Panel Adolygu Cam-drin Plant yn Rhywiol (CSARP)

Os ydych chi’n ddioddefwr neu’n un sydd wedi goroesi troseddau rhyw honedig yn erbyn plant, a:

• mae’r heddlu neu Wasanaeth Erlyn y Goron (CPS) wedi penderfynu peidio â chymryd unrhyw gamau pellach
• cafodd y penderfyniad ei wneud cyn 5 Mehefin 2013

gallwch ofyn i’r Panel Adolygu Cam-drin Plant yn Rhywiol (CSARP) ailystyried y penderfyniad hwnnw.

Os gwnaed y penderfyniad hwnnw ar 5 Mehefin 2013 neu ar ôl hynny yna efallai y gallwch ddefnyddio Cynllun Hawl y Dioddefwr i Gael Adolygiad yn lle hynny.

Beth fydd y panel yn ei wneud

Bydd y panel yn penderfynu os oedd dull yr heddlu o weithredu ar y pryd yn anghywir. 

Os yw’r panel yn meddwl bod y dull o weithredu yn anghywir yna byddan nhw’n cynghori’r heddlu y dylen nhw ailymchwilio’r honiadau, neu gynghori Gwasanaeth Erlyn y Goron y dylen nhw adolygu’r penderfyniad i beidio ag erlyn. Penderfyniad yr heddlu neu Wasanaeth Erlyn y Goron fydd gweithredu mewn unrhyw ffordd.

Os yw’r panel yn cytuno gyda’r penderfyniad gwreiddiol i beidio â chymryd unrhyw gamau pellach, byddwch yn cael gwybod hynny drwy lythyr a fydd yn rhoi cyngor a gwybodaeth.

Achosion a allai gael eu hadolygu

Gall y panel adolygu’r achosion canlynol:

• cafodd yr honiadau eu hadrodd i’r heddlu’n flaenorol
• cafodd y troseddau honedig eu cyflawni pan oedd y dioddefwr neu’r un a oroesodd yn iau nag 18 oed
• penderfynodd yr heddlu neu Wasanaeth Erlyn y Goron beidio â chymryd unrhyw gamau pellach
• gwnaed y penderfyniad cyn 5 Mehefin 2013
• gallai’r troseddwr honedig achosi risg o hyd
• cafodd y drosedd honedig ei chyflawni yng Nghymru a Lloegr

Does dim ots os ydych eisoes wedi gofyn i’r heddlu neu Wasanaeth Erlyn y Goron i adolygu eu penderfyniad. Gall CSARP ystyried eich achos o hyd. 

Achosion na ellir eu hadolygu

Ni fydd y panel yn adolygu achosion os:

• nad yw’r dioddefwr wedi riportio’r honiadau i’r heddlu eisoes. Bydd hwn yn achos newydd y bydd yn rhaid i ni ei ymchwilio
• mae tystiolaeth newydd sy’n golygu y bydd yr achos yn cael ei ailymchwilio
• cafodd yr achos ei ymchwilio a phenderfynodd yr heddlu neu Wasanaeth Erlyn y Goron beidio â chymryd camau pellach ar 5 Mehefin 2013 neu ar ôl hynny

Sut i wneud cais i gael adolygiad 

Os ydych eisiau i’r panel edrych ar eich achos gallwch:

• anfon e-bost yn uniongyrchol at y panel
• gofyn i’r heddlu neu Wasanaeth Erlyn y Goron roi’ch achos gerbron y panel