Mae rhywun yn aflonyddu arnaf ar gyfryngau cymdeithasol. Beth alla i ei wneud?
Os yw unigolyn yn anfon negeseuon bygythiol, difrïol neu dramgwyddus atoch drwy Facebook, X.com neu unrhyw wefan cyfryngau cymdeithasol arall, gall fod yn cyflawni trosedd.
Y troseddau mwyaf perthnasol yw 'aflonyddu' a 'chyfathrebu maleisus'. Er mwyn i achos o aflonyddu fod wedi ei gyflawni, mae'n rhaid y bu 'patrwm ymddygiad' clir. Hynny yw, dau neu ragor o ddigwyddiadau cysylltiedig. Nid oes yn rhaid i’r negeseuon fod yn dreisgar o ran eu natur, ond byddai angen iddynt fod wedi achosi rhywfaint o bryder neu drallod.
Os mai dim ond un cyfathrebiad a fu, mae’n annhebygol y byddai’n cael ei gyfrif fel aflonyddu, ond gallai gael ei ystyried yn gyfathrebu maleisus. I drosedd o'r fath fod wedi’i chyflawni rhaid bod neges wedi’i hanfon at unigolyn arall, neu wedi’i hanfon drwy rwydwaith cyfathrebu cyhoeddus, sy’n anweddus, hynod dramgwyddus, difrïol, bygythiol neu beryglus.
Sut i riportio aflonyddu ar-lein, negeseuon maleisus neu ddosbarthiad delweddau rhywiol preifat heb gydsyniad
Byddwn yn gallu cadarnhau a oes trosedd wedi’i chyflawni, yn seiliedig ar yr holl ffeithiau a’ch sefyllfa unigol. Er mwyn ein cynorthwyo gyda’n hymchwiliad ni ddylech ymateb i’r neges gan y gallai annog y sawl sy’n ei hanfon i wneud y sefyllfa’n waeth.
Os yn bosibl, tynnwch sgrinlun o’r neges, felly os bydd yn cael ei dileu’n ddiweddarach bydd gennych gofnod o’r hyn a ddywedwyd.
Cysylltu â’r rhwydweithiau cymdeithasol yn uniongyrchol
Byddai hefyd yn werth riportio hyn wrth y rhwydwaith cymdeithasol a ddefnyddiwyd. Bydd ganddynt broses ar gyfer sefyllfaoedd o’r fath, ac efallai y gallant dynnu’r cynnwys oddi ar y rhwydwaith neu hyd yn oed gau cyfrif yr unigolyn.
Gwybodaeth diolch i askthe.police.uk.