Ymgyrch Encompass

Mae Ymgyrch Encompass yn helpu plant sy'n profi cam-drin domestig.

Sut mae'n gweithio

Nod Ymgyrch Encompass yw lleihau effeithiau hirdymor cam-drin domestig drwy ddarparu ymyriadau a chymorth yn gynnar.

Pan fydd yr heddlu'n dod i ddigwyddiadau trais neu gam-drin domestig sy’n cynnwys plant yn uniongyrchol neu'n anuniongyrchol, maen nhw’n rhoi gwybod i'r arweinydd diogelu dynodedig yn ysgol y plentyn cyn dechrau'r diwrnod ysgol nesaf. Yna mae'r arweinydd diogelu yn sicrhau bod y plentyn yn cael y cymorth angenrheidiol ar unwaith.

Mae hyfforddiant yn cael ei gynnig hefyd i staff ysgolion – gan eu dysgu i adnabod a chefnogi plant y mae cam-drin domestig yn effeithio arnyn nhw.

Mae'r rhaglen ar waith ym mhob heddlu yn y Deyrnas Unedig. Mae ar gael ar gyfer pob ysgol ym mhob heddlu. Lle mae gan heddluoedd y capasiti, maen nhw’n cynnwys meithrinfeydd, cylchoedd chwarae a gwarchodwyr plant cofrestredig.

Sut gallwch chi helpu

Os ydych chi'n rhiant neu'n ofalwr sy'n poeni am blentyn sy'n cael ei effeithio gan gam-drin domestig, siaradwch â'r arweinydd diogelu dynodedig yn ysgol y plentyn.

Gall unrhyw un o ysgol neu sefydliad addysg gofrestru i gael mynediad at becyn hyfforddi ar-lein am ddim ar wefan Ymgyrch Encompass.

Os oes gennych ddiddordeb mewn cofrestru eich ysgol chi ar gyfer Ymgyrch Encompass, neu os hoffech gael mwy o wybodaeth, anfonwch neges ebost at dîm Ymgyrch Encompass.

Llinell gymorth

Mae llinell gymorth Cyngor a Chanllawiau Cenedlaethol Ymgyrch Encompass i Weithwyr Proffesiynol ar gael ar 0204 513 9990, dydd Llun i ddydd Gwener, 8am-1pm.

Mae’n cynnig cyngor am ddim i athrawon gan seicolegwyr addysg neu glinigol ar y ffordd orau o gefnogi plant unigol. Gallan nhw hefyd drafod polisïau ac arferion ysgol gyfan ynghylch cefnogi plant sy'n profi cam-drin domestig.

Rhagor o wybodaeth

Mae rhagor o wybodaeth ar gael ar wefan Ymgyrch Encompass. Mae’r holl ddeunyddiau ac adnoddau ar gael i ysgolion eu defnyddio am ddim.