Cerdyn Cadw’n Ddiogel Cymru

Mae Heddlu De Cymru, Gwasanaethau Anabledd Dysgu a Mencap Cymru wedi datblygu Cynllun Cerdyn Cadw’n Ddiogel ar y cyd ar gyfer unrhyw un yn ardal Heddlu De Cymru ag Anabledd Dysgu, neu broblem Iechyd Meddwl ac anghenion cyfathrebu.

Bwriad y cynllun yw gwneud pobl yn fwy ymwybodol o’u diogelwch personol, annog pobl i roi gwybod am droseddau – yn enwedig troseddau casineb – a’u hannog i geisio help os bydd ei angen arnynt. Bydd hefyd yn helpu’r rheini sy’n darparu cymorth, megis yr Heddlu, i gael gafael ar gefnogaeth ar gyfer defnyddiwr y cerdyn a deall sut i’w wneud i deimlo’n fwy diogel.

Os bydd angen cymorth ar ddeiliad y cerdyn, boed ei fod ar goll, wedi dioddef trosedd neu mewn unrhyw sefyllfa sy’n golygu bod angen cefnogaeth ychwanegol arno, gall ddefnyddio’r cerdyn i gael gafael ar yr help hwn. Bydd y cerdyn yn cynnwys gwybodaeth sylfaenol am yr unigolyn megis sut mae’n cyfathrebu, unrhyw broblemau iechyd ac unrhyw gysylltiadau brys megis rhieni neu ofalwyr.

Pan fydd unigolyn yn cofrestru ar gyfer cerdyn cadwa’n ddiogel, bydd hefyd yn cael mynediad i Linell Anabledd yr Heddlu. Dyma rif ffôn pwrpasol ar gyfer achosion nad ydynt yn rhai brys i bobl ag anabledd ei ddefnyddio i gysylltu â’r heddlu. Wrth ffonio’r rhif hwn, bydd derbyniwr yr Alwad yn ymwybodol cyn iddo siarad â’r galwr fod ganddo anabledd.

Yn ystod yr alwad ffôn, gall derbyniwr yr alwad gael mynediad i wybodaeth a ddarperir ar y rhif cofrestru.

Bydd hyn yn sicrhau bod derbyniwr yr alwad yn ymwybodol o unrhyw anghenion ychwanegol a all fod gan y galwr a gall drosglwyddo’r wybodaeth i unrhyw un o adnoddau’r heddlu sy’n rheoli’i adroddiad. Nid yw hyn yn ddewis arall yn lle’r gwasanaeth 999 brys; dylid ei ddefnyddio yn lle’r rhif ffôn ar gyfer achosion nad ydynt yn rhai brys yn unig.

Cofrestrwch ar gyfer Cadw'n Ddiogel Cymru

I ymuno â'r cynllun Cadw'n Ddiogel Cymru, bydd angen i chi gyflwyno ffurflen gofrestru. Gallwch chi wneud hyn yn un o'r ffyrdd canlynol:

• Cwblhau'r ffurflen gofrestru ar-lein.
• Lawrlwytho a llenwi Ffurflen Gofrestru Cadw’n Ddiogel Cymru, a'i hanfon i'r cyfeiriad post isod.

Canolfan Gwasanaethau Cyhoeddus
Pencadlys Heddlu De Cymru
Heol y Bont-faen
Pen-y-bont ar Ogwr
CF31 3SU

Beth sy'n digwydd nesaf?

Ar ôl i ni gael a phrosesu'r ffurflen gofrestru wedi'i llenwi gennych, bydd deiliad y cerdyn neu ei ofalwr yn cael pecyn gwybodaeth Cadw'n Ddiogel Cymru a cherdyn Cadw'n Ddiogel Cymru. Byddwch chi'n gallu defnyddio'r cerdyn ar unwaith.

Diweddaru eich gwybodaeth

Weithiau mae eich amgylchiadau'n newid, er enghraifft eich manylion cyswllt, eich gwybodaeth feddygol, eich anghenion cyfathrebu neu eich manylion cyswllt ar gyfer argyfwng. Yn yr achos yma, cysylltwch â ni i ddiweddaru eich cofnod. Gallwch chi wneud hyn drwy gwblhau'r ffurflen Cysylltwch â Ni ar-lein, neu drwy ffonio 101.

Pan fyddwch chi'n gofyn i ddiweddaru manylion, rhowch enw llawn yr ymgeisydd, ei ddyddiad geni a'i gyfeiriad er mwyn ein helpu i ddod o hyd i'r cofnod cywir.

Drwy gadw eich gwybodaeth yn gywir ac yn gyfredol, mae'n helpu i sicrhau y gall y cynllun Cadw'n Ddiogel Cymru ddarparu'r cymorth mwyaf priodol pa fo angen.

Hysbysiad preifatrwydd

Bydd gwybodaeth a roddir gennych fel rhan o gofrestru ar gyfer Cadw'n Ddiogel Cymru yn cael ei defnyddio at ddibenion plismona yn unol â’r ddeddfwriaeth diogelu data berthnasol. Ni chaiff gwybodaeth bersonol ei rhannu â thrydydd partïon oni bai bod sail gyfreithlon dros wneud hynny.

Canllaw Cyfathrebu Da

Mae Mencap wedi darparu pwyntiau allweddol i’w cofio wrth gyfathrebu ag unigolyn sydd ag Anabledd Dysgu.

Datblygwyd y cynllun hwn i sicrhau bod unigolyn ag Anabledd Dysgu neu broblem iechyd meddwl ac angen cyfathrebu yn cael ei gefnogi pan nad yw yn ei gartref. Mae’n bwysig sicrhau ei fod yn gallu cael gafael ar help pan fydd ei angen gan gynnwys rhoi gwybod am ddigwyddiad i’r Heddlu.

• Cadw’n Ddiogel Cymru: Canllaw Cyfathrebu Da

Gwasanaeth Testun y Genhedlaeth Nesaf

Fel rhan o’n hymrwymiad i aelodau’r cyhoedd sydd ag anawsterau cyfathrebu, gall defnyddwyr Cadw’n Ddiogel Cymru hefyd gofrestru â Gwasanaeth Testun y Genhedlaeth Nesaf.

Mae’r sefydliad yn darparu ap, a fydd yn ei gwneud yn haws i bobl â nam ar y clyw a’r lleferydd wneud galwadau ffôn.