Cafodd dros 130 o bobl eu dirwyo am dorri rheolau Covid dros y penwythnos, gan gynnwys grŵp o bobl mewn parti

Cafodd dros 70 o bobl eu dirwyo am fynychu partïon mewn tai ledled De Cymru dros y penwythnos – a chafodd un person ei gyhuddo o ymosod ar swyddog yr heddlu. 

Er bod Cymru gyfan yn dal i wynebu cyfyngiadau Lefel Rhybudd 4 y Coronafeirws, gwnaeth lleiafrif bach barhau i dorri'r rheolau drwy fynychu partïon mewn tai a theithio heb esgus rhesymol.

Ymatebodd Heddlu De Cymru i 552 o ddigwyddiadau'n ymwneud â Covid rhwng dydd Gwener a dydd Llun, ac er na chafwyd llawer o achosion o dorri'r rheolau, bu'n rhaid i'r swyddogion gyflwyno 134 o hysbysiadau cosb benodedig.

Yn eu plith roedd y canlynol:

• 13 o hysbysiadau cosb benodedig i unigolion mewn parti yn y Maritime Quarter, Abertawe;
• Pedwar hysbysiad cosb benodedig mewn parti pen-blwydd yn Abertawe – yn cynnwys dau westai a deithiodd o Lundain;
• Chwe hysbysiad cosb benodedig mewn parti mewn fflat yng Nglan yr Afon, Caerdydd;
• Tri hysbysiad cosb benodedig i deithwyr mewn fan, a gafodd ei harchwilio hefyd. Roedd pob un ohonynt o aelwydydd gwahanol a ‘ddaeth at ei gilydd i ddathlu pen-blwydd’;
• Chwe hysbysiad cosb benodedig i ddynion a ddaeth at ei gilydd i yfed alcohol yn Nhreganna, Caerdydd;
• Chwe hysbysiad cosb benodedig mewn parti yn Cathays, Caerdydd;
• 15 o hysbysiadau cosb benodedig mewn parti mewn fflat yn Sblot;
• Roedd pedwar teithiwr o gyfeiriadau gwahanol wedi'u canfod yn rhannu car yn Y Sili, Bro Morgannwg;
• Saith hysbysiad cosb benodedig i bobl mewn parti mewn tŷ yng Nglannau'r Barri;
• Wyth hysbysiad cosb benodedig yn dilyn parti mewn tŷ yn Grangetown, Caerdydd;
• Chwe hysbysiad cosb benodedig i unigolion mewn parti mewn tŷ yn Nhreherbert, Rhondda;
• Chwe hysbysiad cosb benodedig i unigolion mewn parti mewn tŷ ym Merthyr Tudful;
• Chwe hysbysiad cosb benoded i bobl o aelwydydd gwahanol a ymgasglodd mewn maes parcio yn Aberaman, Cwm Cynon;
• Chwe hysbysiad cosb benodedig i unigolion mewn parti mewn tŷ yn Nhredelerch, Caerdydd. Cafodd un person ei arestio ac mae wedi'i gyhuddo ers hynny o dorri gorchymyn atal ac ymosod ar weithiwr gwasanaeth brys.

Yn ogystal â hyn, cafodd sawl person ddirwy am deithio heb esgus rhesymol i barciau, traethau ac ardaloedd eraill o harddwch.

Mae Heddlu De Cymru yn parhau i ymgysylltu â'n cymunedau er mwyn annog pobl i gydymffurfio â deddfwriaeth y coronafeirws Llywodraeth Cymru, ac mae ein timau yn cynnal patrolau rhagweithiol rheolaidd i orfodi'r rheolau lle bo angen.

Hefyd, sefydlwyd Timau Gorfodi ar y Cyd (sy'n cynnwys swyddogion yr heddlu a staff cynghorau) ym mhob un o'r saith awdurdod lleol ac maent yn parhau i dargedu ardaloedd sy'n peri llawer o bryder.