Sbeicio diodydd a chyffuriau 'treisio ar ddêt'
Sbeicio diod yw pan fydd alcohol a chyffuriau yn cael eu hychwanegu at eich diod heb eich caniatâd.
Mewn rhai achosion gallai 'cyffuriau treisio ar ddêt’ gael eu defnyddio i sbeicio diod cyn treisio neu ymosodiad rhywiol.
Mae sbeicio diodydd rhywun yn anghyfreithlon, hyd yn oed os na fydd neb yn ymosod arnoch chi.
Gall pobl hefyd fod yn ddioddefwyr ‘sbeicio drwy nodwydd’, sef chwistrellu rhywun â chyffuriau heb eu caniatâd.
Nid ar ddêt yn unig y mae 'cyffuriau treisio ar ddêt’, fel maen nhw’n cael eu hadnabod, yn cael eu defnyddio. Gallai ymosodwr fod yn rhywun rydych chi newydd gyfarfod â nhw neu rywun rydych chi'n ei adnabod ers tro.
Mae'r term 'treisio ar ddêt’ yn cael ei ddefnyddio'n gyffredin, felly rydyn ni wedi penderfynu ei ddefnyddio yma, ond nid yw hynny'n awgrymu bod treisio gan rywun rydych chi'n ei adnabod yn drosedd lai difrifol.
Beth yw cyffuriau treisio ar ddêt?
Alcohol
Mae alcohol yn gyffur treisio ar ddêt sy’n cael ei ddefnyddio’n gyffredin. Mae’n gallu cael ei ychwanegu at ddiod ysgafn heb yn wybod ichi, neu efallai y bydd rhywun yn rhoi mesurau dwbl ichi ar ôl ichi ofyn am un sengl.
Cyffuriau
Gall cyffuriau treisio gael eu cymysgu i mewn i ddiodydd ac maen nhw bron yn amhosibl eu canfod. Maen nhw'n gwneud i bobl deimlo'n wan ac yn ddryslyd ac yn gallu achosi iddyn nhw lewygu ac anghofio popeth a ddigwyddodd tra oedden nhw ar y cyffur.
Dyma’r cyffuriau treisio ar ddêt mwyaf cyffredin:
- Rohypnol (sydd hefyd yn cael ei alw’n ‘roofie’)
- Gamma hydroxybutyrate (GHB)
Cyffuriau treisio ar ddêt sy’n llai cyffredin yw:
- Ecstasi
- Lysergic acid diethylamide (LSD)
- Cetamin
Sut i wybod a ydych chi wedi cael eich sbeicio
Gall fod yn anodd gwybod a ydy’ch diod wedi'i sbeicio, ond os ydych chi'n teimlo'n rhyfedd neu fel petaech chi wedi cael mwy o alcohol i yfed nag a gawsoch chi mewn gwirionedd, yna mynnwch help ar unwaith.
Gallai’r symptomau gynnwys:
- drysu neu ffwndro
- colli’ch cof
- teimlo’n sâl neu chwydu
- bod yn llai swil
- colli cydbwysedd
- mynd yn anymwybodol
- problemau gyda’ch golwg
Riportiwch y peth
Ydy hi'n argyfwng?
Ydy hi’n teimlo y gallai'r sefyllfa droi’n gas neu’n dreisgar yn fuan iawn? Oes rhywun mewn perygl uniongyrchol? Oes arnoch chi angen cymorth ar unwaith? Os felly, galwch 999 nawr.
Os oes gennych chi nam ar y clyw neu'r lleferydd, defnyddiwch ein gwasanaeth ffôn testun 18000 neu anfonwch neges destun aton ni ar 999 os ydych wedi cofrestru ymlaen llaw gyda'r gwasanaeth neges destun brys.
Un o brif effeithiau cyffuriau treisio ar ddêt yw colli cof, felly efallai na fyddwch yn siŵr a ydych chi wedi dioddef ymosodiad ai peidio.
Eich dewis chi bob amser yw riportio treisio neu ymosodiad rhywiol posibl. Ond os byddwch chi’n penderfynu riportio trosedd, fe allwch chi:
- ddweud wrth yr heddlu neu ei riportio i sefydliad arall
- ei riportio’n ddienw neu roi eich manylion llawn a dechrau ymchwiliad
- riportio’r peth eich hun neu ofyn i rywun arall ei riportio ar eich rhan
Os hoffech chi riportio’r peth i'r heddlu, gallwch chi wneud hynny:
- ar-lein
- drwy alw 101
- drwy fynd i orsaf heddlu
Sut i riportio treisio ac ymosodiadau rhywiol
Gallwch riportio sbeicio diodydd hyd yn oed os nad ydych yn credu bod rhywun wedi ymosod arnoch chi.
Fforensig
Os byddwch yn rhoi caniatâd, gellir gwneud profion fforensig i chwilio am gyffuriau treisio yn eich system. Mae angen cymryd samplau gwaed ac wrin yn eithaf buan ar ôl y digwyddiad. Ond mae modd defnyddio samplau o wallt ac ewinedd i ganfod cyffuriau yn llawer nes ymlaen.
Rhagor o wybodaeth am dystiolaeth fforensig mewn treisio ac ymosodiadau rhywiol.
Rhagor o gyngor
Gallwch gael cefnogaeth ar gyfer treisio ac ymosodiadau rhywiol p'un a ydych chi am riportio’r drosedd i ni ai peidio.
Gall sbeicio diodydd ddigwydd mewn unrhyw sefyllfa ac nid eich bai chi yw hyn.
Cymorth i ddioddefwyr
Elusen annibynnol sy'n helpu dioddefwyr troseddau, eu teulu neu eu ffrindiau.