Sychu'r llawr â'r ddau: glanhawr gwesty'n rhoi stop ar ddau ddeliwr cyffuriau

Arweiniodd archwiliad ystafell amserol gan un o lanhawyr gwesty at dranc dau ddeliwr cyffuriau yng Nghaerdydd.

Aeth Keiran McCoy, 20 oed a Zack Tawton, 21 oed, i aros yng ngwesty Ibis Porth Caerdydd am bum diwrnod dan enwau ffug ar 5 Medi, 2024.

Ar 7 Medi, gadawon nhw eu hystafell ond daeth un o'r glanhawyr i mewn a digwydd taro ar eu busnes cyffuriau.

Roedd cocên wedi'i adael ar ddreser y gwesty ac roedd pecynnau maint pêl golff ar y llawr, ynghyd â mwy na 100 o fagiau selio o'r cyffur dosbarth A.

Llwyddodd y staff chwim eu meddwl yn y gwesty i gofnodi'r cyfan ar fideo a ffoniwyd yr heddlu.

GWYLIWCH: Y glanhawr chwim ei feddwl yn digwydd taro ar y busnes delio cyffuriau ac yn ei ffilmio cyn rhoi gwybod i'r heddlu.

Cyn i'r swyddogion gyrraedd, roedd McCoy a Tawton wedi dychwelyd i'w hystafell ond ar ôl cael eu dychryn wrth weld tywelion ffres, aethon nhw ati i bacio'u pethau er mwyn gadael y gwesty.

Cyrhaeddodd y swyddogion mewn union bryd i arestio Tawton yn y dderbynfa. Llwyddodd McCoy i ddianc ond cafodd ei arestio ddeuddydd yn ddiweddarach.

Gwadodd y ddau eu bod yn gwybod am y cyffuriau ond cawsant eu dal ar deledu cylch cyfyng y gwesty yn defnyddio'r ystafell.

Hefyd, gwelwyd olion powdr gwyn ar fwg a adawyd yn yr ystafell a chadarnhawyd mai cocên oedd.

Roedd llun ar ffôn un o'r dynion yn dangos un ohonynt yn ystafell y gwesty gyda'r cyffuriau.

Wrth chwilio cartref Tawton yn Llanisien, daeth swyddogion o hyd i fachete a dros £8,000 wedi'i guddio dan fatras.

Plediodd Zack Tawton, o Coed Cochwyn Avenue, Llanisien, yn euog o ymwneud â chyflenwi cocên, caffael eiddo troseddol (sef arian) a sawl trosedd yrru.

Plediodd Keiran McCoy, o Bardsey Crescent, Llanisien, yn euog o ymwneud â chyflenwi cocên a sawl trosedd yrru, gan gynnwys methu â stopio – troseddau a gyflawnwyd pan wnaeth yr heddlu ymholiadau cyn arestio.

Ymddangosodd y ddau gerbron Llys y Goron Caerdydd ddydd Iau, 10 Ebrill, lle y cawsant eu carcharu – Tawton am dair blynedd, and McCoy am dwy flynedd a hanner.

Dywedodd y Ditectif Arolygydd Tim Jones:

“Aeth y ddau o gwmpas eu busnes yn y gwesty gan feddwl na fyddai neb yn sylwi arnynt.
“Roeddent yn delio mewn symiau sylweddol o gyffuriau ac yn ymelwa ar drallodion pobl eraill ond hoffwn roi sicrwydd i'r cyhoedd y byddwn yn defnyddio'r Ddeddf Enillion Troseddau i sicrhau na fyddant yn elwa ar eu troseddau.
“Mae'r ddau ddyn bellach yn y carchar lle y byddant yn cael digon o amser i fyfyrio ar y penderfyniadau a'u harweiniodd yno.
“Hoffwn ganmol y staff oedd yn gweithio yn y gwesty am feddwl mor chwim.”