Cuddiodd deliwr cyffuriau o Gaerdydd storfa o gyffuriau yn ei weithle

Ar ôl tân mewn safle tecawê daeth swyddogion o hyd i storfa o gyffuriau Dosbarth A gwerth degau o filoedd o bunnoedd.

Ddydd Llun 25 Mawrth (2024), galwyd swyddogion tân i ymladd tân a achoswyd gan wall trydanol yn New India Kitchen ar Heol Caerffili, Caerdydd.

Roedd Omar Khan yn y safle ar y pryd – roedd yn gwrthod gadael y safle ac yn fuan, daeth yn amlwg pam.

Wrth sicrhau bod y safle yn ddiogel, daeth swyddogion tân o hyd i'r hyn yr amheuwyd oedd yn gyffuriau anghyfreithlon – powdr gwyn mewn bagiau selio bach wedi'u gadael ar gabinet.

Roedd y deliwr cyffuriau o Gaerdydd – sy'n borthor cegin yn y safle – wedi bod yn defnyddio ardal storio uwchlaw'r tecawê yn gyfrinachol i storio ei gyffuriau.

Rai wythnosau cyn hynny, gofynnodd Khan i berchennog y tecawê os gallai ddefnyddio'r safle i storio rhai pethau gan ei fod yn symud cartref.

Cytunodd perchennog y busnes, heb wybod y byddai'n cael ei ddefnyddio gan Omar Khan i storio canabis, cocên, crac cocên, heroin ac MDMA gwerth mwy na £40,000.

Cafodd Omar Khan, 38 oed o Whitchurch Road, Gabalfa, ei arestio a'i gyhuddo o nifer o droseddau cyflenwi ac ymwneud â chyflenwi.

Cafodd ei garcharu am 48 mis yn dilyn treial yn Llys y Goron Caerdydd ar 25 Mawrth.