Esbonio stopio a chwilio

Pam ein bod yn defnyddio stopio a chwilio

Mae stopio a chwilio’n bŵer hynod bwysig i’r heddlu er mwyn diogelu’r cyhoedd, mynd i’r afael â throseddu a chadw ein strydoedd yn ddiogel.

Nid ar chwarae bach mae defnyddio pwerau stopio a chwilio. Dim ond pan fydd hynny’n hybu eu hymchwiliadau i weithgareddau troseddol y caiff swyddogion heddlu ddefnyddio’u hawl gyfreithiol i stopio aelodau'r cyhoedd, a'u chwilio, er enghraifft i chwilio am arfau, cyffuriau neu eiddo sydd wedi'i ddwyn.

Trwy ganiatáu i swyddogion ymchwilio i unigolyn heb orfod eu harestio nhw, gall y pwerau yma osgoi arestio’n ddiangen.

Deall y rhesymau

Mae’r heddlu’n cael stopio, neu stopio a chwilio, chi neu gerbyd os ydyn nhw’n credu:

• bod gennych chi eitem sydd wedi'i dwyn
• eich bod chi’n cario pethau, wedi'u gwneud neu wedi’u haddasu, er mwyn cyflawni lladrad, twyll, difrod troseddol, neu droseddau sy'n gysylltiedig â phrotestiadau
• bod gennych chi arf peryglus neu ymosodol neu sylwedd cyrydol yn eich meddiant
• bod gennych chi dystiolaeth sy'n gysylltiedig â throseddau penodol
• eich bod chi o bosibl yn cario cyffuriau
• eich bod chi’n cario arf sydd wedi'i ddefnyddio, neu rydych chi'n bwriadu ei ddefnyddio, mewn digwyddiad treisgar difrifol

Mae’r heddlu hefyd yn cael stopio neu stopio a chwilio o dan fesurau gwrthderfysgaeth.

Mathau o stopio y gallwch eu profi

Mae'r heddlu yn cael eich chwilio chi, unrhyw beth rydych yn ei gario a cherbyd.

Stopio a rhoi cyfrif

Dyma pan fydd swyddog heddlu neu SCCH yn eich stopio mewn man cyhoeddus ac yn gofyn i chi roi cyfrif am eich hun a gallai ofyn i chi:

• beth ydych chi’n ei wneud
• lle ydych chi wedi bod
• lle ydych chi’n mynd
• beth ydych chi’n ei gario

Stopio a chwilio

Dyma pan fo swyddog heddlu yn eich stopio ac yna’n eich chwilio chi, eich cerbyd neu unrhyw beth rydych yn ei gario.

Stopio cerbyd

Dyma pan fo swyddog heddlu yn stopio cerbyd. Gall swyddog heddlu yn gyfreithiol stopio unrhyw gerbyd ar unrhyw adeg a gofyn i weld dogfennau gyrru, gwirio cyflwr y cerbyd neu ddelio â throseddau gyrru. Efallai y rhoddir dogfennau i chi sy’n berthnasol i faterion traffig ar y ffyrdd. Os yw’r broses gyfan yn gorffen yno, caiff hyn ei ystyried yn ‘stopio cerbyd'.

Daw’n stopio a rhoi cyfrif os gofynnir i chi neu unrhyw deithiwr sydd gyda chi roi cyfrif am eich hun.

Os yw swyddog heddlu yna’n chwilio’r cerbyd neu’r bobl sydd ynddo, mae hyn yn stopio a chwilio.

Pan fydd eich profiad chi'n wahanol i stopio a chwilio

Nid ydych wedi bod yn destun stopio a chwilio new rhai amgylchiadau:

• eich bod yn cael eich chwilio fel amod mynediad i eiddo neu ddigwyddiad
• eich bod yn cael eich chwilio yn dilyn arestiad
• eich bod yn cael eich chwilio mewn eiddo sy’n cael ei chwilio dan warant gan lys
• eich bod yn stopio swyddog i ofyn am gyfarwyddiadau neu wybodaeth
• eich bod wedi bod yn dyst i drosedd ac yn cael eich holi yn ei chylch er mwyn cael cefndir y digwyddiad
• eich bod wedi bod mewn ardal lle digwyddodd trosedd yn ddiweddar ac yn cael eich holi am yr hyn y gallech fod wedi’i weld

Mewn achosion fel hyn, ni fydd cofnod stopio a chwilio yn cael ei wneud ac ni fyddwch yn cael derbynneb.