Dathlu blwyddyn ers sefydlu tîm arbenigol yr heddlu drwy lwyddo i ddod o hyd i lawer o gyffuriau

Mae tîm arbenigol Heddlu De Cymru, sy’n canolbwyntio ar fynd i’r afael â thrais difrifol, yn dathlu blwyddyn ers iddo gael ei sefydlu gyda’i lwyddiant mwyaf gwerthfawr hyd yn hyn i ddod o hyd i gyffuriau.

Cafodd gwerth dros £2m o gyffuriau ei atafaelu gan Dîm Ymgyrch Sceptre ar ôl arestio dyn yr wythnos diwethaf a chwilio 16 eiddo ledled y rhanbarth.

Dyma lwyddiant diweddaraf Tîm Ymgyrch Sceptre yr heddlu i atafaelu a cheisio tarfu ar y rhai sy’n ymwneud â throseddoldeb.

Gwnaeth cyllid y Swyddfa Gartref fis Gorffennaf diwethaf sicrhau y gellir ymestyn rôl y tîm yng Nghaerdydd, a chreu cangen newydd o’r tîm yn Abertawe.

Yn ystod y 12 mis ers hynny, mae’r tîm wedi arestio cannoedd o bobl, wedi atafaelu symiau mawr o gyffuriau – gan gynnwys y cyffuriau mwyaf difrifol, dosbarth A – ac wedi tynnu ugeiniau o arfau oddi ar y strydoedd.

Mae’r swyddogion hefyd wedi atafaelu cannoedd ar filoedd o bunnoedd mewn arian parod a gafwyd yn anghyfreithlon, a chyffuriau gwerth miliynau o bunnoedd – gan gynnwys y cyffuriau gwerth £2m a atafaelwyd yng Nghaerdydd yr wythnos diwethaf.

Aeth Tîm Ymgyrch Sceptre sydd wedi’i leoli yng Nghaerdydd ati’n rhagweithiol i stopio a chwilio cerbyd ddydd Iau, 2 Gorffennaf ar Heol Casnewydd yng Nghaerdydd, gan arwain at chwilio cyfeiriadau yng Nghaerdydd, Merthyr Tudful, Rhondda Cynon Taf, Pen-y-bont ar Ogwr, Caerffili a Blaenau Gwent a chanfod sawl ffatri ganabis. Mae’r ymchwiliad hwnnw yn dal i fynd yn ei flaen.

Yn y cyfamser, gwnaeth yr uned yn Abertawe sawl arestiad ddydd Sul, 5 Gorffennaf mewn achosion ar wahân – er enghraifft yn ymwneud â’r honiad o gyflenwi crac cocên a heroin – ac atafaelu gwerth miloedd o bunnoedd o gyffuriau ac arian parod.

Mae’r canlyniadau diweddaraf yn golygu bod yr unedau yng Nghaerdydd ac Abertawe, ers dechrau mis Gorffennaf 2019, wedi cyflawni’r canlynol:

• Tynnu dros 350 o arfau oddi ar y strydoedd
• Atafaelu 180 o gerbydau
• Atafaelu gwerth £3.2m o gyffuriau a £330,000 mewn arian parod
• Gwneud cannoedd o arestiadau

Dywedodd yr Uwcharolygydd Esyr Jones, arweinydd trais difrifol yr heddlu:

“Mae Timau cudd Ymgyrch Sceptre yn ymrwymedig i darfu ar y rhai sy’n cymryd rhan yn yr achosion mwyaf difrifol o drais a chamfanteisio troseddol ar ein strydoedd.
“Mae De Cymru yn lle diogel i fyw a gweithio ynddo, ac rydym yn gwbl ymrwymedig i sicrhau ei fod yn parhau felly. Ni fyddwn yn goddef achosion o gamfanteisio troseddol na thrais a byddwn yn parhau i fynd ar ôl y rhai sy’n achosi gofid i’n cymunedau.
“Rydym yn annog unrhyw un sydd â gwybodaeth i’n hysbysu am faterion drwy ffonio 101 neu drwy gysylltu â Taclo’r Tacle yn ddienw.”

Mae timau plismona yn y gymdogaeth, ymateb, gweithrediadau arbenigol a thimau eraill yr heddlu yn cefnogi gwaith Tîm Ymgyrch Sceptre.

Dylai unrhyw un sydd â phryderon ffonio 101, Taclo’r Tacle yn ddienw ar 0800 555 111 neu 999 mewn argyfwng.