gofyn i chi roi arian parod, cardiau banc na nwyddau gwerthfawr eraill iddynt.

Dyna’r neges glir gan swyddogion, sy’n rhybuddio bod troseddwyr yn dynwared swyddogion gorfodi’r gyfraith o hyd mewn ymgais i argyhoeddi eu dioddefwyr i roi arian iddynt.

Mae troseddwyr yn defnyddio nifer o strategaethau gwahanol yn eu hymdrechion i gael arian. Maent yn cynnwys:

• Mae’r dioddefwr yn cael galwad ffôn sy’n honni mai’r heddlu sy’n galw, yn dweud wrtho bod gweithgarwch amheus ar ei gyfrif, bod rhywun arall wedi bod yn tynnu arian o’i gyfrif neu bod angen help y dioddefwr ar gyfer ‘ymgyrch gudd’.
• Yna bydd y dioddefwr yn clywed y bydd swyddog yr heddlu – sydd mewn gwirionedd yn droseddwr arall sy’n rhan o’r sgam – yn casglu ei gerdyn banc neu arian parod wrtho, neu gofynnir i’r dioddefwr drosglwyddo arian parod i gyfrif ‘diogel’ ar wahân – sy’n perthyn i’r troseddwyr.
• Efallai y byddant hyd yn oed yn dweud wrth ddioddefwyr y gallant ffonio 999 i gadarnhau yr hyn sy’n cael ei ddweud. Fodd bynnag, am fod y troseddwr yn cadw’r llinell ffôn ar agor, mae cyd-droseddwr twyllodrus yn ateb yr alwad unwaith eto.

Dywedodd DI Nick Bellamy o Uned Troseddau Economaidd Heddlu De Cymru:

“Tra bod y rhan fwyaf o’r wlad yn cyd-dynnu yn ystod pandemig Covid-19, mae’n ffiaidd bod nifer bach yn ceisio twyllo pobl eraill mewn ymgais i ddwyn arian.
“Mae gan dwyllwyr ddulliau mae’n nhw’n gyfarwydd iawn â nhw a gallant fod yn arbennig o argyhoeddiadol. Fodd bynnag, cofiwch na fydd yr heddlu, asiantaethau’r llywodraeth, banciau na busnesau ag enw da fyth yn gofyn i chi ddatgelu gwybodaeth bersonol na manylion banc, na gofyn am daliadau.
“Os byddwch yn cael galwad fel hyn, rhowch y ffôn i lawr. Er mwyn siarad â’r heddlu, gwnewch yn siŵr bod eich llinell yn glir – gallwch wneud hynny drwy geisio ffonio rhywun rydych yn ei adnabod yn gyntaf a gweld os gallwch gysylltu. Os bydd pobl yn dod i’ch cyfeiriad, ffoniwch 999.”

Mae achosion eraill o dwyll rydym wedi cael gwybod amdanynt ledled y wlad yn cynnwys twyllwyr yn ceisio gwneud arian yn ystod pandemig Covid-19 drwy esgus bod ganddynt gyfarpar diogelu personol (PPE) fel masgiau wyneb ar werth, neu hyd yn oed triniaeth ar gyfer Covid-19, ac anfon ystod o e-byst sbam sy’n gysylltiedig â coronafeirws.

Gallwch anfon e-byst amheus ymlaen i [email protected]. Mae rhagor o wybodaeth am dwyll a manylion am sut i roi gwybod amdanynt ar gael drwy Action Fraud.