Dyn o Abertawe yn cael ei garcharu am stelcio

Mae dyn o Abertawe wedi cael ei garcharu ar ôl pledio'n euog i stelcio.

Gwnaeth Raymond John, 42 oed, aflonyddu ar ei ddioddefwr sawl gwaith yn ei gweithle rhwng mis Ionawr a mis Mai eleni.

Ar un achlysur, aeth i'w gweithle chwe gwaith, gan sefyll yn y fynedfa yn syllu ar y dioddefwr.

Ar ddiwrnod arall, aeth i'w gweithle pan roedd y dioddefwr i ffwrdd o'r gwaith a gofynnodd i'r staff lle roedd hi. Parhaodd yr ymddygiad hwn am wythnosau.

Nid oedd y dioddefwr yn gallu gweithio ar ei phen ei hun er ei diogelwch.

Hefyd, gwnaeth John ystumiau rhywiol tuag at y dioddefwr yn ei gweithle, o flaen un o'i chydweithwyr.

Mae wedi ei ddedfrydu i 12 wythnos yn y carchar a bydd yn destun gorchymyn atal yn erbyn y dioddefwr.

Dywedodd Cwnstabl yr Heddlu Liam Finan:

"Gwnaeth Raymond John fywyd ei ddioddefwr yn anghyfforddus yn ddyddiol gyda'i ymddygiad cwbl annerbyniol

"Ni ddylai neb orfod delio â stelciwr fel hyn. Rydym yn gobeithio mai dyma ddiwedd ei obsesiwn â'r dioddefwr."

Mae stelcio yn fath o aflonyddu, ond bydd gan y stelciwr obsesiwn â'r person y mae'n ei dargedu a gall ei ymddygiad digroeso ac ailadroddus wneud i'r dioddefwr deimlo'n ofidus neu'n ofnus.

Gall stelcio gynnwys:

• dilyn rhywun
• mynd i'w gartref heb wahoddiad
• aros yn rhywle y mae'n ymwybodol bod y person yn ymweld ag ef yn aml
• gwylio neu ysbïo ar rywun
• dwyn hunaniaeth (cofrestru â gwasanaethau a phrynu pethau gan ddefnyddio enw rhywun arall)
• ysgrifennu neu bostio rhywbeth ar-lein am rywun yn ddigroeso neu heb yn wybod i'r person

Mae'n stelcio os yw'r ymddygiad digroeso wedi digwydd dwywaith neu fwy ac wedi gwneud i chi deimlo'n ofnus, yn ofidus neu dan fygythiad.

Os yw'r digwyddiad digroeso hwn yn digwydd dwywaith neu fwy, gall fod yn drosedd a gallwch roi gwybod i ni.