Heddlu De Cymru yn cyhoeddi rhybudd i’r rhai sy’n â chychwyn tanau glaswellt 'bwriadol a dinistriol'

Yn dilyn sawl achos o danau glaswellt mawr, sydd wedi peryglu ein cymunedau a’n cydweithwyr yn y gwasanaeth tân, mae Prif Gwnstabl Cynorthwyol Heddlu De Cymru Andy Valentine wedi annog y rheini sy’n gyfrifol i ystyried canlyniadau eu gweithredoedd yn ofalus iawn.

Dywedodd ACC Valentine, sy’n arwain ymateb yr heddlu i bandemig Coronafeirws: “Yn ogystal â chael effaith ddinistriol a hirdymor ar ein cefn gwlad a’n mynyddoedd, mae tanau glaswellt hefyd yn rhoi straen sylweddol ar ein gwasanaethau brys, yn enwedig ein gwasanaethau tân.

“O ystyried yr hinsawdd bresennol, mae’r gweithredoedd bwriadol, dinistriol a diesgus hyn hyd yn oed yn fwy annealladwy.

“Fel pob gwasanaeth rheng flaen a hanfodol arall, mae pandemig Coronafeirws wedi effeithio ar weithluoedd gwasanaeth Tân ac Achub De Cymru a gwasanaeth Tân ac Achub Canolbarth a Gorllewin Cymru eu hunain ac mae gweithredoedd bwriadol fel y rhain yn gofyn am gryn dipyn o adnoddau – adnoddau y gallai fod eu hangen rywle arall yn y gymuned.

“Yn syml, mae’r tanau hyn yn peryglu bywydau pobl, naill ai am eu bod yn agos at gartrefi neu am fod angen neilltuo adnoddau er mwyn mynd i’r afael â nhw.

“Mae hefyd yn peri risg gynyddol i’r rheini sy’n dioddef o Covid-19 neu unrhyw broblemau anadlu eraill, am fod y mwg a grëir ganddynt yn drwchus ac yn cael effaith sylweddol ar ansawdd yr aer.

“Byddwn yn annog y rheini sy’n cyflawni gweithredoedd difeddwl o’r fath i ystyried canlyniadau posibl eu gweithredoedd. Nid ydym ni na’n cydweithwyr yn y gwasanaeth tân byth yn goddef gweithredoedd o’r fath, ond o ystyried yr hinsawdd bresennol, maent yn gwbl warthus.

“Mae fy neges i unrhyw un sy’n gysylltiedig â’r tanau hyn yn syml. Ystyriwch eich gweithredoedd, stopiwch nawr neu byddwch yn wynebu grym llawn y gyfraith.

“Mae tanau glaswellt yn peri risg ddifrifol i’r sawl sy’n gyfrifol ac eraill, a gall fod i gollfarn droseddol oblygiadau am weddill oes unigolyn. Mae cynnau tanau glaswellt yn peri ormod o risg.

“Gall ein cymunedau hefyd chwarae rhan fawr. Nid yw plant wedi’u heithrio rhag y cyfyngiadau a osodwyd gan y llywodraeth a hoffwn ofyn i rieni sicrhau bod eu plant yn dilyn y rheolau. Byddwn hefyd yn annog pawb i fod yn wyliadwrus – dylai unrhyw un sydd â phryderon neu wybodaeth roi gwybod am hynny ar unwaith.”

Gallwch gysylltu â Heddlu De Cymru drwy ffonio 101, neu 999 mewn argyfwng. Fel arall, gallwch gysylltu â Taclo’r Tacle yn ddienw ar 0800 555 111.