Myfyrwyr Diogel / Safer Students

Dylai eich tŷ fod yn lle diogel, felly gadewch i ni gadw pethau felly:

• Clowch eich holl ddrysau a ffenestri os byddwch yn mynd allan
• Cuddiwch eich eiddo gwerthfawr allan o'r golwg
• Dylech osgoi gadael allwedd sbâr o dan y mat neu bot blodau

Cofiwch, gallwch gofrestru eich eiddo gwerthfawr yn www.immobilise.com

Gwnewch yn siŵr fod eich noson allan yn gofiadwy am y rhesymau cywir.

• Ni fydd bariau yn rhoi gwasanaeth i unrhyw un sydd wedi meddwi'n ormodol. Gallech gael eich taflu allan a gallai'r bariau golli eu trwydded, felly cymerwch bwyll
• Arhoswch gyda'ch ffrindiau a cheisiwch beidio â chrwydro i ffwrdd ar eich pen eich hun
• Cynlluniwch eich taith adref a dim ond cwmnïau tacsi lleol y gellir ymddiried ynddynt y dylech eu defnyddio – gofynnwch i'ch Undeb Myfyrwyr am ragor o wybodaeth am y rhain.

Os byddwch ar noson allan a bod angen help arnoch, manteisiwch ar ein gwasanaethau Man Cymorth/Bws Diogelwch.

Mae'r Man Cymorth yn Abertawe wedi'i leoli yng nghefn y maes parcio ar Y Strand ac mae wedi'i staffio gyda nyrsys, parafeddygon, Ambiwlans Sant Ioan a'r heddlu.

Mae Bws Diogelwch Caerdydd ar batrôl yng nghanol y ddinas nos Fercher, nos Wener a nos Sadwrn a bydd yn rhoi help i unrhyw un sydd ei angen. Bydd hefyd o gwmpas ar bob diwrnod timau prifysgol ac unrhyw ddigwyddiadau mawr eraill.

 

Rydym yn gweithio'n galed i dorri'r cysylltiad rhwng defnyddio cyffuriau a throseddu ond mae angen eich helpu chi arnom.

• Gall delio mewn cyffuriau/cymryd cyffuriau gael effeithiau dinistriol ar fywydau pobl.
• Os cewch gynnig cyffuriau neu os cewch gynnig taliad am ddosbarthu cyffuriau, dywedwch na bob tro – gallech gael eich tynnu i mewn i grŵp troseddau cyfundrefnol yn anfwriadol.
• Os ydych yn poeni am ddefnydd o gyffuriau/delio mewn cyffuriau, rhowch wybod amdano bob tro.

I gael rhagor o wybodaeth a chymorth ewch i DAN 24/7.

 

Riportio sbeicio

 

Beth yw sbeicio?

Sbeicio yw pan fydd rhywun yn rhoi alcohol neu gyffuriau mewn diod neu gorff rhywun arall heb ei gydsyniad neu heb iddo wybod.

Mae hyn yn anghyfreithlon hyd yn oed os na chyflawnwyd troseddau eraill

Gall pobl hefyd gael eu ‘sbeicio â nodwydd’, sef chwistrellu rhywun â chyffuriau heb ei gydsyniad.

Gall sbeicio ddigwydd i unrhyw un yn unrhyw le – beth bynnag fo'ch rhyw, rhywioldeb neu ethnigrwydd – a gallech gael eich sbeicio gan ddieithryn neu rywun rydych yn ei adnabod.

 

Beth ddylwn i ei wneud os byddaf yn credu fy mod wedi cael fy sbeicio?

Ffoniwch 999 neu 101 neu rhowch wybod i'r heddlu.

Mae angen i ni wybod am bob achos posibl o sbeicio er mwyn i ni allu ymchwilio iddo, hyd yn oed os na chyflawnwyd unrhyw drosedd arall.

Os byddwch allan mewn bar neu glwb, gallwch roi gwybod i aelod o'r staff a fydd yn gallu eich helpu a rhoi cymorth i chi.

Os byddwch wedi eich anafu neu os bydd gennych symptomau rydych yn poeni amdanynt ar ôl i chi gael eich sbeicio, cysylltwch ag 111

Os byddwch yn meddwl bod rhywun wedi ymosod arnoch yn rhywiol, ewch i'ch canolfan atgyfeirio ymosodiadau rhywiol (SARC) agosaf i gael gofal a chymorth arbenigol.

Os oes trosedd wedi effeithio arnoch ac mae angen cymorth neu wybodaeth gyfrinachol arnoch, gallwch hefyd ffonio Cymorth i Ddioddefwyr ar 08 08 16 89 111.

 

Rwy'n poeni am roi gwybod i'r heddlu

Gwyddom y gall y syniad o roi gwybod i'r heddlu am achos o sbeicio godi ofn arnoch, ond mae yno i'ch helpu.

Byddwn yn gwrando arnoch ac yn eich cymryd o ddifrif.

Nid yw'n drosedd bod â chyffuriau anghyfreithlon yn eich system (oni bai eich bod yn gyrru), felly peidiwch â gadael i hyn eich atal rhag rhoi gwybod am sbeicio.

 

Beth sy'n digwydd ar ôl i mi gael prawf?

Byddwn yn cymryd sampl wrin anfewnwthiol. Mae rhai cyffuriau'n gadael y corff yn gyflym iawn (o fewn 12 awr), felly mae'n bwysig cynnal prawf cyn gynted â phosibl.

Mae cyffuriau eraill yn aros yn y corff am gyfnod hwy, felly ystyrir cynnal prawf hyd at saith diwrnod ar ôl y digwyddiad.

Y prawf rydym yn ei ddefnyddio yw'r ffordd fwyaf effeithiol o ganfod a ydych wedi cael eich sbeicio.
Os byddwch yn cael prawf mewn ysbyty neu gan eich meddyg teulu, bydd angen i chi gael prawf gan yr heddlu hefyd, gan mai dim ond y prawf hwn y gellir ei ddefnyddio fel tystiolaeth i gefnogi cyhuddiadau neu euogfarnau.

Os byddwch yn dweud wrth yr heddlu faint rydych wedi ei yfed ac a ydych wedi cymryd cyffuriau yn wirfoddol, byddwn yn gallu darparu canlyniadau mwy cywir.

 

Beth sy'n digwydd nesaf?

Byddwn yn cael canlyniadau'r prawf o fewn tair wythnos a byddwn yn cadw mewn cysylltiad â chi.

 

Beth arall y mae Heddlu De Cymru yn ei wneud i ymateb i bryderon am sbeicio?

Mae gan Heddlu De Cymru hanes gwych o weithio mewn partneriaeth ac rydym yn rhoi hyfforddiant i staff mewn safleoedd trwyddedig canol dinas i'w helpu i nodi a diogelu pobl agored i niwed ac rydym yn aml yn gweld enghreifftiau o achosion lle mae'r hyfforddiant hwn wedi talu ar ei ganfed.

Mae ein swyddogion yn gweithio'n agos gyda safleoedd trwyddedig a phan fydd digwyddiadau, rydym yn eu hysbysu am ddulliau sbeicio ac yn gofyn iddynt fod yn arbennig o wyliadwrus.

Rydym yn cymryd pob achos o ddifrif ac yn annog unrhyw un sy'n credu ei fod wedi cael ei sbeicio mewn unrhyw ffordd i gysylltu â ni.

• Rhowch wybod ar-lein
• Drwy e-bost: [email protected]
• Ffôn: 101
• Mewn argyfwng, ffoniwch 999

Mae'r cyfryngau cymdeithasol bellach yn rhan enfawr o fywydau'r rhan fwyaf o bobl ac mae'n ffordd wych o gysylltu â phobl eraill, ond cofiwch nad yw pawb rydych yn cwrdd â nhw ar-lein yn ddilys a bod eich ymddygiad yn weladwy i bawb.

• Dylech gadarnhau pwy yw'r unigolyn rydych yn sgwrsio ag ef, gwnewch yn siŵr ei fod yn dweud y gwir am bwy ydyw a pheidiwch byth â rhannu eich gwybodaeth bersonol.
• Peidiwch â rhannu sylwadau sarhaus na bygythiol – gall hyn fod yn gas a gall gael effaith ddinistriol ar y rhai sy'n cael eu targedu. Gall eich darpar gyflogwyr hefyd weld hyn os byddant yn dewis chwilio amdanoch ar-lein. Peidiwch â dinistrio eich cyfleoedd cyn iddynt hyd yn oed ddechrau!
• Meddyliwch am yr hyn rydych yn ei rannu a phwy all ei weld – os na fyddech yn gyfforddus i ddieithryn ei weld, peidiwch â'i rannu.

Trais rhywiol (rape) yw rhyw heb gydsyniad. Gwnewch yn siŵr bob amser fod yr unigolyn arall am iddo ddigwydd ac os nad yw am iddo ddigwydd, stopiwch bob tro.

Dim ond os bydd yn gallu gwneud hynny y gall unigolyn roi cydsyniad. Ni all rhywun roi cydsyniad os bydd:

• Yn feddw
• Dan gyffur
• Yn cysgu
• Yn anymwybodol

Cofiwch, os byddwch yn newid eich meddwl ac nad ydych yn gyfforddus, gallwch a dylech bob amser ddweud na.

Am ragor o wybodaeth ewch i www.consentiseverything.com.

I gael cymorth Argyfwng Trais a Cham-drin Rhywiol gallwch gysylltu â Llwybrau Newydd:

• Ffoniwch: 01685 379310
• E-bostiwch: [email protected]
• X: @newpathways_

Mae blacmel rhywiol yn digwydd pan fydd rhywun yn bygwth rhannu eich cynnwys preifat a rhywiol ar-lein oni bai eich bod yn bodloni ei ofynion:

• Meddyliwch cyn i chi rannu – a ellir ymddiried yn yr unigolyn hwn? Os nad ydych yn siŵr, peidiwch â rhannu unrhyw gynnwys preifat.
• Peidiwch byth ag ildio i flacmeliwr, p'un a yw am gael taliad ariannol neu rywbeth arall.
• Nid ydych ar eich pen eich hun, dylech bob amser roi gwybod drwy 101 neu yn ddienw drwy Taclo'r Tacle.

Gallwch gael rhagor o wybodaeth a chymorth yn revengepornhelpline.org.uk.

Mae beiciau yn ffordd wych o deithio o gwmpas eich dinas newydd. Ond, maen nhw hefyd yn dargedau deniadol i ladron am eu bod yn hawdd i'w dwyn a'u gwerthu.

• Cofnodwch rif cyfresol eich beic felly os bydd yn cael ei ddwyn gallwn ei adnabod yn hawdd a gwella'r siawns y caiff ei ddychwelyd.
• Defnyddiwch glo D ‘sold secure’ a gwnewch eich gorau i geisio cloi eich beic wrth rywbeth cadarn.
• Gwnewch yn siŵr fod eich beic wedi'i yswirio a'i gofrestru ag immobilise.com.

Mae troseddau casineb yn droseddau sy'n targedu unigolion o ganlyniad i agweddau penodol ar eu bywydau. Gall trosedd casineb ddigwydd mewn sawl ffordd, ar lafar neu'n gorfforol, a gall ddigwydd i unigolyn oherwydd ei:

• Hil
• Crefydd neu Gred
• Y rhywedd y mae'n uniaethu ag ef
• Cyfeiriadedd rhywiol
• Anabledd, gan gynnwys anabledd dysgu, anabledd corfforol ac iechyd meddwl.

Nid yw trosedd casineb byth yn dderbyniol a dylech bob amser roi gwybod amdani, naill ai i ni yn uniongyrchol neu gallwch ddefnyddio ein partneriaid yn www.report-it.org.uk.