Rhiant yn cipio plentyn
Gallai eich gŵr, gwraig, partner neu gyn-bartner fod yn cyflawni trosedd os yw’n mynd â'ch plentyn dramor heb eich caniatâd.
Gall y sefyllfa gyfreithiol fod yn gymhleth, yn dibynnu ar yr hyn a ddigwyddodd a phwy sydd â gwarchodaeth gyfreithiol dros y plentyn.
Gwybodaeth gan y Llywodraeth am riant yn cipio plentyn yn rhyngwladol
Os ydych chi’n credu bod eich plentyn wedi cael ei gipio
Oes yna argyfwng?
- Ffoniwch 999 nawr os ydych chi’n credu bod eich plentyn mewn perygl yn y fan a’r lle.
Amhariad ar y clyw neu’r lleferydd
- Os ydych chi wedi cofrestru ymlaen llaw gyda’r gwasanaeth SMSbrys, defnyddiwch ein gwasanaeth ffôn testun 18000 neu anfonwch neges destun aton ni ar 999.
- Ffoniwch 999 BSL er mwyn defnyddio cyfieithydd Iaith Arwyddion Prydain.
Os nad yw’n argyfwng
Ffoniwch ni ar 101.
Byddwn yn gofyn am y canlynol:
- enw llawn y plentyn a disgrifiad ohono
- pam eich bod yn meddwl bod rhywun wedi cipio eich plentyn
- ble a phryd y cipiwyd y plentyn
- ble ydych chi’n meddwl y gallai eich plentyn fod nawr
- ble y credwch chi fydd y person yn mynd â’ch plentyn yn y dyfodol
- manylion y person rydych chi’n credu sydd wedi cipio eich plentyn
- manylion unrhyw gerbyd y mae'r person rydych chi'n credu sydd wedi cipio eich plentyn yn berchen arno neu'n ei ddefnyddio
- manylion unrhyw fygythiadau blaenorol i’ch plentyn ac unrhyw ddigwyddiad blaenorol neu ymgais i’w gipio
- a oes gan eich plentyn ei basbort ei hun ac a yw'n basbort y DU neu dramor
- rhif, dyddiad a man cyhoeddi pasbort y plentyn
- a oes gan eich plentyn genedligrwydd deuol a mwy nag un pasbort
- pwy sydd â gwarchodaeth dros eich plentyn, gan gynnwys manylion unrhyw achos gwarchodaeth neu Orchmynion Llys
- tystysgrif geni eich plentyn
- unrhyw gytundebau neu Orchmynion Llys sy’n berthnasol i’r plentyn
- unrhyw wybodaeth arall a allai helpu'r heddlu ddod o hyd i'ch plentyn
Os yw eich plentyn eisoes wedi cael ei gludo y tu allan i’r DU, efallai y gallwn weithio gyda Interpol (y Sefydliad Heddlu Troseddol Rhyngwladol) a heddluoedd mewn gwledydd eraill i ddod o hyd iddo.
Os nad yw eich plentyn wedi cael ei gludo o’r wlad eto
Os nad yw’n rhy hwyr, efallai y gallwn helpu i atal eich plentyn rhag cael ei gludo o’r wlad.
Ffoniwch 101 a sôn am unrhyw fygythiadau a wnaed neu unrhyw ymdrechion blaenorol i gipio eich plentyn.
Rhybudd porthladdoedd
Os ydych chi’n credu bod eich plentyn yn debygol o gael ei gludo dramor o fewn 48 awr, gallwn gysylltu â’r Ganolfan Targedu Ffiniau Cenedlaethol a gofyn iddynt roi gwybod i bob pwynt ymadael o’r DU (fel porthladdoedd a meysydd awyr), er mwyn ceisio atal y plentyn rhag cael ei gludo o’r wlad.
Gelwir hyn yn ‘rhybudd porthladdoedd’. Bydd hyn mewn grym am 28 diwrnod i roi amser i chi gael cyngor cyfreithiol os ydych yn dymuno. Dim ond drwy orchymyn llys y gellir ymestyn y cyfnod 28 diwrnod.
Yn yr Alban, rhaid cael gorchymyn llys sifil (interdict) yn datgan na chaiff y plentyn adael y wlad.
Cysylltu â chyfreithiwr
Mewn rhai achosion, efallai y bydd angen gorchymyn llys arnoch i atal eich plentyn rhag cael ei gludo o'r wlad. Dylech gysylltu â chyfreithiwr cyn gynted â phosib.
Cysylltu â’r swyddfa pasbort
Os nad oes gan eich plentyn basbort y DU, efallai y gall swyddfa basbort y DU (Swyddfa Basbort Ei Fawrhydi, HMPO) rwystro rhywun arall rhag cael pasbort y DU ar eu cyfer. Ffoniwch 0300 222 000 neu gysylltu â HMPO ar-lein.
Cysylltu â Llysgenhadaeth, Uchel Gomisiwn neu Is-gennad y rhiant arall
Os yw eich plentyn yn gymwys i gael pasbort gwlad arall ond heb gael un eto, gallwch ofyn i gyfreithiwr ysgrifennu at Lysgenhadaeth, Uchel Gomisiwn neu Is-gennad y wlad honno a gofyn i’r wlad beidio â chyhoeddi pasbort ar gyfer eich plentyn. Nid oes rhaid iddynt gytuno.
Interpol
Mewn rhai amgylchiadau gall Interpol (y Sefydliad Heddlu Troseddol Rhyngwladol) gyhoeddi hysbysiadau a allai helpu i ddod o hyd i’ch plentyn os yw ar goll.
Gall Interpol ddosbarthu Hysbysiad Melyn i wledydd eraill i roi gwybod iddynt fod eich plentyn ar goll. Gall Interpol hefyd ddosbarthu Hysbysiad Coch ar gyfer y sawl sydd wedi cipio eich plentyn.
Mae hefyd yn cadw cronfa ddata o blant sydd ar goll a gellir ychwanegu manylion plentyn coll at y gronfa ddata hon ar gais y wlad y mae’r plentyn ar goll ynddi.
Rhybudd Achub Plant
Os ydych chi’n poeni am ddiogelwch eich plentyn, efallai y gallwn gyhoeddi Rhybudd Achub Plentyn (CRA). Partneriaeth rhwng yr heddlu, y wasg a’r cyhoedd yw CRA.
Gellir lansio CRA os:
- yw’r plentyn mewn perygl enbyd o niwed difrifol neu farwolaeth a
- bod digon o wybodaeth ar gael i'r cyhoedd allu helpu
Ni fydd pob achos yn arwain at CRA. Yr heddlu sy’n penderfynu lansio CRA.
Confensiwn yr Hâg ar gipio plant
Cytundeb rhwng gwledydd penodol yw Confensiwn yr Hâg ar gipio plant er mwyn helpu i ddychwelyd plant sydd wedi cael eu cipio dramor.
Ffoniwch Gyfarwyddiaeth yr Is-gennad yn y Swyddfa Dramor, y Gymanwlad a Datblygu (FCDO) ar 020 7008 5000 i gael gwybod a yw'r wlad y cipiwyd eich plentyn ohoni wedi llofnodi'r Confensiwn.
Os ydyw, gallwch wneud cais am gymorth gan yr Awdurdod Canolog sy'n gyfrifol am y Confensiwn yn eich gwlad. Mae’r trefniadau ychydig yn wahanol yn dibynnu ar a ydych chi’n byw yng Nghymru, Lloegr, yr Alban neu Ogledd Iwerddon.
Pwy i gysylltu â nhw am help i gael eich plentyn yn ôl dan Gonfensiwn yr Hâg ar gipio plentyn
Os yw eich plentyn wedi cael ei gludo i wlad nad yw’n rhan o Gytundeb yr Hâg
Os yw eich plentyn wedi cael ei gludo i wlad nad yw wedi ymrwymo i Gonfensiwn yr Hâg, bydd yn rhaid i chi roi cynnig ar lwybr gwahanol.
Yn ogystal â cheisio cyfryngu er mwyn dod i gytundeb gyda’r rhiant arall, gallwch gychwyn achos cyfreithiol neu ffeilio cyhuddiadau troseddol. Gall hyn fod yn gymhleth, yn dibynnu ar y gyfraith yn y wlad honno ar rieni yn cipio plant.
Cyngor a chymorth
Reunite
Mae Reunite yn elusen sy’n helpu pobl os yw eu plentyn wedi cael ei gipio’n rhyngwladol. Gallant gynnig cyngor a gwybodaeth, helpu i ddod o hyd i gyfreithiwr, darparu gwasanaethau cyfryngu rhyngoch chi a'ch partner a mwy.
Y Swyddfa Dramor, y Gymanwlad a Datblygu (FCDO)
Gall y Swyddfa Dramor, y Gymanwlad a Datblygu helpu mewn sawl ffordd, gan gynnwys dod o hyd i gyfreithiwr, cwrdd â'ch plentyn (os yw'r rhiant arall yn cytuno), cysylltu ag awdurdodau tramor, a helpu gyda chyfieithu a theithio.