Gwerth miliynau o bunnoedd o gyffuriau ac arian parod wedi’u hatafaelu yn ne Cymru fel rhan o Ymgyrch Venetic Asiantaeth Troseddu Cenedlaethol

Mae mwy na 60 cilo o gocên, crac cocên a heroin â gwerth stryd o tua £6 miliwn a £2,500,000 mewn arian parod wedi cael eu hatafaelu mewn cyrchoedd ledled de Cymru yn sgil datblygiad enfawr gan asiantaethau gorfodi’r gyfraith yn y DU lle gwnaethant drechu gwasanaeth cyfathrebu byd eang wedi’i amgryptio a ddefnyddiwyd yn benodol gan droseddwyr.

Dros y deufis diwethaf, mae Tarian, sef Uned Troseddau Cyfundrefnol Ranbarthol De Cymru, wedi bod yn gweithio gyda phartneriaid, gan gynnwys heddluoedd De Cymru, Gwent a Dyfed Powys, a’r Asiantaeth Troseddu Cenedlaethol i nodi a thargedu grwpiau troseddu cyfundrefnol a delwyr cyffuriau unigol yn y rhanbarth.

Dywedodd y Prif Gwnstabl Cynorthwyol Dave Thorne, sy’n gyfrifol am Uned Troseddau Cyfundrefnol Ranbarthol Tarian:

“Mae Ymgyrch Venetic wedi bod yn llwyddiant ysgubol ledled y DU, gyda mwy na dwy dunnell o gyffuriau a miliynau o bunnoedd o arian parod wedi’u hadfer, a channoedd o bobl wedi’u harestio, eu heuogfarnu a’u cadw yn y ddalfa hyd yn hyn.

“Yn lleol, mae Tarian, gan weithio’n agos gyda thri heddlu de Cymru, wedi gweithredu 38 o warantau ac mae 16 o bobl wedi cael eu harestio, eu heuogfarnu a’u cadw yn y ddalfa hyd yn hyn, gyda nifer o rai eraill yn destun ymchwiliad.

“Mae swyddogion wedi atafaelu 60 kg of gocên, crac cocên a heroin â gwerth stryd amcangyfrifedig o £6,000,000.

“Yn ogystal â hynny, mae mwy na £2.5 million mewn arian parod hefyd wedi cael ei atafaelu.

“Nid oes lle i gyffuriau anghyfreithlon yn ein cymdeithas, a byddwn yn parhau i gydweithio i dargedu’r rhai hynny y mae eu gweithgareddau troseddol yn amharu ar fywydau cymunedau de Cymru.

“Rydym yn ymrwymedig i darfu ar grwpiau troseddu cyfundrefnol a’u chwalu, gan ddod â phobl gerbron y llys a chael gwared ar gyffuriau o’n strydoedd.”

Dylai unrhyw un sydd â gwybodaeth am achosion o gyflenwi cyffuriau yn y gymuned ffonio’r heddlu ar 101 neu Crimestoppers, yn ddienw, ar 0800 555111.  Mewn argyfwng, ffoniwch 999.