Dyn yn euog o lofruddio ei ddyweddi mewn fflat yng Nghaerdydd

Mae dyn wedi'i gael yn euog o ladd ei ddyweddi, Lauren Griffiths, 21 oed, yn eu fflat yn Cathays, Caerdydd.

Daethpwyd o hyd i gorff Lauren mewn fflat ar Stryd Glynrhondda am tua 6.30pm ddydd Mawrth, 30 Ebrill 2019.

Roedd Madog Llewellyn Rowlands, 23 oed o Wrecsam, wedi gwadu ei llofruddio. Fodd bynnag, yn dilyn penderfyniad unfrydol gan y rheithgor yn Llys y Goron Casnewydd heddiw, mae wedi'i gael yn euog o'i llofruddio.

Caiff ei ddedfrydu yn Llys y Goron Casnewydd ar 8 Ionawr.

Mae swyddogion cyswllt â theuluoedd yn parhau i gefnogi teulu Lauren, sy'n byw yn ardal Croesoswallt.

Dywedodd y Ditectif Uwch-arolygydd Stuart Wales, o Dîm Ymchwilio i Droseddau Mawr Heddlu De Cymru:

“Roedd Lauren yn ferch ac yn chwaer annwyl â dyfodol disglair.
“Mae ei theulu wedi dangos amynedd ac urddas aruthrol yn ystod y cyfnod hir a thorcalonnus hwn.
“Rydym yn gobeithio nawr y gallant ddechrau adfer ac ailadeiladu eu bywydau.
“Ar ôl i Madog Rowlands lofruddio Lauren yn ystod oriau mân y bore ddydd Llun 29 Ebrill, arhosodd fwy na 24 awr cyn ffonio 999.
“Yn ystod y cyfnod hwn, gwnaeth Rowlands godi arian o gyfrif banc Lauren, mynd i siopa, prynu llawer iawn o gyffuriau a'u cymryd, archebu pizza, a chreu cyfrif Netflix, cyn ffonio 999 yn y pen draw – ar ôl iddo sylweddoli natur anochel y sefyllfa, o bosibl.
“Ni ddangosodd unrhyw bryder ystyrlon am les nac urddas Lauren ar unrhyw adeg.
“Hoffem ddiolch i bob un o'r tystion a gynorthwyodd yr ymchwiliad, cymuned Cathays, yn ogystal â thîm yr erlyniad.”

Datganiad gan deulu Lauren Griffiths:

“Ni fydd dim byth yn cymryd lle Lauren ac ni fydd unrhyw gyfiawnder na dedfryd byth yn adlewyrchu'r torcalon na'r boen a achoswyd i ni fel teulu.
“Rydym wedi colli merch a chwaer werthfawr, ac ni fyddwn byth yn dod i delerau â'n colled.
“Roedd Lauren yn gymeriad hynod, llawn hwyl, a oedd wrth ei bodd yn dod adref i weld ei hanwyliaid a'i ffrindiau.
“Mae colled ar ei hôl bob dydd ac ni fydd ein teulu byth yn gallu deall pam y mae hyn wedi digwydd.
“Roedd gan Lauren gynlluniau ar gyfer y dyfodol na fyddant byth yn cael eu gwireddu, ac mae'r hyn a ddigwyddodd i Lauren wedi cael effaith ddinistriol ar bob un ohonom.
“Mae'n anodd iawn cyfleu mewn geiriau sut rydym yn teimlo, y cyfan sydd gennym ar ôl yw ein hatgofion gwerthfawr o ferch roeddem yn ei charu'n annwyl.
“Hoffem ddiolch i bawb sydd wedi ein helpu a'n cefnogi drwy'r cyfnod ofnadwy hwn, a hoffem gael llonydd yn awr i ddechrau ein proses alaru yn iawn.”