Cydraddoldeb a Hawliau Dynol: Cyfle Gwirfoddoli

Ymunwch â Heddlu De Cymru: Grŵp Cynghori Annibynnol Strategol

Mae Grŵp Cynghori Annibynnol (IAG) Strategol Heddlu De Cymru yn cyflawni rôl hanfodol fel ‘cyfaill beirniadol’ mewn perthynas â'n polisïau a'n prosesau. Mae'n ein galluogi i gydgynhyrchu'r gwasanaeth a ddarperir gennym gyda'r cymunedau rydym yn eu gwasanaethu.

Mae'n cynnig fforwm lle y gall aelodau annibynnol o'r gymuned gynnig cyngor yn seiliedig ar eu gwybodaeth a'u profiad byw o faterion cydraddoldeb a hawliau dynol ym maes plismona, a chyfrannu at wneud De Cymru yn lle mwy diogel a chydlynol.

Rôl y Grŵp yw rhoi cyngor anffurfiol ar ein gwasanaeth a chraffu arno'n anffurfiol, gyda ffocws penodol ar sicrhau ein bod yn deall anghenion ein holl gymunedau ac yn gallu ymateb iddynt.

Mae angen pobl sydd â brwdfrydedd, ymrwymiad a dealltwriaeth o gydraddoldeb a hawliau dynol i'n helpu ar lefel leol, gan weithio gyda'n tri thîm gweithredol ar gyfer Caerdydd a'r Fro, Morgannwg Ganol ac Abertawe a Chastell-nedd Port Talbot.

Bydd angen ein ‘cyfeillion beirniadol’ arnom hefyd i helpu ar lefel strategol, gan roi cyngor, drwy ein tîm Cydraddoldeb, Amrywiaeth a Chynhwysiant, i'r Prif Gwnstabl a’r uwch-arweinwyr ym mhob rhan o'r heddlu.

Bydd angen i aelodaeth y Grŵp Strategol fod mor gynrychioliadol â phosibl o'r cymunedau amrywiol ledled ein tair ardal blismona, yn unol â nodweddion gwarchodedig Deddf Cydraddoldeb 2010. Felly, byddwn yn ceisio cynnwys aelodau o bob un o'r tair ardal a all gynnig profiad lleol o ran oedran, anabledd, rhyw, hunaniaeth o ran rhywedd, hil, crefydd neu gred a chyfeiriadedd rhywiol.

Proffil y Rôl

Fel aelod o'r Grŵp, bydd eich barn annibynnol yn helpu Heddlu De Cymru i lywio gwasanaeth yr heddlu ac yn helpu i feithrin cydberthnasau cryfach â chymunedau amrywiol. Byddwch yn cytuno i wneud y canlynol:

• Cymryd rhan mewn cyfarfodydd chwarterol fel aelod o'r Grŵp;
• Rhoi cyngor annibynnol i'r Heddlu am faterion penodol y nodwyd ac y cytunwyd arnynt gan yr Heddlu a'r Grŵp;
• Rhoi arweiniad, dealltwriaeth bersonol a her adeiladol yn adlewyrchu eich safbwynt fel aelod o'r gymuned;
• Rhoi cyngor annibynnol ar faterion sydd o bosibl yn effeithio ar gydlyniant cymunedol yn ardal De Cymru, gan gynnwys polisïau, arferion, gweithdrefnau a digwyddiadau critigol;
• Lle y bo'n briodol, gweithredu fel Cynghorydd Digwyddiadau Critigol Annibynnol ar gyfer yr Heddlu gweithredol (nid yw hyn yn orfodol);
• Cadw cydberthynas waith dda gydag aelodau eraill y Grŵp, staff Heddlu De Cymru ac unrhyw bartïon eraill sydd â diddordeb;
• Ymgymryd ag amrywiaeth ehangach o rolau cynghori o bosibl e.e. cymryd rhan mewn grwpiau sy'n ystyried materion Stopio a Chwilio neu faterion amrywiaeth cyflogaeth.

Manyleb y Person

Rhaid i ymgeisydd sy'n gwneud cais am rôl fel aelod o'r Grŵp fodloni'r meini prawf canlynol:

• Ni ddylai fod, ac ni ddylai fod wedi bod, yn swyddog yr heddlu nac yn aelod o staff yr heddlu yn Heddlu De Cymru na Chomisiynydd yr Heddlu a Throseddu, nac unrhyw Heddlu neu Gomisiynydd yr Heddlu a Throseddu arall;
• Rhaid iddo fyw neu weithio yn ardal Heddlu De Cymru;
• Rhaid iddo fod yn barod i fynychu cyfarfodydd yn ardal Heddlu De Cymru;
• Rhaid iddo gael cliriad fetio unwaith (ni fydd euogfarnau troseddol o reidrwydd yn golygu y caiff eich cliriad fetio ei wrthod; caiff pob cais ei ystyried yn unigol);
• Rhaid iddo fod yn barod i gyfrannu ei amser, ei egni a'i ymrwymiad i fynychu cyfarfodydd rheolaidd;
• Bod yn ymrwymedig i wneud gwahaniaeth i'r ffordd y mae gwasanaethau plismona yn cael eu darparu;
• Rhaid iddo fod yn barod i weithio'n adeiladol gyda'r Heddlu, ac aelodau eraill y Grŵp;
• Dangos y gallu i wrando ar farn pobl eraill a'i hystyried, gan drin pawb yn deg a chydag urddas a pharch;
• Osgoi rhagfarn a gwahaniaethu, gan ddangos ymrwymiad i egwyddorion cydraddoldeb a hawliau dynol;
• Rhaid iddo gydymffurfio â Chod Moeseg y Coleg Plismona;
• Gallu dangos cysylltiadau cryf â chymunedau penodol yn yr ardal blismona;
• Rhaid iddo allu ymdrin â gwybodaeth gyfrinachol a'i rheoli'n briodol;
• Dangos y gallu i gwestiynu, herio, pwyso a mesur materion a mynegi barn gytbwys, resymol a chymesur.

Os ydych o'r farn y gallwch helpu i wneud gwahaniaeth i blismona yn Ne Cymru, cliciwch isod i lawrlwytho’r ffurflen gais heddiw:

Ffurflen gais

Fel arall, e-bostiwch y Tîm Cydraddoldeb ac Amrywiaeth [email protected]

Dychwelwch eich ceisiadau wedi'u cwblhau i [email protected]

Os hoffech drafod ymuno â'r Grŵp, cysylltwch â [email protected]

Gellir darparu'r ddogfen hon mewn fformatau eraill, megis print mawr, braille, sain a thrwy e-bost. Cysylltwch â'r Tîm Cydraddoldeb ac Amrywiaeth [email protected] i gael fformatau hygyrch eraill.