Carcharu dynion o Abertawe ar ôl bygwth teulu gyda llafn

Mae dau ddyn o Abertawe wedi cael eu carcharu ar ôl gyrru'n beryglus ac yna bygwth teulu ifanc a dal cleddyf samurai pan gawsant eu herio.

Roedd Stephen Harris, 29 oed o Uplands a Lathan Gray, 27 oed o Fôn-y-maen mewn Citroen Xsara Picasso, a oedd yn cael ei gyrru gan Harris, ar Ffordd Llangyfelach, Treboeth, tua 6:20pm nos Sul 20 Ebrill. Roedd y cerbyd yn troelli olwynion ac yn gwneud troeon brêc llaw yng nghanol prif ffordd brysur.

Yn dilyn gwrthdrawiad a fu bron â digwydd, gwnaeth aelod o'r cyhoedd herio'r ddau, a aeth ati i ddilyn cerbyd yr heriwr, gyda'i bartner a'i fab saith oed ynddo, mewn ffordd fygythiol a brawychus.

Ar ôl i'r dioddefwr stopio mewn garej Texaco gyfagos, stopiodd Harris ei gerbyd er mwyn rhwystro'r allanfa. Yna, aeth Grey allan o'r cerbyd a bygwth y dioddefwr ymhellach, gan gynnwys codi ei siwmper er mwyn dangos dolen hir y llafn y tu mewn i'w drowsus.

Roedd gan y cerbyd hefyd blât cofrestru ffug ac nid oedd wedi'i yswirio. Roedd Harris eisoes wedi'i wahardd rhag gyrru tan 2029.

Daeth swyddogion o hyd i'r cerbyd nepell o'r digwyddiad, a chafodd cyllell gegin hefyd ei chanfod yn y cerbyd pan gafodd ei chwilio, yn ogystal â morthwyl.

Cafodd y ddau eu cyhuddo a'u cadw yn y ddalfa, a phlediodd y ddau yn euog y bore canlynol.

Mae Lathan Gray wedi cael ei dedfrydu i 48 wythnos yn y carchar. Mae Stephen Harris wedi cael ei dedfrydu i 26 wythnos yn y carchar.

Dywedodd y Ditectif Arolygydd Danielle Thorne:

“Mae Stephen Harris a Lathan Gray yn ddau ddyn sy'n credu nad yw'r gyfraith yn berthnasol iddyn nhw.
“Roedd eu hymddygiad bygythiol, yn enwedig tuag at deulu â phlentyn ifanc, yn gwbl gywilyddus.
“Rydym yn gobeithio y bydd y ddau yn defnyddio eu hamser yn y carchar i ailystyried effaith eu hymddygiad bygythiol.”