Arestio 13 o unigolion wrth i gudd-wybodaeth yr heddlu a charchardai fynd i'r afael â chyflenwi cyffuriau

Mae Uned Cudd-wybodaeth Carchardai Rhanbarthol Uned Eithafiaeth a Gwrthderfysgaeth Cymru a Tarian wedi bod yn cydweithio'n agos â charchardai yn Ne Cymru i gymryd camau gorfodi pellach ar gyfer achosion o gyffuriau sy'n cael eu cyflenwi'n anghyfreithlon mewn carchardai.

Mae cyfres o weithrediadau a arweiniwyd gan gudd-wybodaeth ac a gynlluniwyd ymlaen llaw rhwng CEM Parc a'r Heddlu yn ddiweddar, wedi arwain at arestio 13 o unigolion mewn cysylltiad â chyflenwi sylweddau seicoweithredol a chynllwynio i gyflenwi canabis ac eitemau eraill sydd wedi'u gwahardd i'r carchar.

Aeth yr heddlu ati i ymyrryd yn sylweddol gan arestio ymwelwyr a oedd yn ceisio trosglwyddo cyffuriau i garcharorion, ar ôl derbyn cudd-wybodaeth gan staff yn CEM Parc. Roedd menywod dan ddylanwad partïon eraill ymhlith y sawl a gafodd eu harestio, a gwnaeth y gwaith ar y cyd â'r Uned Cudd-wybodaeth Carchardai Rhanbarthol gysylltu'r unigolion hyn â grŵp troseddau cyfundrefnol yng Ngorllewin Canolbarth Lloegr.

Cafodd gwarant ei gyflwyno yn ardal Birmingham ar 17 Tachwedd 2020, a arweiniodd at sawl arestiad arall a chanfod sawl dyfais ddigidol ac eitemau cyffuriau eraill. Yn sgil y ffordd roedd yr eitemau hyn wedi'u pacio, roedd yn amlwg mai'r nod oedd eu cyflenwi'n anghyfreithlon mewn carchardai. Cafodd gwerth £3,500 o arian parod a char gwerthfawr eu canfod hefyd.

Mewn ymgyrch ar wahân rhwng CEM Parc a'r Uned Cudd-wybodaeth Carchardai Rhanbarthol, amcangyfrifir bod gwerth £19,000 o gyffuriau wedi'i atafaelu mewn pedwar llythyr a anfonwyd at garcharorion a oedd yn cynnwys sylweddau seicoweithredol. Gwnaeth ymchwiliad yr heddlu olrhain y pecynnau yn ôl i'r anfonwyr, a chafodd dwy wraig ac un dyn eu harestio yng Nghasnewydd ar 26 Tachwedd 2020.

Dywedodd y Prif Gwnstabl Cynorthwyol David Thorne:

“Mae cyffuriau'n cael effaith andwyol ar y broses o adsefydlu troseddwyr. Maent yn cynyddu dyledion a'r achosion o drais, a gallant olygu bod y troseddwyr yn dal i fod yn gaeth iddynt ar ôl gadael amgylchedd y carchar, ac arwain at risg uwch o aildroseddu.

“Dim ond drwy barhau i gydweithio'n agos mewn partneriaeth ag awdurdodau'r carchar y gallwn atal cyffuriau, ffonau ac eitemau eraill sydd wedi'u gwahardd rhag cael eu masnachu i mewn i garchardai.

“Mae gweithgarwch o'r fath yn cam-fanteisio ar unigolion sydd eisoes yn agored i niwed yn y carchar ac yn amlwg yn fwriad i gael budd ohonynt yn ariannol.

“Drwy fynd ati'n rhagweithiol i dargedu'r rheini sy'n ymwneud â'r math hwn o weithgarwch troseddol cyfundrefnol gyda'n gilydd, gallwn sicrhau ein bod yn cyflawni ein hamcanion o ddatblygu amgylchedd mwy diogel yn y carchar ac sy'n fwy addas ar gyfer y broses o adsefydlu, ac er mwyn diogelu'r unigolion sy'n agored i niwed yn fwy effeithiol.

“Drwy fynd i'r afael â grwpiau troseddu cyfundrefnol fel y rhain yn effeithiol, gallwn ddwyn y rheini sy'n gyfrifol am gyflenwi cyffuriau mewn carchardai gerbron y llys ac amharu ar y broses niweidiol o fasnachu cyffuriau i'r rheini sydd eisoes yn agored i niwed.”

Dywedodd Janet Wallsgrove, Cyfarwyddwr Carchar Ei Mawrhydi a Sefydliad Troseddwyr Ifanc Parc:

“Bydd grwpiau troseddu cyfundrefnol yn gwneud unrhyw beth i elwa o gyflenwi eitemau sydd wedi'u gwahardd mewn carchardai sy'n cynrychioli diogelwch, sefydlogrwydd a phroses o adsefydlu yn y pen draw.”

“Diogelwch y sawl sy'n bresennol yn CEM Parc yw ein prif flaenoriaeth, ac mae'r gweithrediadau diweddaraf hyn yn enghreifftiau gwych o'r ffordd y gall gwaith amlasiantaethol fynd i'r afael â gweithgarwch anghyfreithlon ac arwain at gymunedau mwy diogel yn y ddalfa, a'r tu allan iddi.”