Mwy na 200 o gerbydau yn cael eu stopio a dirwyon Coronafeirws yn cael eu dosbarthu dros y penwythnos

Cafodd dros 200 o gerbydau eu stopio a dirwyon eu cyflwyno ar gyfer troseddau'n ymwneud â'r Coronafeirws yn ystod ymgyrch plismona a gynhaliwyd yn Ne Cymru dros y penwythnos.

Rhoddwyd hysbysiadau cosb benodedig i wyth unigolyn fel rhan o ymgyrch plismona'r ffyrdd gan ddefnyddio pwerau newydd a roddwyd ar waith am 9am, ddydd Gwener 27 Tachwedd.

Cafodd 25 o bobl eraill eu rhybuddio a'u gorchymyn i adael Caerdydd.

Ymysg y bobl yn teithio yn groes i ddeddfwriaeth COVID-19 roedd cwpl yn teithio o Swydd Essex a ddywedodd wrth swyddogion eu bod yn mynd i'r brifddinas er mwyn rhoi anrhegion Nadolig i aelodau o'u teulu, a grŵp o naw unigolyn yn teithio gyda'i gilydd i ymweld â ffrindiau yn y brifysgol.

Cafodd 214 o gerbydau eu stopio gan yr heddlu yn ystod yr ymgyrch, a oedd yn ceisio sicrhau bod y rhai a oedd yn ymweld â Chaerdydd yn gwneud hynny yn unol â deddfwriaeth y Coronafeirws.

Rhoddwyd pwerau i swyddogion yr heddlu gynnal gwiriadau ar gerbydau gan Lywodraeth Cymru o dan reoliad 33 o Reoliadau Diogelu Iechyd (Cyfyngiadau'r Coronafeirws). Roedd y pwerau hyn ar gael i swyddogion yng Nghaerdydd tan 5pm ddydd Sul 29 Tachwedd.

Rhoddwyd 69 o hysbysiadau cosb benodedig ledled De Cymru dros y penwythnos, gan gynnwys y cosbau a roddwyd fel rhan o'r ymgyrch a gynhaliwyd yng Nghaerdydd, gan gynnwys:

• Chwe hysbysiad cosb benodedig a roddwyd pan gafodd swyddogion eu galw i barti mewn tŷ yng Nghlydach, Abertawe nos Wener;
• Tri hysbysiad cosb benodedig a roddwyd nos Sadwrn pan ymatebodd swyddogion i alwadau am grŵp o bobl yn cwrdd mewn fflat yng nghanol dinas Abertawe;
• Dau hysbysiad cosb benodedig o ganlyniad i barti mewn tŷ yng Nghastell-nedd brynhawn dydd Sul;
• Pum hysbysiad cosb benodedig yn dilyn parti tŷ yn Nhreorci;
• Mae ymchwiliadau yn parhau hefyd i achosion eraill o ymgynnull yn ardal Rhondda Cynon Taf a fydd yn arwain at gamau gorfodi ôl-weithredol

Dywedodd y Prif Uwch-arolygydd Andy Valentine, sy'n arwain ymateb Heddlu De Cymru i'r pandemig:

“Bu'r mwyafrif helaeth o bobl yn mwynhau'r penwythnos drwy gymryd gofal a chymryd y camau angenrheidiol i gadw eu hunain a phobl eraill yn ddiogel.

“Yn anffodus, dewisodd nifer bach o bobl dorri'r rheolau ac aed i'r afael â nhw mewn modd cymesur. Dros y penwythnos, buom yn defnyddio pwerau newydd a roddwyd i'r heddlu gan Lywodraeth Cymru i gynnal gwiriadau ar y ffyrdd yn ystod ymgyrch benodol a barodd am dridiau.

“Gwnaethom barhau i arfer ein dull plismona o esbonio'r rheolau, annog pobl i gydymffurfio a chymryd camau gorfodi pan oedd pobl yn amlwg yn torri'r rheolau.

“Mae'r mesurau sydd ar waith yno am reswm. Byddwn yn arfer y pwerau i gynnal gwiriadau ar y ffyrdd mewn mwy o ymgyrchoedd er mwyn sicrhau bod pobl yn dilyn unrhyw gyfyngiadau ar deithio sydd ar waith. Bydd unrhyw un sy'n amlwg yn torri'r rheolau, sydd wedi cael eu hesbonio'n glir iawn, yn wynebu dirwy.”