Ymgyrch Makesafe

Mae'n bosibl bod rhywun wedi eich cyfeirio at y dudalen hon er mwyn i chi gael rhagor o wybodaeth. Rydym am hyfforddi staff ar sut i adnabod arwyddion o achosion posibl o gam-fanteisio ar blant er mwyn diogelu ein plant a’n pobl ifanc.

Rydym yn gwybod y gall y sgyrsiau hyn fod yn anghyfforddus, ond maent yn hollbwysig. Rydym yn gwybod bod camdriniaeth a cham-fanteisio yn digwydd mewn gwestai, ac rydym ni i gyd yn cydweithio i atal achosion o'r fath.

Os oes gennych bryderon y gallai person ifanc fod yn cael ei gam-drin neu'i ecsbloetio, ffoniwch 999.

Prosiect cenedlaethol yw Ymgyrch Makesafe sy'n canolbwyntio ar godi ymwybyddiaeth o gam-fanteisio ar blant yn y gymuned fusnes, gan gynnwys mewn gwestai, safleoedd trwyddedig, cwmnïau tacsis a siopau.

Mae Ymgyrch Makesafe yn ymwneud â grymuso busnesau a sefydliadau i fynd i'r afael ag achosion o gam-fanteisio ar blant drwy gynyddu ymwybyddiaeth a chynnig hyfforddiant iddynt.

Nod yr ymgyrch yw cyflawni'r canlynol:

• Adnabod dioddefwyr posibl a sicrhau ymateb diogelu effeithiol.

• Cydweithio â busnesau er mwyn uwchsgilio staff ac amddiffyn plant sy'n agored i niwed rhag cael eu hecsboetio.

• Rhoi tawelwch meddwl i'r cyhoedd a rhoi mesurau ataliol effeithiol ar waith.

• Gwella diogelwch y cyhoedd a meithrin hyder y cyhoedd.

Bwriad yr ymgyrch yw helpu perchnogion busnes a'u cyflogai i adnabod arwyddion posibl o gam-fanteisio ar blant a rhoi gwybod i swyddogion yr heddlu, lle y bo angen, fel y gallant ymyrryd cyn i unrhyw berson ifanc gael ei niweidio.

Mae tystiolaeth leol a chenedlaethol yn dangos y gall achosion o gam-fanteisio ar blant ddigwydd mewn gwestai, tafarndai, caffis a safleoedd sydd wedi'u trwyddedu i werthu alcohol. Efallai y bydd tacsis yn cael eu defnyddio i gludo pobl ifanc sy’n mynd i gael eu hecsbloetio.

Rydym yn gweithio i sicrhau y gall pobl sy'n gweithio yn yr amgylcheddau hyn adnabod yr arwyddion rhybudd a bod ganddynt yr hyder i roi gwybod am eu pryderon drwy siarad â'u goruchwyliwr a ffonio 101, gan grybwyll ‘Ymgyrch Makesafe’ - neu ffonio 999 mewn argyfwng.

Arwyddion rhybudd ar gyfer pobl sy’n gweithio mewn gwestai:

• Oedolion yn cymryd ystafell mewn gwesty ar gyfer pobl ifainc ar adegau rhyfedd o’r dydd neu’r nos a heb fagiau.

• Gwesteion sy’n ymddangos yn gyfrinachol am eu hymweliad neu’n ceisio cuddio’r ffaith eu bod nhw yng nghwmni unigolyn ifanc.

• Tystiolaeth o gyfarpar cyffuriau neu sawl ffôn symudol yn cael eu canfod mewn ystafell mewn gwesty.

• Gwesteion sy’n oedolion yn mynnu talu mewn arian parod ac yn gwrthod gadael ôl cerdyn credyd.

Arwyddion rhybudd ar gyfer pobl sy’n gweithio yn y diwydiant tacsi:

• Oedolion yn rhoi rhywun ifanc mewn tacsi, a allai fod o dan ddylanwad alcohol neu gyffuriau.

• Pobl ifanc yn cael eu casglu a’u cymryd i westai, yn enwedig yn ystod amserau rhyfedd o’r dydd a’r nos.

• Oedolion sy’n ymddwyn yn rhyfedd yng nghwmni pobl ifanc.

Arwyddion rhybudd ar gyfer pobl sy’n gweithio mewn tafarndai, caffis neu fwytai:

• Oedolyn gydag unigolyn ifanc y mae’n cyffwrdd ynddo/ynddi neu’n ymddwyn yn glòs gydag ef/hi.

• Oedolion yn dod yn gyfaill i bobl iau, gan gynnwys prynu bwyd a diod iddynt.

• Oedolion sy’n dod i mewn ar eu pennau eu hunain ac sydd bob amser yn targedu pobl ifanc.

• Oedolion yn prynu diodydd alcoholig rydych chi’n amau sydd ar gyfer rhywun sy’n iau na 18 oed, neu oedolion yn dod i mewn gyda phobl ifanc o dan ddylanwad alcohol neu gyffuriau.

Gallwch chi riportio ar-lein a byddwn yn ymdrin â'r mater yn yr un modd â galwadau 999.