Teithio yn ddiogel

Bysiau

Eisteddwch ar y llawr gwaelod neu’n agos at y gyrrwr ar fws nos deulawr, lle bydd yn gallu eich gweld. Yn yr un modd, peidiwch ag eistedd mewn cerbyd gwag ar drenau neu’r ‘Underground’.

Y ‘tube’ a threnau

Ceisiwch osgoi eistedd mewn cerbyd gwag gan y byddwch yn fwy agored i ddioddef perygl ynddynt.

Beiciau

Os ydych yn dewis teithio ar feic, byddwch yn arbennig o ofalus, yn enwedig mewn traffig, a chadwch bellter oddi wrth fysiau a cherbydau mawr, gan y gallant droi’n sydyn a pheidio eich gweld. A chofiwch ein bod yn gyrru ar yr ochr chwith.

Cerdded

Byddwch yn ofalus iawn wrth groesi’r ffordd. Ceisiwch bob amser groesi ar groesfannau wedi’u marcio a chofiwch edrych y ddwy ffordd, gan y gallai traffig, gan gynnwys beiciau, fod yn dod o wahanol gyfeiriad.

Yn y nos, peidiwch â cherdded ar eich pen eich hun mewn mannau fel parciau a strydoedd ochr, neu unrhyw amgylchedd anghyfarwydd. Os oes yn rhaid i chi gerdded, cadwch at fannau prysur lle mae llawer o weithgarwch a digon o olau.

Tacsis

Mae gan dacsis olau ‘TAXI’ ar flaen y cerbyd, a bydd y gost yn cael ei harddangos ar y mesurydd. Hefyd, gellir galw arnynt yn y stryd, eu harchebu ymlaen llaw dros y ffôn, ar-lein neu drwy apiau ffôn symudol, a gellir hefyd dod o hyd iddynt mewn safleoedd tacsis; er enghraifft, tu allan i orsafoedd, meysydd awyr, gwestai a mannau sy’n boblogaidd gyda’r hwyr.

Minicabiau

Mae’r rhain yn edrych fel unrhyw gar preifat arall. Mae’r rhan fwyaf ohonynt wedi’u trwyddedu, gan gwmnïau dibynadwy a gellir eu harchebu dros y ffôn, ar-lein neu gydag apiau ar ffonau symudol. Fodd bynnag, mae rhai heb eu trwyddedu ac yn chwilio am gwsmeriaid ar y strydoedd, gyda’r hwyr fel arfer.

Er bod temtasiwn ar ddiwedd noson allan i neidio i mewn i’r ‘minicab’ cyntaf a welwch, peidiwch byth â mynd i gar nad ydych wedi’i archebu oherwydd na fydd cofnod o’ch siwrnai na’r gyrrwr, ac mae’n eich rhoi chi mewn perygl o ymosodiad, gan gynnwys ymosodiad rhywiol a lladrad. Ni fyddant chwaith wedi’u hyswirio pe bai damwain.

Mae archebu eich minicab yn golygu y caiff eich taith ei gwneud gan yrrwr trwyddedig sydd wedi’i yswirio mewn cerbyd trwyddedig sydd wedi’i yswirio. Bydd cofnod o’r siwrnai, y gyrrwr a’r cerbyd hefyd ar gael felly oes unrhyw broblem gellir olrhain y gyrrwr. Gwnewch nodyn o rif y cerbyd a’r rhif trwydded neu tynnwch lun ohonynt.

Pedicabiau (rickshaw)

Mae’r rhain yn gyfreithlon ond byddwch yn ofalus gan fod sôn am rhai gyrwyr yn mynnu symiau mawr o arian am siwrneiau byr iawn.

Felly cofiwch, defnyddiwch finicab wedi’i archebu a’i drwyddedu, tacsi, bws neu’r Underground bob amser - ac osgowch ardaloedd tywyll a thawel.