Dronau

Cod Dronau ac Awyrennau Model

Mae'r Cod Dronau ac Awyrennau Model yn debyg i Reolau’r Ffordd Fawr ar gyfer dronau. Cafodd ei greu gan yr Awdurdod Hedfan Sifil (CAA) ac mae'n dweud wrthoch chi sut i hedfan drôn yn gyfreithlon a diogel.

Cofrestru

Y gweithredydd

Perchennog y drôn yw’r gweithredydd fel arfer.

Os nad yw’r drôn yn perthyn i un person, yna person dynodedig o’r enw y rheolwr yw'r gweithredydd. Er enghraifft, os yw’r drôn yn perthyn i glwb a bod yr aelodau’n cael ei ddefnyddio, yna mae'n rhaid i'r clwb ddynodi rheolwr ar gyfer y drôn.

Mae’r angen i gofrestru drôn yn dibynnu ar ei bwysau a’i ddosbarth, ac a oes ganddo gamera ai peidio. Os chi yw'r gweithredydd, rhaid ichi gofrestru gyda'r Awdurdod Hedfan Sifil (CAA) a sicrhau ID Gweithredydd os yw'r drôn:

• yn pwyso dros 250g, neu
• â chamera sy’n gallu tynnu lluniau neu recordio fideo

Nid oes angen OperatorID ar gyfer rhai dronau ysgafnach. Gweler canllawiau'r CAA i gael y manylion llawn.

Rhaid ichi ddangos eich ID Gweithredydd yn glir ar bob drôn sy’n perthyn ichi neu'n cael ei reoli gennych.

Teganau

Does dim angen ID Gweithredydd arnoch ar gyfer drôn sy'n cael ei ystyried yn degan.

Mae’ch drôn yn debyg o fod yn degan:

• os yw'r gwneuthurwr neu'r siop yn ei ddisgrifio fel tegan
• os prynoch chi'r drôn o siop deganau
• os yw wedi'i farcio fel un addas i rai dan 14 oed
• os cafodd ei hysbysebu neu ei becynnu i ddenu plant

Y peilot

Rhaid i unrhyw un sy’n hedfan (peilota) drôn neu awyren fodel sy’n pwyso 100g neu fwy basio prawf sylfaenol gyda’r CAA i gael FlyerID. Rhaid iddynt gario manylion eu FlyerID bob amser pan fyddant yn hedfan.

Nid oes angen FlyerID ar gyfer dronau ac awyrennau model sy’n pwyso llai na 100g, er bod y CAA yn argymell cael un.

Mae gan rai categorïau ofynion ychwanegol ar gyfer peilotiaid.

Mae rheolau penodol hefyd ar gyfer plant, pobl ifanc dan 18 oed a sefydliadau sy’n gweithredu dronau neu awyrennau model.

Yswiriant

Mae arnoch chi angen yswiriant:

• os nad ydych chi’n defnyddio’r drôn at chwaraeon neu hamdden – er enghraifft ei ddefnyddio ar gyfer gwaith neu
• os yw’ch drôn yn pwyso dros 20kg

Rhaid i’r yswiriant fod o safon EC 785/2004 o leiaf.

Rheolau hedfan

Mae'r crynodeb hwn o'r rheolau yn gymwys i'r rhan fwyaf o hediadau drôn. Ond rhaid ichi sicrhau eich bod yn gwybod i ba gategori mae’ch drôn yn perthyn a pha reolau yn union sy'n gymwys.

• Peidiwch â pheryglu neb na dim wrth hedfan drôn.
• Rhaid ichi allu gweld y drôn (gan gynnwys y gofod o'i gwmpas) bob amser.
• Peidiwch â hedfan os ydych chi wedi yfed alcohol neu wedi cymryd cyffuriau.
• Parchwch breifatrwydd pobl eraill, a mynnwch wybod beth gewch chi ei wneud gyda lluniau a fideos a beth na chewch chi ei wneud.

Peidiwch â hedfan:

• dros dorfeydd (sy'n cael eu galw'n 'gynulliadau' yn y rheolau)
• dros 400 troedfedd (120m) o'r ddaear
• mewn Gofod Awyr Cyfyngedig, er enghraifft ger meysydd awyr, oni bai eich bod wedi cael caniatâd
• lle bo'r gwasanaethau tân, heddlu neu ambiwlans yn ymateb i argyfwng, oni bai eich bod wedi cael caniatâd

Gan ddibynnu ar ba gategori o drôn rydych chi'n ei hedfan, fe all fod angen ichi aros o leiaf:

• 50m i ffwrdd o dorfeydd a phobl eraill
• 150m i ffwrdd o ardaloedd adeiledig (trefi a dinasoedd)

Darganfyddwch ble mae hedfan dronau wedi'i gyfyngu yn y DU.

Y gyfraith

Mae'r gyfraith ar hedfan dronau i’w chael yng Ngorchymyn Llywio yn yr Awyr 2016.

Yn y gyfraith:

• mae drôn yn cael ei enw’n Awyren Ddi-griw (UA)
• mae’r system gyfan sy’n cael ei defnyddio i hedfan drôn (gan gynnwys y rheolwr neu'r ap symudol) yn cael ei galw’n System Awyren Ddi-griw (UAS)
• Gweithredydd y Drôn yw'r person neu'r sefydliad mae’r drôn yn perthyn iddyn nhw neu'n cael ei reoli ganddyn nhw
• Peilot y Drôn yw pwy bynnag sy'n hedfan y drôn mewn gwirionedd

Adrannau pwysicaf y rheolau ar gyfer dronau yw erthyglau 265A i 265F, sef y rheolau ar Weithredwyr Dronau, Peilotiaid Dronau a Chategorïau Hedfan.

Ers mis Ionawr 2026, rhaid gweithredu rhai dronau ac awyrennau model gyda Remote ID wedi’i droi ymlaen. O fis Ionawr 2028, bydd angen Remote ID ar gyfer pob gweithrediad drôn ac awyren fodel, oni bai bod y CAA wedi rhoi eithriad.

Os ydych chi'n meddwl y gallai rhywun fod yn torri'r gyfraith

Os nad yw'n argyfwng

Riportio ar-lein

Os ydych chi wedi darllen y rheolau a'ch bod yn credu bod rhywun yn torri'r gyfraith ond nid yw'n argyfwng, gallwch riportio trosedd inni ar-lein.

Pwerau'r heddlu

Mae ein pwerau ni ynglŷn â dronau i’w gweld yn rhan 3 o Ddeddf Rheoli Traffig Awyr ac Awyrennau Di-griw 2021.

Os ydyn ni’n credu y gallai drôn fod yn gysylltiedig â throsedd, fe allwn ni:

• wneud ichi lanio'ch drôn
• stopio a chwilio pobl neu gerbydau i ddod o hyd i ddronau neu offer dronau
• atafaelu a chadw dronau neu offer dronau a ganfyddir yn ystod chwiliad

Rydyn ni hefyd yn cael ei gwneud yn ofynnol ichi ddangos y canlynol inni:

• manylion cofrestru a gwybodaeth arall (ar gyfer peilotiaid a gweithredwyr)
• tystiolaeth o ganiatâd i hedfan lle bo’i angen (er enghraifft i hedfan ger maes awyr)

Rydyn ni hefyd yn cael gwirio drôn er mwyn deall pa reolau sy'n gymwys iddo.