Cymorth ar gyfer treisio ac ymosodiadau rhywiol

Os ydych chi wedi cael eich treisio neu wedi dioddef ymosodiad rhywiol, rydyn ni yma i chi. Os ydych chi'n barod i wneud hynny, gallwch riportio treisio ac ymosodiadau rhywiol inni ar-lein.

Ond os nad ydych chi’n awyddus i siarad â ni, neu os hoffech gael cymorth ychwanegol, mae llawer o bobl sy'n gallu helpu.

Chi sy'n rheoli pethau, a mater i chi yw pwy rydych chi’n siarad â nhw a pha gymorth rydych chi'n ei gael.

Gallwch siarad â'r bobl a'r sefydliadau hyn yn breifat ac yn gyfrinachol, ac oni bai eu bod yn credu bod rhywun mewn perygl difrifol, ni fyddant yn rhannu unrhyw beth gyda ni.

Canolfannau Atgyfeirio Ymosodiadau Rhywiol (SARCs)

Mae Canolfan Atgyfeirio Ymosodiadau Rhywiol (SARC) yn fan lle gallwch fynd ar ôl treisio neu ymosodiad rhywiol i gael cymorth meddygol, ymarferol ac emosiynol cyfrinachol gan feddygon, nyrsys a gweithwyr cymorth arbenigol.

Gallwn ni eich cyfeirio at SARC neu gallwch eich cyfeirio chi’ch hun heb ein cynnwys ni o gwbl.

Mae rhai SARCs mewn ysbytai, mae eraill yn y gymuned leol. Mae ganddyn nhw enwau gwahanol mewn lleoliadau gwahanol o gwmpas y wlad.

Mae nifer o SARCs yn ardal Heddlu De Cymru.

Mae Ynys Saff yn cynnwys Caerdydd a'r Fro.

Mae Llwybrau Newydd yn cynnwys Abertawe, Castell-nedd, Port Talbot, Merthyr Tudful, Rhondda Cynon Taf a Phen-y-bont ar Ogwr.

Mae'r dolenni uchod yn rhoi eu lleoliadau a manylion y cymorth sydd ar gael.

Archwiliad meddygol fforensig

Gallwch gael archwiliad meddygol fforensig mewn SARC. Bydd nyrs neu feddyg yn eich archwilio ac yn casglu tystiolaeth feddygol fforensig (er enghraifft drwy ddefnyddio swabiau).

Mae tystiolaeth feddygol fforensig yn golygu rhywbeth y gallai'r troseddwr fod wedi'i adael ar ôl ar eich corff ac a allai ein helpu i brofi beth ddigwyddodd.

Nid yw cael archwiliad meddygol fforensig yn golygu bod rhaid ichi riportio i'r heddlu. Gall y SARC gadw'r dystiolaeth a gall ei rhannu hi gyda ni os penderfynwch chithau riportio’r peth yn nes ymlaen. Mae hyn yn cadw’ch opsiynau chi’n agored.

Rhagor am dystiolaeth fforensig mewn treisio ac ymosodiadau rhywiol

Cynghorwyr annibynnol ar drais rhywiol (ISVAs)

Mae cynghorwyr annibynnol ar drais rhywiol (ISVAs) yn staff sydd wedi'u hyfforddi'n arbennig ac sy'n rhoi cymorth ymarferol ac emosiynol i oedolion, plant a'u teuluoedd.

Gall ISVA eich helpu mewn llawer o ffyrdd gwahanol:

• os ydych chi’n ystyried riportio i'r heddlu, ond nad ydych yn siŵr beth mae hynny'n ei olygu, fe allan nhw siarad drwy’r broses gyda chi
• os byddwch yn penderfynu riportio inni, gallan nhw’ch cefnogi drwy gydol yr ymchwiliad ac os bydd eich achos yn mynd i'r llys
• gallan nhw’ch cynghori am eich iechyd, eich lles a'ch hawliau
• gallan nhw eich helpu i gael mynediad at wasanaethau cymorth eraill

Mae ISVAs yn gwbl annibynnol arnon ni, a gallwch siarad â nhw heb ein cynnwys ni gwbl.

Dod o hyd i ISVA

Person ac nid lle yw ISVA. Mae ISVAs yn gweithio mewn llawer o wahanol leoedd, gan gynnwys rhai o'r sefydliadau cymorth ar y dudalen hon.

Cysylltwch â sefydliad i ofyn a oes ganddyn nhw wasanaeth ISVAs. Neu gallwn ni roi cyngor ichi os byddwch yn penderfynu cysylltu â ni.

Llinell Gymorth 24/7 Trais a Chamdriniaeth Rywiol

Yn darparu cymorth arbenigol, gyfrinachol am ddim i ddioddefwyr trais neu gamdriniaeth rywiol. Ar agor 24 awr y dydd, 365 diwrnod y flwyddyn. Yn cael ei ddarparu gan Rape Crisis England and Wales, a’i ariannu gan Lywodraeth y Deyrnas Unedig. 0808 500 2222